heimsfræði

Fór í gær á alveg hreint frábæran fyrirlestur í Háskólabíói:
"Rúm, tími og þyngd í afstæðiskenningu Einsteins"
sem er hluti af fyrirlestraröð fyrir almenning í tilefni af ári eðlisfræðinnar, sem kallast "Undur Veraldar" (sjá edlisfraedi.is)

framsetningin var einmitt nægilega einföld til að almenningur gæti skilið þessa hluti, sem eru vægast sagt ákaflega spennandi.
meðal þess sem við lærðum var að

• tíminn líður hraðar fjarri þyngdarsviði


• og þar með hægar nálægt þyngdarsviði


• og stendur í stað við sjóndeild svarthols


• og út af þessu, svokallaða bláviki, þarf að leiðrétta GPRS staðsetningarkerfið um 11 km á sólahring...


• ljósið beygist nálæt þyngdarsviði


• og þess vegna getum við séð sömu stjörnuna á 3 stöðum á himninum


• en bara ef hún er á bak við stóran vetrarbrautaklasa


• ...eða kannski er það bara rúmið sem beygist


• OG: hulduefni er að verða viðurkennd stærð í eðlisfræði


• og það er orka í tóminu...

vátsj!!
þegar ég var í stjörnufræði í menntó, fyrir tæpum 10 árum eða svo, þá var það bara mikli hvellur, heimurinn varð til, heimurinn þenst út, hægar og hægar, heimurinn skreppur saman, heimurinn fellur saman og ekkert, nema kannski endurtekur þetta sig allt saman.
það var heimsmyndin
frekar óspennandi
svo 1998
þá komust þeir að því að heimurinn þenst út hraðar og hraðar
hann ætlar sko bara alls ekki að skreppa saman aftur
og allt í einu er óhemjumikið af spurningum ósvarað
fyrirlesarinn viðurkenndi að 70% af "alheiminum" (vont orð á þessum tímum), þ.e. okkar plani af heiminum, okkar skynjanlega heimi...
70% væri eðlisfræðilega óþekkt
þ.e. ekki þekkt efni
5% er það sem við sjáum
25% (minnir mig) er hulduefni
og 70% hafa menn bara ekki hugmynd um hvað er...

ef það er ekki spennandi... þá veit ég ekki hvað spennandi er
enda þyrpist nú fólk í stjarneðlisfræði
og vá hvað ég skil það vel!

:D

Dagurinn sem heltekur

ætli þetta muni gerast í hvert einasta skipti sem ég sem nýtt lag?
ég meina,
það er svo lítið mál að finna laglínuna
hún bara kemur
eins og ekkert sé
svo framarlega sem ljóðið grípi mig þá myndast stemningin bara og lagið verður til
og þökk sé tónheyrnarþjálfuninni kemst það fljótt og nokkuð örugglega á blað...

en undirleikurinn: þvílíkur höfuðvekur!!!

og ég fyllist efasemdum
um að ég geti nokkuð
hafi nokkuð að gera í tónskáldið...

það er ekki vegna þess að undirleikurinn neiti að verða til
- hann fæðist yfirleitt fljótlega á eftir laglínunni, ef ekki um leið -
þ.e. ekki nóturnar
heldur tilfinninginn
tilfinningin sem ég veit að hann á að skapa
bragðið að honum
vandamálið er að hann býr í hjartanu á mér
og að koma honum úr hjartanu yfir í heilann: það þarf að gerast í gegnum hendurnar!

og þær greyin eru bara alls ekki nógu klárar á píanó :S

og ég get ekkert stjórnað því hvernig hann verður
eða reynt að glamra eitthvað annað sem er auðveldara
því það er alls ekki ég sem sem hann
hann bara verður til
einhvers staðar í undirmeðvitundinni
tekur af mér völdin

svo ég sit og sit og glamra og prufa
en ekkert hljómar eins og hjartað mitt veit að það á að hljóma
og ég engist
í vikur...

*andvarp*

en svo loksins
einhvern daginn
kannski þegar ég kemst í almennilegt píanó...
þá finn ég hann
og hann heltekur mig

í þetta skiptið er það "Dagurinn líður"
5 erindi eftir Tómas!
það flóknasta sem ég hef samið hingað til...

og ég fann hann í gær!

sumargjöfin mín!

***********ljóm*************

Buckley, Bellamy, Che og allir þessir listar

sambó gerði þvílíkt grín að mér þegar ég sagði honum frá Jeff Buckley draumnum um daginn
"þú ert eins og systir mín sem dreymdi um Jason Donovan í gamla daga!"
YEAH RIGHT! :þ
--sjálfsvörn byrjar--
sko
stelpur sem eru skotnar í poppstjörnum eru skotnar í þeim af því að þeir eru stjörnur
og frægir
og sætir
og sexý
og glenna sig í myndböndum
Jeff Buckley í draumnum leit ekki einu sinni remotely út eins og Jeff Buckley, enda var ég ekkert með skýra mynd af honum í hausnum (kíkti hins vegar á hulstrið af Grace þegar ég vaknaði)
vegna þess að þetta Jeff Buckley æði mitt
(og Matt Bellamy (í Muse) æðið mitt haustið 2003)
snýst nákvæmlega ekkert um persónu hans
né smetti
né magavöðva, upphandleggsvöðva né neitt því um líkt
það snýst algjörlega og eingöngu um tónlistina
tónsmíðarnar, sönginn, hljóðfæraleikinn, textana, röddina
tónlstarsköpunina
tónlistinn bara snertir mig á einhvern sérstakan hátt
svo ég finn til
og hananú
--sjálfsvörn endar--

jájá
hef stundum spáð í að gera svona lista - nei ekki draumaprinsalista...
lista yfir fólk sem hefur áhrif á mig
t.d. einn úr tónlistinni:

• Tchaikovsky (fiðlukonsertinn!)


• Dvorak (t.d. mesicku)


• Mussorgsky (sönnun þess að fólk með "rangan" bakrunn getur samt gert svo margt)


• (ha Austur-Evrópa hvað???)


• Jón Leifs (það er svo ljúfsárt Ísland í verkunum hans)


• Kalli Run (þvílík ástríða)


• Jón Ásgeirs (þvílík fegurð)


• Jórunn Viðars (glettinn nútíminn)


• uh uh uh...


• Jeff, Matt og þeir þarna...

eða yfir fólk sem ég tek mér til mannlegrar fyrirmyndar eins og amma og m&p og Vigga og kannski núna Che (ég meina sko fyrir utan aðferðirnar sem hann notaði - en egalitisti dauðans! - ouch)

er ég ekki svo mikil "lista"kona alltaf??

nema bara... til hvers?

er það ekki bara tilraun til að skilgreina og skipuleggja eitthvað sem á bara best heima í undirmeðvitundinni?

kannski ég ætti bara að hætta með þetta lista-æði mitt
amk. takmarka það við vinnutengd efni (allir midp2 símar osfrv)

stundum þegar maður skilur eitthvað of vel, þá hættir manni allt í einu að finnast það spennandi...

svo ég held þau megi bara hafa áhrif á mig án þess að ég viti nákvæmlega hvernig

því, um leið og það er orðið meðvitað, er það þá ekki líka bara orðið þvingað???

úff, á það þá ekki líka við um sönginn???

bleah!

...GLEÐILEGT SUMAR!!!

sumarið er tíminn
þegar hjartað verður grænt
og augu þín verða
himinblá
ójá

og mér finnst það í góðu lagi

:D

anda inn...

hhhhhhhhhhhhhaaaaaaaaaaaaaaaaaaa....

sofnaði við Lilac wine...

við vorum 3
hann hafði skilið eftir leiðbeiningar
alls staðar
um völundarkirkjuna
stiga
ganga
skreyttum íburðarmiklum veggteppum
(minnir mig)

við leituðum lengi
að rétta stiganum
rétta herberginu
rangalar
stigar
leidd áfram af tælandi en ósnertanlegri hugmynd um að okkar biði eitthvað...
ótrúlega spennandi

loks þegar við fundum rétta stigann
stigann uppí hæsta turninn
vissum við að við værum að nálgast takmarkið
við drifum okkur upp
opnuðum dyrnar
litum inn
hann sat þarna í sófa
og var að spjalla við Svabba
Jeff Buckley

hann bauð okkur velkomin
þekkti mig alveg
ég rak augun í blað fyrir framan hann
þar hafði hann krotað
"Dagbjört dís"
fann strax að hann var frá sömu plánetunni og við Svabbi
hinir sem voru með mér virtust ekki eins spenntir...

síminn minn hringdi svo ég þurfti aðeins að bregða mér afsíðis
á meðan ég talaði pípti síminn til merkis um að ég hefði fengið skilaboð
ég lauk samtalinu eins fljótt og ég gat og opnaði innhólfið
MMS
sound fæll
play

það sem ég heyrði, ég get ekki sungið það
man ekki einu sinni hvaða lag það var
en ég man að það var eitt af mínum uppáhalds lögum
jafnvel Dísan
og ég man hvernig það hljómaði
tveir gítarar
annar með hljómana
hinn plokkaður
þýða röddin hans Svabba
ein til að byrja með
svo
Jeff Buckley - undurtær og bjartur
yfir
mmmmmmmmmmmmmmmmmmmmmmmmmmmmmmmmmmmmm

Svabbi og Jeff Buckley spiluðu og sungu uppáhaldslagið mitt og sendu mér það með MMS
mínir tveir uppáhalds tenórar! (utan klassíkur)
saman
vá!

ég dansaði fram og kyssti þá hvorn á sína kinnina
svo settist ég við hliðina á Svabba því ég var ennþá pínu feimin við Jeff...
og vaknaði

Umferð

var að lesa góða grein um umferðina hér á vísisvefnum

mín skoðun er sú að það eigi að vera fáar, vel skilgreindar umferðaæðar, þar sem eru engin ljós, bara slaufur
best ef þær gætu verið niðurgrafnar
maður þarf aldrei að stöðva bílinn frá því að maður kemur á svona æð, þar til maður kemur af henni
rennur bara mjúklega í gegn
inni í íbúðahverfunun hins vegar, vil ég að komið sé alveg í veg fyrir gegnumakstur
þar væru næstum allar götur með hámarkshraða 30 og allt morandi í hindrunum og einstefnum
ég vil að Lönguhlíðin verði gerð einbreið og lokað verði fyrir innakstur af Kringlumýrarbraut inn á Hamrahlíð (þvílíkir níðingar sem "stytta sér leið" þar í gegn, fram hjá tveimur skólum!)
best væri ef það væri bara ein leið inn og út úr Hlíðunum (og öðrum íbúðahverfum) til að koma alveg í veg fyrir gegnumakstur

þannig yrði mikil en greið umferð á vel skilgreindum æðum, eins og Miklubraut, Sæbraut, Kringlumýrarbraut og hvað þær nú heita
en engin umferð þar sem börnin okkar labba í skólann, og æfa sig á hjólunum sínum :)

og greinin sem ég minntist á að ofan, hún útskýrir líka hvernig þetta er allt saman umhverfistvænna og getur jafnvel dregið úr slysum :)

aumingjans fegurðardrottningarnar

mikið væri kúl ef menntaðar og sjálfsöruggar konur héldu stuðningsfund fyrir utan næstu Ungfrú Ísland keppni
Brúðarbandið gæti spilað "sætar stelpur" og fleiri af sínum frábæru lögum
já, nei, einmitt ekki mótmælafund
heldur stuðningsfund
til að lýsa yfir stuðningi við þáttakendur keppninnar
tilkynna þeim, greyjunum, að þær séu svo miklu miklu miklu meira virði en þetta
þær eiga nefnilega greinilega voða bágt greyin því það gleymdist að segja við þær í æsku:

• "mikið ertu klár!"


• "mikið ertu dugleg!"


• "mikið ertu skemmtileg!"


• "mikið ertu góð!"


• "mikið ertu sterk!"


• "mikið ertu flink að..." eitthvað sem þær er örugglega flinkar í


• og svo framvegis (fleiri góð "mikið ertu" eru vel þegin ;)

giska á að það eina sem þær hafi fengið að heyra sé:

• "mikið ertu fín!"


• "mikið ertu sæt!"


• "svakalega ertu í sætum kjól!"


• og annað álíka

hvers eiga þær að gjalda!
að hafa verið talið trú um það frá blautu barnsbeini að það eina sem þær gætu væri að vera sætar og að það skipti öllu máli. helst ættu þær að vera fallegastar á öllu landinu...

"og hvað með það?
mega þær ekki bara byggja sína sjálfsmynd á fegurð einni saman ef það er það sem þær vilja?" (lesist endilega með röddum sumra vinnufélaga minna...)

tja...
í fyrsta lagi þá völdu þær tæplega hvernig sjálfsmynd þeirra byggðist upp, það er uppeldislegt og félagslegt "afrek"
í örðu lagi þá er SVONA fegurð einmitt sú fegurð sem dofnar, og hvað verður þá um sjálfsímynd þeirra?
jamms, hún hrynur, eins og fyrrverandi nágrannakona mín í Montreal er gott dæmi um.
hún var fyrrum fegurðardís, ábyggilega enn undir fertugu, hefði enn talist falleg í hinum venjulega heimi, en í tískuheiminum var hún orðin gömul
hún var að missa vitið
grét og grét svo ég hafði ekki svefnfrið, á milli þess sem hún tók ofsafengin æðisköst í hvert skipti sem ég æfði mig að syngja
vesalings konan

ég er ekki að segja að þetta bíði allra fegurðardísa
flestar ættu þær að geta haldið sér "sætum" nógu lengi til að eignast mann og börn
börnin sjá svo vonandi um að halda í þeim vitinu í framhaldinu... eða hvað?

hey, en hvað meina ég eiginlega með SVONA fegurð?
jú þetta er einhver skringileg fegurð sem ég barasta skil ekki, sem þeir virðast vera að reyna að mæla í þessum keppnum
ég er alls ekki að segja að þessar stúlkur séu ófríðar
nei, enda þekki ég enga ófríða konu yfirleitt
þær eru líklega ágætlega sætar undir þessu öllusaman...
en það er bara alls ekki hægt að sjá framan í þær fyrir sólbrúnku, meiki, svartlituðum augabrúnum og þvílíkum augnskugga
(ég mála mig nú stundum, en þetta minnir nú meira á þegar við vorum að fikta við að setja stardust alla leið upp að augabrúnum til að sjokkera nú örugglega foreldrana, þarna á unglingsárunum í den)
já, ekki nóg með að þeim sé talin trú um að eina gildi þeirra liggi í fegurð, þeim er líka gefið að skilja að þær séu alls ekki nógu góðar eins og þær eru, heldur þurfi að dulbúa sig allverulega til að geta talist fallegar. ég veit ekkert um hvort þær eru farnar að fara í lýtaaðgerðir hér, en mér skilst að það sé orðið must annars staðar í heiminum. vesalings vesalings konurnar!
svo líta þær út eins og afskræmt plast í þokkabót...

ég held að um það bil allar konur sem ég þekki séu margfalt fallegri en yfirborðsplastið sem ég hef séð á síðum blaðanna undanfarinna daga (ungfrú þessi og hinn landshluti)
því sem betur fer eru flestar konur sem ég þekki frekar glaðar í eigin skinni (amk svona dags daglega)
þær vita að þær eru æðislegar fyrir eitthvað sem býr innra með þeim og geta þar af leiðandi margar hverjar geislað svo eftir því er tekið

þær eru heppnar
þeim var hrósað fyrir það sem skiptir máli

en vesalings fegurðardrottningarnar!
er ekki hægt að hjálpa þeim eitthvað?

mæli með

tveimur myndum sem ég sá í síðustu viku

sú fyrri er íslenska gamanmyndin "Dís", sem ég, nafnsins vegna, hafði verið treg til að sjá. það var auðvitað ekkert nema barnalegur kjánaskapur, en þær skólasystur mínar sem eiga heiðurinn að henni, hafa fengið nafnið á nákvæmlega sama stað og ég, nefnilega úr Gunnlaðar sögu eftir Svövu Jakobsdóttur.
en um myndina:
fyndin, skemmtileg og vel leikin. pínu svona norðurkjallarabragð að henni sem birtist í töluverðum fordómum gagnvart úthverfa"rottum" (matgarðspakki) á kafi í lífsgæðakapphlaupinu. En það er allt til gamans gert, og boðskapurinn góður.
best:
hvernig þær taka útlenska karlmenn og hakka þá í spað!!!

þá seinni fékk ég að sjá í stóra salnum í háskólabíó á föstudagskvöldið
sú heitir "Motorcycle diaries" og er hreint frábær vegamynd
etv. er það vegna þess að hún er byggð á raunverulegum dagbókum

það er kannski eins gott að draumaprinsalistinn er dottinn uppfyrir, því annars væri hinn hjartastóri Ernesto "Che" Guevara - kallaður Fuso í myndinni - líklega á leiðinni inná hann.
Allavega ef ég væri 17 ;)

þessi mynd lýsir því hvernig hann breytist úr saklausum og hjartahreinum læknanema í reiðan ungan mann með hugsjón. sýnir hvernig augu hans opnast fyrir þjáningu almúgans. og hvernig hann átti auðvelt með að hrífa fólk með sér. sumsé alls ekki um byltinguna. Fyndin, skemmtileg, áhrifamikil, hjartahlý og með hreint frábæra myndatöku. best að sjá þessa á stóru tjaldi ;)

annras sorglegt hvernig fólk með fallega hugsjón heldur að besta leiðin til að gera hana að veruleika sé að drepa þá sem eru ósammála...
ekki að ég viti neitt mikið um Suður-Ameríku (merkilegt hvernig stórum hluta heimsins var sleppt úr sögunni sem maður var látinn læra í skóla), en er ekki annars ástandið þarna ennþá svona slæmt?
eru ekki ennþá hinir ríku að kúga þá fátæku?
og er það Bandaríkjunum að "þakka" að byltingin tókst ekki?
nei ég bara spyr, því samkvæmt eftirmála myndarinnar
þá voru það þeir sem drápu Fuso...

einkennilegar hliðarverkanir endurfæðingar

það er ýmislegt sem kemur á óvart við þessa nýju konu (sem fæddist á sunnudaginn)

hún er eitthvað voðalega mikið að reyna að vera minna sjálfhverf
(t.d. ef einhver er leiðinlegur viðmóts, í staðinn fyrir að móðgast, að velta fyrir sér hvort viðkomandi eigi pínu erfitt í dag og vera þess vegna frekar næs!) það er reyndar margra ára, ákaflega bjartsýnt verkefni sem krefst mikillar ævingar
innblásturinn er auðvitað amman sem komst í gegnum 89 ára líf án þess að hallmæla nokkrum manni
vá!

svo er þessi nýja frekar mikið á móti sjónvarpi í augnablikinu, en við sjáum nú hvernig það endist þegar skammdegið mætir aftur á skerið...

þetta er auðvitað barasta fínt!
það er hins vegar annað sem er furðulegra:
hún á sér engan draumaprinsalista!
jamms
draumaprinsalistinn er búinn
hættur
farinn
strokaður út
ekki viljandi
ekki meðvitað
en samt einhvern veginn
orðinn... úreltur!

hef ekki hugmynd um hvað þetta táknar
hún er alls ekkert hætt að láta sig dreyma
ennþá sömu kreisí hugmyndirnar um að hún geti actually orðið lagasmiður/tónskáld
og þessi brjálaða ævintýraþrá er líka að gera út af við hana...

móðir allra

það var alveg sama hver það var, hún gat látið öllum líða eins og þeir ættu sérstakan stað í hjarta hennar.
og það áttu í rauninni allir, því hún var með stærsta hjarta fyrr og síðar.
henni þótti óendanlega vænt um alla.
var móðir allra.
svo dó hún, í hárri elli, en væntumþykjan hvarf ekki
væntumþykjan var ennþá allt í kring, því fólkið vissi að hún var ennþá á meðal þeirra
alls staðar.
og þau töluðu um hana, sögðu börnum sínum frá henni
hvernig um umlykti þau öll með kærleika sínum
móðir allra
og börnin sögðu sínum börnum og brátt var hún orðin móðir heillar þjóðar
eilíf
alls staðar
móðir vor þú sem ert á himnum...
um aldir

já eða sko
varð ekki guð til svona?
fyrir 7000 árum
hvernig ætli heimurinn væri ef hann hefði verið kona???

17. maí - 17. maí - 17 maí

jæja!!!

þá er dagsetningin mín loksins komin :)

þriðjudagskvöldið 17. maí verða 8. stigs tónleikarnir mínir haldnir

allir þeir sem vilja koma geta tekið frá kvöldið

aðgangur er ókeypis og á efnisskránni eru verk úr ýmsum áttum

eins og t.d.

• þýsk sönglög (Brahms, Wolf, Schubert)


• norræn sönglög (Grieg)


• hugsanlega frönsk sönglög (Debussy)


• óperuaríur


• söngleikjalög


• íslensk sönglög (þam líklega 2 eftir mig :)

hlakka til að sjá ykkur (ég á eftir að minna á þetta nokkrum sinnum aftur)

Fönix

Komiði sæl!

Ég heiti Dagbjört :D
Ég fæddist sunnudaginn 3. apríl 2005, þ.e. í fyrradag
ég reis upp úr ösku forvera míns :)
hún er búin
ég er byrjuð

við erum ekki eins
ég er öðruvísi að ýmsu leiti
ný
það er gott að vera ný

það var vorið sem vakti mig
mikið er vorið yndislegt!
veturinn er enn eitthvað að reyna að stympast við það
en ég veit hver hefur sigur að lokum ;)

já, ég er sumsé endurfædd og heimurinn er yndislegur
svo og allt í honum

*knús* veröld

töfratónar og tunglsgeislinn

Howard Shore sendi mig á nett löngunartripp þegar ég fylgdist með honum í Appendix VI við LOTR ROTK (Lord of the Rings - Return of the King fyrir nördleysingja) í vikunni (í vælutón "mig langar að verða kvikmyndatónskáld!")
stefin við persónurnar og staðina sem smátt og smátt vinnst úr á stórbrotinn hátt, skyndilegu einsöngskaflarnir með undurfagurri René Flemming rödd (sem er nú komin með álfamál á ferilskrána!) og vart heyranlegum undirleik...
* R I S A A N D V A R P *

en þrátt fyrir undursamleik Howard Shore, þá er það hins vegar alltaf einn maður sem á heiðurinn að því að tendra áhugann á kvikmyndatónlist
og ekki bara minn
heldur flestra sem á hann hafa hlýtt
enginn annar hefur þetta vald yfir töfratónunum þannig að tónlistin virðist vera fædd af öðrum heimi.
undraheimi
ævintýraheimi
töfraheimi

stundum er myndin varla byrjuð þegar maður bara veit að tónlistin er eftir hann og engan annan
eins og þegar flugunni var fylgt eftir í upphafi MIB (Men in Black) og ég mátti hafa mig alla við að klípa ekki í Hönnu og pískra
"Danny Elfman! þetta bara hlýtur að vera hann!"
nema hvað!
hann er jú töfratónskáldið, og ég bara get ekki beðið eftir að heyra Kalla og sælgætisgerðina, því sjaldan fær Elfman betur notið sín en í samstarfi við meistara Burton.
*andvarp*

Í mörg ár hef ég klórað mér í eyrunum yfir þessum dáleiðandi töfratónum
laðast að þeim
drukkið þá í mig
og orðið þyrstari
en ekki skilið
Elfman er auðvitað ekki sá eini sem kann að nota þessa töfratóna
hann er hins vegar duglegastur við það, og líklega bestur
(Svabbi hefur t.d. lengi kunnað þetta sbr. td. Martöð II og Álfareiðina :)

það var svo á svipuðum tíma og ég var að reyna að finna tíma til að læra fyrir lokaprófið í hljómfræði (er núna "stúdent" í hljómfræði ;) ), sem ég ákvað að takast á við það sem mér þótti næstum óleysanlegt verkefni:
að semja lag um tunglsgeisla
óleysanlegt?
jú, vegna þess að mér þótti einfaldlega ekki koma til greina að túlka tunglsgeisla án þess að nota töfratónana
sem ég hafði enn ekki fundið...

en stundum er gagn í námsbókunum:
í hljómfræði 8 bætast við nokkrir skemmtilegir hljómar
margir hverjir notaðir til að skipta um tóntegundir
aðrir eru bara ósköp venjulegir hlómar sem hefur verið breytt
kallaðir "breyttir hljómar"
já einmitt
afskræmdir
óeðlilegir
skrítnir
yfirnáttúrulegir?

upprunalega voru þeir dúr hljómar, og því ekki nema von að ég fyndi þá ekki, því í mörg ár hef ég verið að leita að þeim í moll! þröngsýna litla ég

yfirleitt er það bara ein af þeirra eðlilegu nótum sem hefur etv verið tekin og færð til um svo lítið sem hálftón, eða heilli nótu bætt við
jafnvel útúr tóntegundinni
í klassísku hljómfræðinni má reyndar helst bara gera þetta á voða afmarkaðan hátt,
en hver í nútímanum lætur það nokkurn tíman stöðva sig?

svo ég grúfði mig yfir píanóið mitt og fiktaði og fiktaði
og loksins fæddist hann
E dúr með lítilli 6und
tunglsgeislinn minn :)

og ekki nóg með það
eftir að Iwona sendi mig heim með skottið á milli lappanna með fyrsta undirspilið mitt (svo einfalt að það er móðgun við undirleikarann!) þá lagðist ég uppbygginguna og í tvær vikur fékk ég að búa til fullt af öðrum töfratónum, eða öllu heldur töfrahljómum.
fljótlega fór litla 2undin að gera sig heimakomna í E dúrnum líka og varla er sá hljómur núna í laginu sem ekki hefur verið bætt eitthvað við :)
nema minnkaðir 7undarhljómar - þeir eru alveg nógu afskræmdir í sjálfum sér
og hinn undurtæri a dúr í lokin, sem ég leyfði mér reyndar að hafa í frekar óhefðbundinni stöðu fyrir lokahljóm (2. hljómhvörf)

loksins þegar ég fór með þetta aftur til Iwonu, og hún spilaði það, þá átti ég bágt með að tárast ekki
hún er svo frábær píanóleikari, hún skildi þetta allt saman
og tunglskinið rann úr höndunum á henni...

jiiiiiiiiiii hvað ég hlakka til að heyra Hönnu Þóru syngja þetta :)

og nú á ég töfratónana og er svo miklu ríkari :D

helgin

mest gaman að hafa nóg að gera, er það ekki?

helgin:

• fara snemma á fætur


• dútla í nýjasta laginu (við ljóðið "Dagurinn líður" eftir Tómas)


• skreppa í ræktina


• svo í blómaval og byko


• umpotta þessum tveim blómahræðum sem ég á


• syngja á meðan


• kítta baðkarið


• syngja á meðan


• læra 2 - 3 ný lög


• læra öll hin lögin utanað (þ.e. textann, því lögin festast alltaf strax)


• vinna kannski bara svona pínu pons


• syngja meira


• dútla meira í "Dagurinn líður"


• skreppa í ræktina aftur


• syngja meira


• borða sunnudagsmat hjá mömmu


• helst klára laglínuna að "Dagurinn líður" og gott uppkast að undirleik... :S (eins og er er ég komin með laglínu fyrir fyrsta erindi og ágætis uppkast að hinum 4 - já og örstutt píanó-intro)


• sofa vel og lengi :)

ég er SVO heppin að fá að gera BARA svona skemmtilega hluti alla helgina :D

góða nótt ;)

rrrrrrrrrrrrrrrrrrrrrrr

rrrrrrrrrrrrrraaaaaaaaaaaaaaaaaaaaaaaarrrrrrrrrrrrrrhhhhhhhhhhhh

æj
mér fannst ég bara þurfa að öskra eins og ljón
og teygja úr mér

þvílíkt lúxuslíf!
var að koma úr heilsdagsskíðaferð í Norefjell, þar sem sólin glampaði svo vel og innilega að húfa og úlpa fengu að fjúka :)
mmmmmmmmmmmmmmmmmm

svona hefur þetta verið síðan ég kom á laugardaginn:

• skíði


• góður matur


• góður krimmi á skjánum (Norðmenn eru með svona páskakrimma hefð)


• góður svefn


• góð bók


• skíði


• meiri skíði


• pínu Benedikt búálfur


• meiri góður matur...


• osfrv.

sumsé algjört sældarlíf hér í Norge og akkúrat núna er ég alveg glorhungruð og pínu stirð eftir langan dag á fjöllum, og líður þar af leiðandi eins og ljóni

rrrrrrrrrrrrrrraaaaaaaaaaaaaaaaaaaaaaaaaaaarrrrrrrrrrhhhhhhhhhhhhh

smá yfirheyrzla

Jæja, hvar hefurðu VERIÐ Dagbjört mín?

Tja, sko, bara allt á skrilljón, eins og ég var búin að vara við

jæja? eins og hvað?

jú, tónleikar óperudeildar, undir stjórn svaka Covent Garden stjórnanda
og lokapróf í hljómfræði
og árshátíð

núnú! en var þetta ekki allt saman í síðustu viku?

ja, reyndar...

en hvað?

svo hrundi tölvan mín :(

jiiiiiiiiiiiiiiiiiiiiiiiiiiii!

já, en okkur tókst að bjarga henni, þetta var bara svona týpískt Windows bögg

grrrrrrrrrrrrrrrrrrrrrr, Windows!

jamm, næst kaupi ég Mac-a - alveg pottþétt!

og var hún bara að komast í lag?

nei reyndar var það seinnipartinn í gær, þökk sé Knoppix disknum hans Naldo

og þú bloggar fyrst núna???

jamms...

AFSÖKUN?

jú, sko, hljómsveitin Mín var að frumflytja nýtt lag í gærkvöldi...

úúúúúúú

jebb, heitir "Vögguvísa á heiði" og er svaka spúki, eins og Mín er von og vísa.
gekk líka voða vel og Ernið mitt var svaka flott í indíánakjól.
átti sviðið sko!

jahso! Til lukku með það! Þú hefðir nú samt alveg getað bloggað í dag, eða hvað?

í dag var ég á flakki um Söngskólann með upptökuverið mitt flytjanlega "Stúdíó Undraland" að taka upp hinar og þessar söngdísir.

ok, ok, þú hefur sumsé alveg nóg að gera

jamm

en fer nú bráðum að hægjast um?

jamm, núna í lok vikunnar

og ætlarðu þá að vera duglega að blogga?

neibbs! þá ætla ég til Norge að heimsækja storesös og fara á skíði :D

draumahúsið

fasteignamarkaðurinn er alveg klikkaður þessa dagana, og þó að mér liggi ekki mikið á að kaupa mér íbúð, þá fylgist maður með. Það virðist sífellt hyggilegra að byggja bara sitt eigið hús, í stað þess að borga tvöfalt verð fyrir eitthvað sem er bara svona sirka ágætt. ef ég byggði hús eftir mínu höfði þá myndi ég vilja hafa eftirfarandi:

• 2 hæðir


• arineld í stofunni


• risastórt bókaherbergi/skrifstofu, þar sem eru bókahillur upp með öllum veggjum og sófar og hægindastólar svo heimilisfólkið getur dundað sér við að lesa bækurnar sínar og vinna á lappana sína í sama herberginu.


• útskotsglugga með sæti í svefnherberginu á annarri hæð og bókaherberginu sem væri þá beint fyrir neðan, svo ég geti setið og horft á útsýnið


• útsýni yfir sjóinn væri líka alveg best


• tónlistarherbergi (stofan getur reyndar þjónað því hlutverki, því þeir sem þurfa þögn geta farið í bókaherbergið - og flyglar eru svo mikil stofustáss)


• sér herbergi undir sjónvarpið svo það trufli hvorki tónlist, bókalestur, vinnu né svefn (heimili á ekki að snúast um sjónvarp)


• amk. 2 klósett


• eldhús sem rúmar amk 6 manns auðveldlega (eins og hjá mömmu) og liggur yfir í...


• ...borðstofuna að sjálfsögðu


• fullt af fólki og


• nóg pláss fyrir gesti :)

mmmmmmmmmmmm
en þetta verður nú ekki fyrr en í fyrsta lagi um 40, nema ég vinni í víkingalottói (þá þyrfti ég helst að spila í því...) eða semji eitthvað súper-hit lag ;)

en það sakar ekki að láta sig dreyma ;)

bk,

:Dagbjört drómóradís

að synda á móti sjálfri sér

í Ísrael var maður með gul augu
það var óhugnalegt, og þar af leiðandi treysti ég honum ekki
hann var þjálfari og sundvörður
einn góðan veðurdag, þegar ég hafði ákveðið að skella mér til sunds (yfirleitt lágum við sjálfboðaliðarnir bara við sundlaugina flestalla eftirmiðdaga án þess að hreyfa okkur) og taka nokkur vel valin skriðsundstök, þá kom hann til mín við bakkann
"Þú erfiðar allt of mikið! Þetta þarf ekki að vera svona mikið mál!"
"ha? hvað meinarðu?"
"Þú syndir á móti sjálfri þér!"
og vátsj hvað ég varð móðguð!
þessi guleygði ótraustvekjandi vöðvabolti var að segja mér til í skriðsundi
mér sem æfði sund með Ármanni (já, einmitt í heila 3 mánuði 5 árum áður)
þvílík karlremba!
hehehe...

ahemm
en þó ég gæti auðvitað ekki viðurkennt það fyrir honum, þá fór ég samt að pæla í þessu
auðvitað hafði hann rétt fyrir sér, ég buslaði eins og algjör hálfviti þegar ég synti skriðsund (og kannski var það þess vegna sem það leið næstum yfir mig á þessu eina sundmóti sem ég keppti á '91)
um haustið, þegar ég var komin heim, þá fór ég að prófa mig áfram með að taka minna á, og njóta þess frekar að synda skriðsund, og viti menn: ég fór miklu hraðar!
auk þess var það töluvert skemmtilegra, og ég var aldrei lengur næstum drukknuð...

einhver punktur?
jú, ég held að þetta sé ágætis pæling fyrir krilljón aðra hluti í tilverunni :)

tökum t.d. líf í stórborg
þar er alltaf nóg af fólki sem er alveg að drukkna og tekur allt of mikið á
fólki sem líður ekki vel og finnst alls ekkert skemmtilegt að synda skriðsund, þó það myndi aldrei viðurkenna það...
fólki sem syndir á móti sjálfu sér
reynir of mikið og skilur ekki af hverju þeim miðar svona hægt
á meðan aðrir bara slaka á og gera hlutina eðlilega og án áreynslu og líða einhvern veginn fram úr buslukollunum

og fólk sem ofhugsar alla skapaða hluti...
og fólk sem reynir svo mikið að syngja að það vinnur á móti tónlistinni...
úff og ég þekkti einu sinni mann sem skrifaði alltaf svo geðveikt kúl og sniðugan kóða að hann virkaði aldrei...

jamms, best að passa sig að synda ekki of mikið á móti sjálfri sér :)

:D

en að synda á móti straumnum, það er allt annar handleggur! kona verður örugglega alveg súpersterk af því ;)

spítalalíf - eða eitthvað þannig

mánudagur:

útskolun
ég vil sem minnst segja um þetta annað en að ég er heimsmeistari í ógeðsdrykkju
enginn, enginn! getur sigrað mig
ég drakk 3 lítra af "sápu" á 3 klukkutímum
þvílíkur viðbjóður
"auka"verkanirnar voru bara hlægilegar miðað við bragðið
ojbara

og svo mátti ég ekkert borða, ekki einu sinni ís!
bara drekka
bleah

fór mjög svöng að sofa

þriðjudagur:

á leiðinni uppá skurðstofu:
"komdu sæl ég heiti ... hver er kennitalan þín?"
"090977..."
"komdu sæl ég heiti ... hver er kennitalan þín?"
"0909..."
"hérna settu á þig þessa húfu"


á skurðarborðinu:
konur
hlýjar konur
skurðhjúkrunarfræðingar
svæfingahjúkrunarfræðingar
læknar
"jæja, þú ákvaðst að mæta!"
allt konur
ein strauk á mér hendina á meðan önnur leitaði að æð á hinni
"þú ert bara með títlur"
neyddist til að setja í mig barnanál
bara fyndið
hlýjar konur

svo kom karl og sagði:
"þú finnur fyrir smá sting í handleggnum"

AAAAAAAAAAAAAARRRRRRRRRRGGGGGGGGGGGGHHHHHHHHH
veit ekki alveg hvernig ég fór að því að rífa ekki til mín handlegginn og æpa ekki eftir því sem verkurinn færðist ofar og varð óbærilegri
skiptir svo sem ekki máli
svo var allt svart
klukkan var 8:15

vöknun:
einhver að tala
tvær konur
soldið frá
klukkan á veggnum
rúmlega 11
af hverju var ég svona lengi?
smá myrkur aftur
einhver að gráta við hliðina á mér
annar sjúklingur
missti...
lít niður á mig
allt á sínum stað
enginn skurður
bara 4 lítil göt
blóðþrýstingsmælirinn kremur á mér handlegginn með reglulegu millibili
smá myrkur aftur
einhver að tala um botnlanga
"hvenær kom ég hingað?"
"hálf ellefu"
af hverju var ég svona lengi?

hmmm, fyrst ég þarf að liggja þarna hálf útúr heiminum þá borgar sig að nota tímann og æfa sig í tónheyrn
"fyrirgefðu, geturðu nefnt mér lag, bara eitthvað lag?"
"ha? viltu hlusta á tónlist?"
"nei, þarf bara nafn á lagi. svo greini ég það í hausnum á mér"
"uh... kannski bara eitthvað með Ragnheiði Gröndal"
"takk"
meira myrkur á meðan "sólin brennir nóttina" rennur í gegnum hausinn á mér
solfa nöfnin neita að koma
pípípípípípípíp....
einhver kemur hlaupandi
pípíð hættir
"ertu dugleg í ræktinni?"
"afhverju spyrðu?"
"þú er með svo hægan púls! kannski ertu bara svona afslöppuð!"
úje! ég er afslöppuð!
þú ert athvarf mitt bla bla bla fyrir og eftir sólarlag...
pípípípípípíp....
kemur aftur hlaupandi
það er aldeilis að ég er róleg! púlsinn minn er svo hægur að mælarnir halda að ég sé að "krasssa" tíhí!


á deildinni:
mamma í móðu
"af hverju var ég svona lengi! viltu spurja! get ekki beðið!"
slæmar fréttir
grátur
"ég er hálf kona"
sussusssusssusss
"ég trúi þessu ekki"
susssussussussusss

"viltu hlusta á tónlist?"
"já Arvo Pärt!"
Cantata í minningu Brittens
mamma farin í vinnuna
svo Kråkevik
svo Elsa Sigfúss
Mozart Requiem var bara of
hvenær kemur læknirinn?
hvað er klukkan?
hvað er klukkan?

svo kom læknirinn
"nei nei nei, tókum bara botnlangann, þess vegna tók þetta svona langan tíma"
"ó" :)
rangar fréttir
ég er heil kona
en ekki allar konurnar sem liggja í kringum mig
kannski pínu ljótt að vera Pollýanna, en hvernig er annað hægt?
ég vildi bara fara heim
og borða
en nei
enginn matur strax og engin heimferð strax...

miðvikudagur:
vaknaði allt of snemma
það er SVO leiðinlegt að liggja á spítala
alveg jafn leiðinlegt og síðast (fyrir 23 árum)
best að segja sem minnst um það
fékk allavega loksins að borða
og svo LOKSINS eftir hádegi að fara heim
halelúja

annars er alveg merkilegt með kviðvöðvana, að maður barasta notar þá í allt
standa upp
setjast upp
setjast niður
leggjast
velta sér

fattar það þegar maður er með 4 göt á maganum
sem eru að gróa...

botnlangalaus

jah, sko! það er frekar augljóst að það les enginn þetta blogg (sem er auddað mér að kenna fyrir að hafa þagað of mikið) svo ég get barasta sagt hvað sem ég vil
get til dæmis sagt að...
nei, djók!
einmitt þegar maður gerir það, þá fara einhverjir skrípalingar að lesa og brjálast alveg.

svo

kannski bara einhver útgáfa af því sem gerðist...

:D

paradís

mmmmmmmmmm

var í paradís í morgun
alein
í heilli glænýrri 25x50 metra stórri glæsisundlaug
hafði hana alla út af fyrir mig

mmmmmmmmmmmmmmmmmmmmm


(reyndar komu svo einhverjir krakkar á sundnámskeiði, en vá, laugin er svo stór að kona tók ekkert eftir því!)

það er svo gott að synda þarna - mmmmmmmmmmmmmmmmm

tók bara mitt standard 1K, en er að spá í að fara á sunnudaginn og taka 1,5K eða jafnvel 2K

tvennt skrítið

1. sundbolurinn minn er ónýtur svo ég neyðist nú til að nota bíkíníið, þrátt fyrir að vera í innilaug, og finnst það virka voða svona show-offish


2. þegar kona notar búningsklefana ræktar-megin, þá þarf kona að ganga langa leið eftir löngum og gjörsamlega deserted gangi - rennandi blaut í bíkíní.. - pínu spúkí - og mér leið eins og væri verið að fylgjast með ganginum einhvern veginn... eins gott að vera annað hvort nokkuð sátt við kroppinn eða nokk sama...

thíhí

:D

skrímslið

hmmm sko

ég held ég hafi fjarlægt skrímslisbloggið frá því í haust
af því að einhver kjánaprik héldu að ég væri ólett
glætan!!!

smá leiðbeiningar í dagbjörtísku:
fóstur myndu aldrei nokkurn tímann kallast skrímsli, jafnvel þó þau væru slys. fóstur myndu heita fiðrildi eða kríli eða pínufólk eða agnaragnir eða eitthvað álíka knúsilegt.

skrímsli eru ljótir og leiðinlegir aðskotahlutir, eins og t.d. ógeðið í alien
mitt skrímsli er reyndar alls ekkert hræðilegt né hættulegt
það er einfaldlega egg með mikilmennskubrjálæði - sem mér skilst að sé mjög algengt meðal barnlausra kvenna :S
það getur hins vegar valdið alveg hreint ferlegum sársauka - þekkti eina þar sem það sprakk!!! ouch!
það er sumsé alveg bókstaflega verið að refsa mér fyrir að vera ekki búin að sinna skyldu minni við mannkynið...

en allvega
þetta vandræðaskrímsli er búið að vera þarna síðan í haust og neitar að fara, þó við séum búin að reyna að eitra fyrir því og alles. þess vegna verður að stinga á mig göt og stúta því. og þá verð ég eins og nýsleginn túskildingur :)

og hananú!

:D


p.s. ég kalla reyndar stundum konið mitt líka skrímsli, en það er af því að hún getur verið alveg stórhættuleg...

p.p.s. en það er ekki konið mitt sem er inní mér

p.p.p.s. og ætli ég verið ekki að hætta að kalla hana konið mitt, því hún er farin frá mér...

að blogga sem mér bæri

þetta er nú farið að verða svolítið þreytandi
á daginn
þegar ég er í vinnunni eða skólanum
þá er allveg fullt af hlutum í kollinum á mér sem mig langar til að tjá mig um
eins og
öll þessi stelpur á móti strákum bréf sem ganga fyrirtækja á milli
svo lame
eða greinar um að konur geti ekkert í raungreinum
hvað er ég þá? klæðskiptingur?
eða á hvaða land ræðst fjórða ríkið (BNA) næst
frekar augljóst
eða jafnvel hæ-þetta-er-ég-og-mitt-líf-er-svona-þessa-dagana
tja...

en sko
þegar ég kem heim á kvöldin
eftir klukkan tíu
þá er bara ekki minnsti snefill af hugsun eftir í hausnum á mér
orðið

annars er það helst af mér að frétta að ég er á alveg hreint frábæru pilates námskeiði, nemendaóperan er að setja upp senur - þar sem ég syng Meg úr Falstaff - frumsýnt í byrjun mars, leiðinlegasta verkefni aldarinnar búið í vinnunni svo nú er aftur orðið gaman þar, bráðum fer ég til storesös á skíði, Þrymur dýrkar mig (kannski ég hafi verið búin að koma því að), konið mitt er farið frá mér, Færeyskur baritón fluttur inn í staðinn, í næstu viku verða gerð þrjú göt á bumbuna á mér til að taka burt skrímslið - svo ég syng kannski ekki voða mikið þá vikuna...

en það sem er mest scary af öllu er auðvitað lokaprófið í hljómfræði sem færist ógnvænlega nær og nær. íííííííííííííííííííííííííííííííík!!!!!!!!

:D

best

bara svona til að hafa það á hreinu!

krakkar eru æði, og við vitum það öll
samt er eins og maður geti ekki hætt að tala um það þegar eitthvað sniðugt gerist

þessi yngsti sem ég á (ok tæknilega séð þá á bróðir minn hann...), hann er allgjör pjakkur:

• 3ggja og hálfs
  
• ljóshærður
  
• brúneygður!!!
  
• alltaf í slag við 3 vini sína í leikskólanum og saman mynda þeir skaðræðis gengi í leikskólanum
  
• klæðist venjulega 5 - 6 flíkum með einhvers konar spiderman myndum (nærbol, nærbuxum, sokkum, bol, peysu, osfrv.)
  
• finnst skemmtilegast að láta Megaman, Bósa ljósár, Spiderman og fleiri kalla slást
  
• er mikill fegurðarunnandi og alls ekki hrifinn af feitum!
  
• bleikur er allt annað mál...

hann hefur ekki verið alveg jafn mikill Dagbjartaraðdáandi og hin 3, sér aðallega mömmu sína, pabba sinn og stóru systur sína, Önnu 3, sem elskar allt bleikt

eeeeeen:

fékk að gista hjá mér á laugardaginn
í fyrsta sinn
leika sér með þau fáu leikföng sem ég tók með mér frá m&p (maður verður nú að hafa eitthvað þegar smáfólkið lítur við)
það voru:

• 5 lukkutröll
  
• 3 tuskumýslur
  
• 1 bleikur baby pony-hestur
  
• 1 blár baby pony-sæhestur
  
• 1 árgangur af Andrésblöðum
  

auk þess hafði hann tekið með sér að heiman:

• Megaman
  
• Spiderman
  
• Vonda kallinn (grænn ljótur kall með 22 augu út um allt)
  

þetta er nú ekki mikið á nútíma mælikvarða, en eins og við vitum öll er það ýmindunaraflið sem skiptir höfuðmáli:

fyrst lék hann músamömmu
svo valdi hann tröllastrák með beikt hár ("heldurðu að þú verðir einhvern tíman með bleikt hár?" - "Nei!") og ég fékk að leika hina tvo
þá sá hann fallegasta leikfangið á svæðinu, litla bleika baby pony-hestinn. hún fékk að heita Dúlla
og eftir örskamma stund var Dúllan búin að stinga tröllastrákana af yfir á aðra plánetu þar sem hún lamdi vonda kallinn í klessu eins og ekkert væri sjálfsagðara!
með þessu var auðvitað hlaupið út um allt með öskrum og látum, hoppað í sófanum og farið nokkra kollhnýsa!

"jæja, eigum við að lesa?"
"já!"
úr fötunum, í náttfötin, burstaði tennurnar og upp í rúm á 10 mínútum, og ekkert múður.
svo svaf hann eins og... ljón?... ég fékk allavega minn skammt af hnefum í andlitið... en hann rumskaði ekki í 12 tíma!
draumur í dós

skilaði honum svo heim um hádegið á sunnudeginum, eftir stutta en hressandi ferð í sund
og svo, um kvöldið, í sunnudagsmatnum hjá m&p, fékk ég að heyra eftirfarandi:

"Dagbjört, þú ert best"

:D

ekkert líf næstu 8 vikurnar

Kæru vinir!

Hér með er orðið ljóst að ég mun ekki eiga neitt líf næstu 8 vikurnar og engan hitta utan skóla, vinnu og hljómsveitar.
Á dagskránni er:

• að setja upp 2. sýningu nemendaóperunnar á þessum vetri, en þar fer ég með hlutverk Meg Peg í Falstaff eftir Verdi. Sýningin sjálf verður samsett úr 4 óperum.
  Frumsýnd í byrjun mars.
  
• 8. stig í hljómfræði 1. mars - scary og mjög mikilvægt
  
• annað söngskólapuð vegna 8. stigs prófs og tónleika í maí
  
• 8 vikna Pilates námskeið til að koma mér í gang aftur hreyfingarlega
  
• vinna vinna og vinna
  
• 3 lög sem hljómsveitin Mín/Mien þarf að klára ASAP!!!
  

Svo sko, þið skiljið vonandi ef ég hef ekki samband. Þeir sem láta það fara í taugarnar á sér... því miður, svona er ég bara vond vinkona. Þetta er einfaldlega það sem maður þarf að leggja á sig til að vera í fullu námi án lána og getað borðað og reyna að brjótast inní hinn harða heim atvinnutónlistar...

Um leið og þessari törn er svo lokið ætla ég svo að stinga af til storesös í Norge yfir alla páskana, og skella mér á skíði með guttunum mínum, sem ég hef ekki séð í þá hálft ár

svo:
við sjáumst eftir páska :)

*knús og kossar*

:Dagbjört klikkhaus

p.s. blogga samt kannski stundum til að láta vita af mér... :D

2005

Gleðilegt ár öllsömul og takk fyrir öll þessi gömlu og góðu!

Satt best að segja kveið ég þessu ári alveg ógurlega fyrir viku síðan.
Árið sem langtímaplanið mitt rann út
þvílík martröð
hefði allt eins getað bara lokað augunum 15. maí 2005 og ekki opnað þau aftur.
vissi ekkert hvað ég átti að gera við mig.

alveg ómeðvitað,
fór ég þá að velta þessu öllu saman fyrir mér.

og viti menn!!!

hér er komið gróft langtímaplan sem getur enst mér næstu 5 - 6 árin!!!

1. verð á Íslandi amk. til haustsins 2007 og gef þar með íslenskum karlmönnum séns í 2 og 1/2 ár í viðbót!


2. ef enn einhleyp haustið 2007 (og þá þrítug eins og pabbi benti mér á!) þá fer ég í Sibeliusarakademíuna (æðsti tónlistarháskóli Norðurlanda, staðsettur í Helsinki) að læra tónsmíðar


3. ef ekki einhleyp, þá neyðist ég víst til að aðlaga plönin að annarri manneskju, en þá gæti ég líka hugsað mér að fara til Austur Evrópu, t.d. Tékklands.


4. fram að þessu mun ég:
   
   • klára gamla planið, sem felst í að taka 8. stig í vor
   
   
   • halda áfram að semja eins og ég fái borgað fyrir það
   
   
   • halda áfram með hljómsveitina Mín
   
   
   • flytja í Grænuhlíðina
   
   
   • læra meira í pródúseringu
   
   
   • verða betri á píanó
   
   
   • kaupa rafmagnspíanó
   
   
   • skipta um vinnu (hvenær sem það nú gerist...)
   
   
   • læra á bongótrommur
   
   
   • taka burtfararpróf sem samsvarar B.A. gráðu í tónlist
   
   
   • koma í veg fyrir að m&p deyji úr barnaleysi þar til annað hvort storesös eða storebror klára sínar gráður og drattast heim!
   
   
   
   

svo, framtíðin er spennandi, ævintýraleg og full af fjöri!

knús og kossar

:Dagbjört, version 2005

Cars and boys

Flestir sem þekkja mig að einhverju leyti ættu að vita að ég dæmi ekki karlmenn eftir bílum. Gæti varla verið meira sama um hvernig bíl einhver gaur á, eða hvort hann á bíl yfirleitt, enda á ég minn eiginn súper-kúl bíl (og ég á hann ALVEG skuldlausan).
Njet, pottþétt ekki bíla-hag, eða hvaþþær nú kallast.

Eeeeeeeeeeeeeeeeen
það er samt eitt við bíla sem ég nota samt til að dæma menn voða harkalega
sérstaklega þessa dagana
hvernig þeir eru skafnir
veit þetta hljómar eins og meyjustælar dauðans, en:
það er einfaldlega hættulegt að sópa ekki af þakinu!
af hverju?
við sem lendum í því að keyra á eftir þessum letihrúgum gætum fengið snjóköggul í framrúðuna.
og ef ekki er sópað af húddinu, þá getur ökumaðurinn sjálfur blindast og lagt sjálfan sig og aðra í hættu.

svo: lið sem bara klórar gægjugat og keyrir af stað er þar með að merkja sig sem lata, óskynsama, eigingjarna etc.

að maður tali nú ekki um hvað karlmenn sem aumingjast í kulda eru innilega ósexý


og hananú

:Dagbjört sköfudís

Jólahugvekjan

Ég hef nokkrum sinnum verið spurð að því hvort ég haldi nokkuð jól, fyrst ég trúi ekki á guð. Þess vegna langar mig til að útskýra örlítið, um hvað jólin snúast:

Jólin snúast ekki um fæðingu frelsarans. Við vitum öll að Jesús Kristur (sem mér þykir reyndar voða vænt um) fæddist alls ekki 25. des. Það var Konstantín eða hvaðannúhét Rómarkeisari sem bjó til hina kaþólsku kirkju einhvern tíman um 300 eftir Krist, sem þurfti að sætta heiðingjana við nýja siði. Þeir dýrkuðu sólina og hvíldust því á sunnudögum, og héldu sína helstu hátíð þegar sól fór aftur að hækka á lofti. Svo Konstantíneðahvaðannúhét sagði "ok, við verðum kristin og trúum á einn guð föður almáttugan, og þið megið halda hvíldardaginn á sunnudögum og hafa aðalhátíð um vetrarsólstöður". Svo einfalt var það. Alveg eins og þegar Þorgeir ljósvetningagoði kom undan feldinum og sagði "ok, við verðum kristin en megum blóta í laumi og éta hesta". ( Og ekki gleyma að víkingarnir okkar héldu að sjálfsögðu líka jól, eða jólablót.)

Þetta skiptir auðvitað engu máli í dag. Kristnir mega alveg endilega halda uppá fæðingu Jesú á þessum degi. Þetta er bara til að sýna fram á að þeir eiga alls ekki einir þessa hátíð.

Jólin eru hátíð ljóssins. Þau koma okkur í gegnum þetta hræðilega svarta skammdegi sem hefði annars fyrir löngu gert út af við íslensku þjóðina. Við lýsum um skammdegið og fögnum því þegar lengsta nóttin er liðin að daginn fer aftur að lengja.

Jólin eru hátíð fjölskyldunnar. Þau snúast um að hlúa að þeim sem okkur þykir vænt um, minna þau á að þau eiga okkur að. Þau snúast um félagsskapinn og kærleikann. Ef við viljum ausa gjöfum yfir þá sem okkur þykir vænt um, þá megum við það líka, en það er samt nærveran sem skiptir mestu máli. Enginn ætti nokkurn tímann að fá að vera einn á jólunum.

Bróðir minn stríddi mér aldrei á jólunum. Það er jólaandinn. Andi friðar, umburðarlyndis og kærleika. Allir sem hafa fundið hann vita um hvað ég er að tala, og þeir vita líka að hann á alltaf við, hvort sem fólk trúir á Jesú, bara guð, Frey, einhvern annan eða alls engan.

Eitt enn: það er ekki mjög kristilegt að vera eigingjarn á jólin og ætla að banna trúlausum að halda jól. Jesús kenndi umburðarlyndi, fyrirgefningu og frið. Við skulum öll sömul halda áfram að breiða út þann boðskap með því að breyta eftir honum sjálf.

Gleðileg jól öll sömul! Knús og kossar til ykkar allra!

Dagbjört jóladís

Mín í 7 laga úrslit í jólalagakeppni rásar 2

Elsku besta yndislega rás2!
vagga íslenskrar tónlistarmenningar!
valdi
Fjólublágrámann
í 7 laga úrslit
jólalagakeppni
sinnar

það er hægt að kjósa um lögin hér

Fjólublágráminn er að sjálfsögðu nýji jóladúettinn með hljómsveitinni "Mín" sem ég og Erna Mín sömdum og sungum og útsettum og allt.

knús og kossar

:Dagbjört tónskáld

tónlistarfólk í desember

það er auðvitað bara klikkun
ég er ekki nema lítill ómerkilegur söngnemi, en engu að síður er söngdagskráin mín svona næstu rúmu vikuna:

• Föstudagur 10. des, kl. 20:00
  Frumsýning nemendaóperunnar á Prakkaranum eftir Ravel þar sem ég syng hlutverk íkornans með fögru augun


• Föstudagur 10. des, eftir kl. 23
  gestasöngvari hjá hljómsveitinni Hrauni, sem treður upp á Café Rósenberg, með fjöruga jóladagskrá.
  


• Laugardagur 11. des
  frí (og laufabrauð)


• Sunnudagur 12. des kl. 20:00
  2. sýning á Prakkaranum - íkorninn verður á sínum stað


• Mánudagur 13. des
  Prakkarinn fer á flakk um grunnskóla borgarinnar - 2 sýningar (minnir mig)


• Þriðjudagur 14. des
  Tvær skólasýningar í viðbót á Prakkaranum


• Miðvikudagur 15. des
  Enn ein skólasýningin


• Fimmtudagur 16. des
  Jólatónleikar Söngskólans. Þar flytur hjómsveitin Mín nýtt íslenskt jólalag eftir okkur sjálfar. Svo er ég líka í nýjum oktett sem ætlar að syngja 2 hress jólalög þetta kvöld.


• Föstudagur 17. des
  Oktetinn, eða að minnsta kosti helmingur hans, treður upp í jólaveislu sviðstjóra Landspítalans


• Laugardagur 18. des (kl. 15 eða 16 eða 17)
  Óperukórinn heldur jólatónleika sína - Dagamun í desember
  

og þá
loksins þá
get ég farið að týna upp brotin af mínu none-existant lífi
ef það verður hægt

hæ hó!
vinir mínir!
eruð þið þarna einhvers staðar?
muniði eftir mér?
partý hjá mér á gamlárs, allavega, og þið megið öll koma með ykkar hyski og jólasveina!

Biblían

fékk að krota í biblíuna hjá m&p í gærkvöldi.
þar er óvenju mikið af titlum sem virðast höfða til mín, þó mér finnist algjör óþarfi að auglýsa gamlar bækur þar líka (bara af því að þær eru gefnar út í kilju núna, s.s. LoveStar)

á óskalistanum eru sumsé eftirfarandi:

Gerður Kristný (langar mest í hana)
Birna Anna (uppá fjörið)
Auður Jónsdóttir (akkuru ekki bara að skella sér á súperbókmenntirnar?)

hætti við Einar Má, því m tjáði mér að hún fengi "arfaslæma dóma"
langar samt pínu til að lesa um únglíngsár Óla sem stal matchboxbíl og ruglaði öllum skónum... (eða var það Emil?)

annars
*snökt*
verð ég á Íslandi um áramótin
*snöktsnökt*
og millijólaognýárs
*snöktsnöktsnökt*
svo ég kem til með að koma í veg fyrir ótímabært andlát úr leiðindum og söknuði (til storesös og pjakkanna) með því að mæta í vinnuna mína alla daga...

svefnvana

sko
veit ég á
eitthvað það besta líf sem hugsast getur
en ég á líka
eina fíkn
sem getur gert það að verkum
að ég hætti að sinna lífinu mínu
legg það á hilluna
og hætti að vera til

hætti líka að blogga
að sjálfsögðu

jamm,
ég féll um daginn
bara varð að hafa eitthvað að lesa í fluginu til New York
byrjaði voða saklaust
ein lítil 300 bls bók (hp 1)
svo önnur aðeins lengri (hp 2)
og önnur aðeins lengri (hp 3)
og allt í einu var ég dottin í 800 blaðsíðna doðranta! (hp 4 & 5)

gat ekki með nokkru móti fengið mig til að fara að sofa á kvöldin
gat ekki unnið meira en svo að fólk héldi ekki að ég væri dauð
var ekki mikið að hafa fyrir því að gefa sjálfri mér að borða
hvað þá hreyfa mig
vildi helst ekki hitta fólk heldur, en hjá því var reyndar ekki komist að þessu sinni
sem betur fer

og nú er ég búin með síðasta doðrantinn
sem betur fer

ÞVÍ ÞAÐ ER:

frumsýning hjá nemendaóperunni 10. des, á hinni frábæru óperu Prakkaranum eftir Ravel. sýningar í Ými, Skógarhlíð. Mjög skemmtileg uppfærsla, mikið dansað og alls konar fjör.

flutningur á Mozart Requiem næsta laugardagskvöld/sunnudagsmorgun, um miðnætti, í Langholtskirkju. Óperukórinn og félagar úr Sinfó. Flottasta klassíska verk sem samið hefur verið. verkið sem ég ætla að deyja við.

jamm, það er allt á skrilljón

mun ekki leyfa mér að lesa aftur fyrr en eftir 25 daga, nánar tiltekið að kvöldi hins 24. des, þegar ég skríð uppí rúm með glænýja jólabók.

en hvort á ég að panta Gerði Kristnýju eða Birnu Önnu eða Einar Má?

"já en svo vilja þær bara einhverja aumingja"

sko
kæru vinir
þetta er pínu misskilningur
en samt bara pínu

það er ekki rétt að allar konur vilji stráka sem koma ílla fram við þær.

hins vegar
(ath. það sem er hér að neðan byggist á minni reynslu af þeim fjölmörgu ungu konum sem ég þekki)
eiga mjög margar ungar konur það til
að taka út svona tímabil
þar sem þær vilja bara það sem þær kalla "vonda stráka" og á að vera eitthvað voða frelsandi eða kúl eða eitthvað
en ef þeir meiða þær
og kannski trekk í trekk
nokkrir
fá þær á endanum nóg
fullorðnast
og fatta að "góðu strákarnir" (vá hvílík einföldun, því þeir eru auðvitað margbrotnir, þessi yndi) tóku sig til og breyttust í alvöru karlmenn, á meðan hinir (þeir "vondu") eru ennþá fastir í einhverri 17 ára lúppu og eru bara frekar sorrý


og eins og allir vita þá er ég ennþá einhleyp vegna þess að ég miða karlmenn við mesta góða strák allra tíma, sjálfan Jónatan Ljónshjarta.

(jájá, ég veit, ég veit. hann er ekki til. yrði líka bara alveg himinlifandi með einhvern á við pabba)

Hurðaskellir - húrra!

í áframhaldi af umræðu okkar frænkanna um Kertasnigil, rifjaði ég upp hver var uppáhalds jólasveinninn minn í æsku

Stúfur var jú alltaf voða sætur
Gluggagægir beinlínis scary
flestir hinna vildu bara ræna sér einhverjum mat...

en Hurðaskellir! hann var annað og meira en aðrir jólasveinar
í mínum augum var hann táknrænn - lífsgleðin og kætin holdi klædd
hann nefnilega skellti hurðum, og það var sko bannað á mínu heimili!
ég skildi aldrei af hverju, því ég skellti aldrei hurðum í viljandi óþekkt eða reiði.
var bara að sprella og leika mér í einhverjum loftköstum og hurðirnar áttu það til að þurfa að lokast með miklum hraða.

það að banna hurðaskelli er eins og að banna börnum að hafa hátt sem er eins og að banna börnum að leika sér sem er eins og að banna börnum að vera börn sem er auðvitað ekkert annað en glæpur gegn mannkyninu með það eina markmið að útrýma gleði og kátínu æskunnar.

en Hurðaskellir! hann lét sko ekki bæla úr sér kætina, þrátt fyrir að vera reglulega flengdur með vendi!
hann kunni að lifa lífinu lifandi!
hann skellti hurðum!

húrra fyrir Hurðaskelli!

Kertasnigill og tannfræðingar

Bróðurdóttir mín er mikil gersemi.
Í gær hringdi hún til að tilkynna að hún hefði misst tönn, og ræddum við í kjölfarið um alla heima og geima.
meðal annars tjáði hún mér að uppáhaldsjólasveinninn sinn væri Kertasnigill. blessað barnið hafði ekki hugmynd um tilvist sagnarinnar "að sníkja", svo hvernig í ósköpunum átti hún að heyra þetta skemmtilega jólasveinanafn?

hún tilkynnti mér líka hvað hún ætlar að verða þegar hún er orðin stór:
"Listakona og tannfræðingur!"
(eins og Lísa, fjölskyldutannfræðingurinn okkar, sem skoðar reglulega í henni tennurnar, og er greinilega frábær við krakkana)
frænkan svaraði þá:
"þegar ég var 5, þá ætlaði ég að verða söngkona"
þetta var vinsælt svar:
"Þú ERT söngkona!"
...reyndar enn að læra það, en... alltaf gott að heyra að svona 5ára draumar geti ræst.
lýst heldur ekki ílla á samsetninguna.
eitt skapandi og eitt praktískt.
eins og hjá frænkunni ;)

:D

Reykjavíkurlistinn - Im Memoriam

fallegi draumurinn sem ég hjálpaði til við að gera að veruleika fyrir 10 árum er núna um það bil að deyja.
og ég -skæl- fékk aldrei að kjósa hann
fyrir 10 árum var ég ekki orðin 18
fyrir 6 árum voru m&p búin að flytja mig í höllina í Kóp
fyrir 2 árum bjó ég í Quebec
og núna
þegar ég er loksins loksins loksins flutt aftur í mína ástkæru heimaborg
þá er þetta allt saman búið

kannski pínu sjálfselska að ætlast til að þau biðu eftir mér.

snökt

vil samt taka það fram að ég hef ekkert sérstakt á móti tilvonandi borgarstýru.
hef bara aldrei tekið neitt sérstaklega eftir henni á jákvæðan né neikvæðan hátt. og það er einmitt vandamálið. sé ekki að hún hafi nógu mikil pólitískan sjarma til að leiða listann til sigurs eftir 2 ár.
og svo er aftur spurning hvort að það sé nokkrum lista hollt að sitja of lengi við völd.
nokkurs staðar.

væri t.d. alveg til í að grafa Miklubrautina. getur varla verið mikið dýrara en öll þessi jarðgöng úti á landi, en myndi þjóna miklu fleirum.
finnst líka allt í lagi að rífa nokkur ljót fúnkishús frá 1960ogeitthvað til að gera almennileg gatnamót.
einhver var að hvísla því að mér að frú tilvonandi sé með forneskjulegar hugmyndir um samgöngumál. vona að það sé bara slúður.

hmmmm
spurning hvort að Sjálfstæðisflokksmeirihluti í myndi loka Söngskólanum...
ííííííííííííík

en með Villa Þvill og Steinu Val að berjast um stólinn næst...
er þá ekki bara spurning um eitthvað nýtt og ferskt framboð með sterkan leiðtoga og framsæknar hugmyndir?

samt...
muniði hvernig þetta var B.S. (Before Solla)?
engir leikskólar, nema fyrir einstæðar mæður, og þá bara hálfan daginn
brrrrrrrrrrr
skólinn var hálfan daginn, þ.a.l. stundum eftir hádegi - oj

allir peningarnir fóru í að reisa fokdýr minnismerki um Dabba - minnir mig...
man bara hvað borgin var eitthvað litlaus og óspennandi þá
og núna er þetta einhver flottasta borg í heimi, þrátt fyrir smæðina. og enn á uppleið þrátt fyrir umferðarhnúta.

lengi lifi mín ástkæra Reykjavík

New York

...var ÆÐI!

Óperukórinn

er stórkostlegur

Carnegie Hall

magnaður salur

Garðar

frábær stjórnandi

og New York New York New York!
hefði getað verið þar viku í viðbót, og samt ekki náð að gera allt sem mér fannst algjört möst. finnst hálf asnó að vera bara komin heim...

og
ég

er lúin

svo
meira seinna

*knús og kossar*

farin til New York

sjáumst eftir rúma viku!

knús og kossar

:Dagbjört dís

þögn

var ekki ætlunin
að vera svona þögul
þessa dagana

er reyndar að rifna úr spenningi
4 dagar í New York
Metropolitan
La Traviata
Carnegie Hall

osfrv.

það er bara
allt á fullu
þessa síðustu daga

allt þarf að vera klárt
allt utanað
öll föt hrein
(þrátt fyrir bilaða þvottavél í 3 skiptið á árinu...)
hárið nýklippt
öllu skilað af mér í vinnunni

kem heim á kvöldin
dauð
uppgefin
eins og núna

*geisp*

og svo er ég að reyna að losna við skrímsli...

eilíf fortíð

hafiði lesið fyrstu Narníubókina, Ljónið, nornin og skápurinn, eftir C.S. Lewis, þar sem nornin réði og eilífur vetur ríkti í Narníu?
Ég held að eitthvað skyldfólk hennar hljóti að hafa náð völdum á Íslandi :(
Þetta skyldfólk vill hneppa Ísland í eilífa fortíð.

ekki nóg með að það vilji virkja Skagafjörð, einhvern fegursta stað á jarðríki, nú er líka farið að tala um álver í Eyjafirði!!! Á nú að stinga augun úr fjallkonunni OG skera af henni nefið?

mér líður eins og ég sé föst í einhverju hræðilegu ævintýri, þar sem verið er að leggja hræðileg álög á ökkur öll, og allt landið.
það versta er, að þar sem ævintýrið er að hefjast, þá á landið ábyggilega eftir að vera í álögum í a.m.k. 100 ár áður en góðu vættirnar mæta á svæðið og frelsa það sem þá verða afkomendur okkar. hvort sem það verður ljón eða lítil stúlka (eða geimvera)

en við og börnin okkar og börnin þeirra munum héðan í frá og alla okkar ævi vera hneppt í þessi álög, dæmd til að búa í landi eilífrar fortíðar.

Ísland, ég græt örlög þín!

hungur í glugga

svo virðist sem ég sé farin að finna fyrir alveg nýrri tegund af hungri.
hungri eftir upplýsingum, fróðleik og innsýn inní heiminn og fólkið alls staðar og á öllum tíma fyrir utan... og þar er stóri punkturinn:
fyrir utan það sem er ýtt að mér
gæti ekki verið meira sama um hjónaband Britneyjar
vil ekki vita um nýjustu viðskiptahugmynd Madonnu
osfrv.

allt í einu vil ég vita það sem mér er ekki sagt í 4 miðlum á dag, það sem ég þarf að hafa fyrir því að komast að
allt í einu vil ég horfa á sjónvarpsþætti sem eru ekki framleiddir í BNA (nema þá framsýnt fólk eins og Joss Whedon hafi framleitt þá)
ég vil heyra fréttirnar sem okkur eru ekki sagðar
nema í speglinum, sem er besti útvarpsþáttur á Íslandi, sendur út á Gufunni, rás 1, FM 93,5 alla virka daga eftir 6 fréttir (ca. 18:30)
það er ástæða fyrir því að okkur eru ekki sagðir allir hlutir
það eru aðrir sem ákveða hvaða tónlist við hlustum á, hvaða sjónvarpþætti við horfum á og hvaða fréttir við heyrum.
þetta hefur ekki alltaf verið svona, en virðist vera að aukast. áhrif að vestan?

til að halda upplýsingunni, þarf kona því, þessa dagana, að hafa fyrir því að leita uppi sannleikann sem varla er sagður nema í undirmálsgrein ef þá það. en hönnuðunum sé lof fyrir internetið, sem ber í sér að geta losað okkur undan oki fjölmiðlarisanna, hvort sem er í tengslum við upplýsingu eða afþreyingu.

og rúv sé lof fyrir spegilinn sem opnar konu sífellt nýja glugga að framandi samfélögum og furðulegum hugsunarhætti okkar sjálfra

hitt er annað mál að það er engann veginn hægt að segja til um hversu langan tíma mun taka að seðja þetta nýja hungur

p.s.

þetta væri auðvitað bara einn af mörgum hlutum sem ég myndi breyta ef ég væri almáttug í einn dag :D

ef ég væri almáttug í einn dag

þá myndi ég veifa töfrasprotanum mínum svo allir í heiminum litu út nákvæmlega eins og þeir vilja líta út.
væri það ekki æðisleg?
þá gætum við bara hætt öllu þessu bölvaða útlitskjaftæði og fordómum og snúið okkur að því sem býr innra með fólki.

eða kannski að allir í heiminum litu eins vel út og þeir mögulega geta miðað við eigin gen, þ.e. væru í optimal formi og alles... kannski ekki alveg sanngjarnt samt, og myndi ekki virka í heiminum eins og hann er í dag, því miður, því það væri auðvitað miklu eðlilegra...

en ef allir mættu líta út nákvæmlega eins og þeir vilja, hverju myndir þú breyta?

persónulega myndi ég breyta... vá hvað ég vildi óska að ég væri nógu töff til að geta sagt engu, but hey! I'm a woman after all!
væri nebblilega til í að vera með kroppinn minn frá því í maí '98, þegar ég gat sett ennið oní hné án þess að finna fyrir því...

en sko, það er ekki málið, heldur:

hvernig ætli heimurinn væri, ef útlit væri bara ekkert issue?

mmmmmmmmmmmmmmmmmmmmmmmmmmmmmmmmmmmmmmm

ekki minn svanur

undarlegi fugl
ég veit
ekki hvað þú heitir
samt þekki ég þig
í sjón

þú varst
einu sinni
í búrinu mínu
varst
búrið mitt
ég þitt

hvað segirðu?
ég skil ekki sönginn
þinn

lengur

tónlistin til að deyja við

eitthvert það fallegast og best samda verk sem nokkurn tímann hefur verið samið
það er Requiem Mozarts
það síðasta sem hann samdi
svo dó hann

set það alltaf á þegar ég fer í bað
og þegar mér líður... þannig

hef margoft lýst því yfir, að ef ég megi velja hvaða tónlist ég hlusti á þegar ég dey, þá verði það Mozart Requiem
og nú, nú nú nú nú nú! er ég sjálf að fara að syngja í Mozart Requiem, með kórnum.

Húrra!

þetta verk! vá! vá! svo fallegt! svo áhrifamikið!

(þeir sem ekki þekkja það, hluti úr því var notaður undir árás Nightcrawler á forsetann í X-men 2)

mæli tvímælalaust með þessum tónleikum, en þeir verða 4. des. (nánar síðar)

jamms, og svo fyrst að ég verð búin að læra Mozart Requiem, þá get ég, þegar ég dey (vonandi í hárri elli), ef það verða ekki neinar græjur tiltækar, sungið það sjálf fyrir sjálfa mig. og ef ég hef enga rödd, þá syng ég það bara í hausnum á mér.

Requiem aeternam dona eis, Domine: et lux erpetua luceat eis.

Kommúnismi 21. aldarinnar?

eins og kom fram hér neðan var ég á laugardagskvöldið stödd í partýi sem var að mestu leyti undirlagt frjálshyggjufélaginu, eða "félaginu" eins og viðstaddir kölluðu það. Þar sem ég myndi líklegast flokkast sem einhverskonar markaðssinnuð félagshyggjukona, þá gerði ég að sjálfsögðu ráð fyrir að þurfa að standa í einhvers konar stappi, en hafði, sem betur fer, rangt fyrir mér.
flestir voru guttarnir hinir allra prúðustu, enda þeir alræmdustu vanir að vera lagðir í einelti hvar sem þeir láta sjá sig, og ekki á því að skemma djamm með svoleiðis stappi. því var þetta í alla staði hið fínasta partý, enda gestgjafinn duglegur við að gæta að því að ekkert glas væri nokkurn tímann tómt ;)

get þó ekki sagt annað en að það hafi verið áhugavert að "skoða" þessa ungu menn (já og konur!). sérstaklega þessa yngri.
heitir ungir menn í flauelsjökkum með pólitísk barmmerki, óklippt hár, með brennandi trú á háleitri hugsjón, sem þeir sinna af ákafa.
hljómar eins og mennirnir sem ég slefa stundum yfir í bíómyndunum sem eiga að gerast fyrir 100 árunum...
þá var hugsjónin bræðralag manna og að brjótast úr fjötrum stéttaskiptingar sem hafði bundið menn í aldir
nú er hugsjónin frelsi frá þessu sama bræðralagi sem gerði alla jafn... fátæka segja sumir, ríka segja aðrir

hugsjónin þá var ótrúlega falleg, en hún gekk ekki upp...

hugsjónin núna...
dæmi hver fyrir sig

:D

p.s. lenti reyndar í einu pólitísku samtali í partýinu, en það var við unga konu sem var komin langleiðina með að sannfæra mig um að kjósa VG ;)

jöklar

þegar jöklar bráðna
flæða árnar yfir bakka sína
stjórnlausar
trylltar
og eyða öllu sem fyrir þeim verður
gróður
girðingar
hús
brýr
hrynja

stundum er
flóðið ekki svo mikið
jökullin bara örsmár
eða kannski bara sandur og eyðimörk umhverfis þá

en tjónið getur líka verið
óbætanlegt
að eilífu

svo það er alveg ljóst að sumir jöklar eru betur látnir
óþýðir
vera

texti vikunnar

er alveg yfir mig heilluð af lagi og texta með henni Silje Nergaard. Lagið heitir "Lullaby for Erle" og textinn er SVO yndislegur:


Lullaby to Erle

Mothers have woven a black velvet ocean
and spread it between the night and day shores
so that children might sleep, gently rocked by the motion
of waves beneath boats built by fathers like yours

With you safe aboard by the shore we will linger
and watch as your breathing it fills up the sail
you loosen the moorings....your grip on our finger
and leave on the velvet a silvery trail

Alone on the shore with our hearts close to breaking
we stand in the wake as you glide from our reach
calmed by the thought that the voyage you're taking
will bring you at dawning back safe to this beach

We cannot sail with you, be there to guide you
or pilot your boat through the dark of the night
but no ocean cap keep you, no darkness can hide you
away from our love and its undying light.

© Mike McGurk


haldiði að það sé yndislegt!

undirbúningur undir "ze party of political horrors"

er að fara í partý í kvöld til eins stofnenda Frjálshyggjufélagsins
þar verða að öllum líkindum öfga frjálshyggjumenn í gríðarlegum meirihluta, eða Libertarianists eins og þeir kallast.
Libertarinismi, er, þrátt fyrir nafnið, ekki stjórnmálaskoðun, heldur trúarbrögð, og beita þeir oft brögðum sem við þekkjum frá sértrúarsöfnuðum til að fá fólk í lið með sér.

sumsé, í kvöld verð ég í partýi með 10 - 20 plebbastrákum sem hafa aldrei tekist á við neitt í lífinu sem myndi kallast erfitt, því "svoleiðis" er auðvitað bara fyrir aumingja. merkilegt... veit um suma sem myndu kalla "svoleiðis" að lifa, en það eru auðvitað bara fordómar.

og þeir munu eflaust margir reyna að heilaþvo mig til að sjá ljósið.

er ekki alveg búin að gera upp við mig hvaða taktík ég ætla að beita.

freistandi er að vera überkúl og kinka bara brosandi kolli með ég-veit-reyndar-sannleikann-sem-þið-skiljið-ekki svip, án þess að segja neitt mikið meira en kannski. "Já! áhugavert að þú skulir skilja þetta svona!"

eða vera ennþá meira óþolandi og svara öllu sem þeir segja með furðulegum spurningum:

• "heldurðu að það geti verið að 7 sé lausnin á öllum stærðfræðigátum heimsins?"
  (það að 7 sé svarið er reyndar alveg jafn líklegt og að hugmyndafræði Libertarianista gangi upp)
  
• "þykir þér vænt um einhvern?"
  
• "af hverju heldurðu að það séu engar konur sem aðhyllast þessi trúarbrögð?"
  

en sko
ég þekki mig
og ég veit að ég á erfitt með að missa mig ekki út í spennandi rökræður.
þess vegna hef ég verið að skoða grein (eftir Mike Huben) sem heitir "A Non-Libertarian FAQ", og fellir öll helstu Libertarianista rökin. mæli með henni og líka "Libertarianism Makes You Stupid" (eftir Seth nokkurn Finkelstein).

en hvað er ég yfirleitt að spá að fara í þetta partý? gæti ég ekki bara sagst vera lasin? upptekin?

forvitni, vinir mínir, forvitni
er ég ekki líka yfirlýstur ævintýrafíkill?

jííííha!

klikkun?

velti því fyrir mér í vikunni (nánar tiltekið á miðvikudaginn) hvort ég væri ekki bara klikkuð.
ég meina, hversu rugluð þarf kona að vera til að halda að kona geti orðið tónskáld!
það geta allið samið lög!
come on!

en sko, þá þurfa einfaldlega allir listamenn að vera klikkaðir til að ná árangri.
hafa einhverja hálf sturlaða og óþolandi trú á sjálfum sér, að halda að þeir geti náð einhverjum frama í listgreininni.
er það ekki líka þess vegna sem öðrum finnst þeir svo óþolandi
"díses, það er aldeilis að hún er með dívustæla þessi! heldur að hún sé svo miklu æðislegri söngkona en við hinar!" - ekki óalgeng ummæli í mínum skóla

sannleikurinn er bara sá að ef kona á ekki að setjast niður og hágrenja hvern einasta dag í þessu blessaða námi, þá er eins gott að kona sé pínu raunveruleikafirrt að þessu leyti. og til að meika það að standa á fætur fyrir framan fullum sal af fólki og gera eitthvað sem er þess virði að fólk eyði tíma í að hlusta á það...
vá, þá verður kona bara að geta blekkt sjálfa sig og sagt:
"ég er ÆÐI!"
standa svo upp og heilla alla uppúr skónum!
nokkuð sem ég bara verð að læra að gera í vetur...

en sko, það er eitt að halda að kona geti orðið söngkona, en tónskáld!
yeah right!
hver á nokkurn tímann eftir að fíla lög eftir mig

jamms, svo mætti ég í skólann og allir búnir að frétta að ég hefði flutt lag eftir sjálfa mig í deildinni daginn áður. Violetta heimtaði að sjá það og svo þegar hún hafði fengið að skoða fór hún að skamma mig... fyrir að vera ekki að læra tónsmíðar!

hmmmm... það kemur kannski að því einhvern daginn - en það er engu að síður alger klikkun

og hananú!

p.s. til hamingju með afmælið á miðvikudaginn elsku bestu yndislegu Toddi og Fritz. *músjímúsj*

klikkun

er orðin svaka dugleg að aka á milli 3ggja staða, á öllum tímum dags. mínar leiðir eru oftast:

vesturbær - hlíðar
hlíðar - vesturbær
vesturbær - snorrabraut
snorrabraut - vesturbær

það kemur svo sem ekkert á óvart að Miklabraut/Hringbraut sé umferðarmartröð. það sem ég bjóst hins vegar ekki við, var hversu mikil umferð er á henni ALLTAF ALLAN DAGINN!
það er helst að það sé aðeins minni umferð á milli 10 og 11 á morgnanna, en frá 11 og fram yfir kvöldmat er hrein geggjun að ætla sér að aka hana. Að ég tali nú ekki um að vera svo bjartsýn að ætla að taka vinstri beygju af Hringbraut inná Snorrabraut.
þarf varla að taka fram sturlunina sem er á þessari leið á milli 7:30 og 10:00 á morgnanna.

er komin með einfalda lífsreglu í þessum málum:

Sæbraut, Sæbraut, Sæbraut!

Hvað er ég annars að gera á einkabíl?
já, sko, vildi óska að kona gæti hjólað. kona er bara alltaf með svo feikilega mikið af farangri meðferðis. t.d. 30 kg skólatösku OG aðra tösku með leikfimi og/eða sunddóti. auk þess er vandi að hjóla þegar það er ekki til sturta á áfangastaðnum...

úffidípúff!

p.s.

Ástkæri herra Davíð ástarskáld!

það var yndislegt að drekka af brunninum þínum, vonandi fyrirgefurðu mér ef ég leyfi mér að gera það einhvern tímann aftur

krunk, krunk, krá

virðingarfyllst,

Dagbjört dís

frumflutt

eða þannig!

söng sumsé Krumma, lag eftir sjálfa mig við ljóð Davíðs ástarskálds, í Ljóða og Aríudeild niðrí skóla í dag. það tókst nú ekki betur en svo að ég klikkaði á tveimur innkomum, ef ekki þremur, enda skrambi erfitt verk, sem ég hef sumsé lagt miklu meiri vinnu í að semja heldur en að læra, undanfarna viku. Ein innkoman klikkaði reyndar bara af því að ég gleymdi mér yfir því hvað Ólafur Vignir spilaði millikaflann fyrir píanóið vel. húrra!
en úff, næst þegar ég syng verk eftir sjálfa mig, þá þarf ég meiri fyrirvara til að æfa að syngja það.

góðu fréttirnar eru auðvitað þær að verkið sjálft vekur mikla hrifningu þeirra sem á hlýða, þó að söngurinn í dag hafi ekki verið uppá marga fiska. veit að ég get sungið þetta betur, og eins gott, því ég ætla að syngja þetta á tónleikunum í vetur og svo aftur í vor. kroppurinn minn er búinn að vera soddan drusla mestallt haustið, og mér tókst að láta rigna mig rækilega niður þegar ég gekk til góðs í tæpar 4 klst á laugardaginn...

vill einhver skipta við mig um kropp?

en þá er það bara næsta lag á dagskrá: jólalag fyrir mig og Ernuna mína, og nokkrar góðar hugmyndir nú þegar komnar á blað...

vantar vs. langar

jæja, þá hefur sultarólin formlega verið hert!
hér með skiptist allt í tvo flokka:
"vantar" flokkinn og "langar" flokkinn
það má eingöngu kaupa hluti úr vantar flokknum, t.d.

• mat (en eingöngu úr bónus)
  
• bensín (en eingöngu úr atlantsolíu)
  
• 200 GB harðan disk (gat ekki lengur samið tónlist vegna plássleysis - algjört neyðarástand!)
  
• sjampó, hárnæringu, sápu osfrv.
  
• jólagjafir
  

annað má alveg bíða betri tíma, t.d.

• ný gleraugu
  
• ný stígvél
  
• nýjar millistærðarbuxur
  
• föt yfirleitt
  
• klipping
  
• geisladiskar
  
• tónleikar
  
• dvd - (sjáum til með Roswell)
  
• áfengi
  

sumsé, algjör óþarfi :)

hamingjusami fátæki listamaðurinn

pempíur

sé ekki alveg tilganginn með karlkyns pempíum.
ég meina: til hvers eru þeir til?
þeir eru augljóslega ömurlegir í rúminu, slæmir til undaneldis, geta ekki tekið til hendinni (hún má ekki verða óhrein) við nokkurn skapaðan hlut, svo jafnvel þó þeir hafi vöðva, þá eru þeir gjörsamlega gagnslausir.
þeir eru vonlausir vinir, því um leið og maður þarf eitthvað á þeim að halda, þá láta þeir sig hverfa (ertu veik? ekki smita mig!!!! ha túr? ertu rauðsokka???)
þeir geta því í rauninni ekki neitt annað en að vera sætir!
þeir eru púddelhundar! af hundaætt, en ekki raunverulegir hundar, og um leið og þeir sjá kött þá hlaupa þeir uppí tré.

sumsé ekki raunverulegir karlmenn, heldur bara úrkynjuð grey.

það sorglega er, að þeir eru ört vaxandi kynstofn.
skyldu þeir fjölga sér með frumuskiptingu eða kannski knappskoti?

úreldar algildar staðreyndir

einu sinni trúði ég því að hverjum einasta manni þætti konan sín sú fallegasta í öllum heiminum. það var því ósköp einfalt fyrir karlmann að finna sér konu. einn góðan veðurdag sá hann þá fallegustu sem hann hafði nokkurn tímann séð, og þar með var það afgreitt.
það eru líklega svona 20 ár eða meira síðan þetta var eðlilegasta heimsmyndin fyrir mér.
eitt var sem betur fer rétt við þetta:
þá (fyrir 20) hafði hver og einn ólíkan smekk á því hvað er fallegt.
núna
hins vegar
er pínt oní okkur tilbúnum staðalímyndum um hvað er fallegt og hvað ekki.
og mér er tjáð að hvaða karlmaður sem er myndi yfirgefa óléttu konuna sína fyrir Britney Spears.
ég vil trúa því að maðurinn sem sagði þetta hafi of lélegt álit á eigin kyni og dæmi alla út frá sjálfum sér í þessum málum.
ég get hins vegar ekki annað en tekið eftir því hvernig smekkur okkar verður einsleitari með hverju árinu.
nema hvað!
þetta er 21. öldin, það er hægt að skipta um rasskinnar eins og nærbuxur. nú, loksins, getur ytra útlit okkar verið háð tískusveiflum!

og þar með er ég komin að hinum algilda sannleikanum sem er í þann veginn að verða úreldur: hef alltaf ætlað að ala börnin mín upp á hollum mat, og við mikla hreyfingu. ætlaði nefnilega að predika:

"Við verðum að fara vel með kroppinn, því við fáum bara eitt stykki og það verður að endast okkur alla ævi!"

en loksins þegar ég eignast börn (í síðasta lagi 2017) þá verður þetta að öllum líkindum ekki satt lengur.

púff!

hraðís-kassi

ísbúðin mín, í næstu götu, gerir besta ísinn. það er hægt að velja um gamla mjólkurísinn eða nýja rjómaísinn. báðir himneskir.
í kvöld fór ég þangað klukkan 22, til að ná mér í smá skammt af sjaldgæfu sukki
biðröðin náði útá götu, eins og svo oft í sumar
nú er hins vegar 28. september og ekkert hlýtt
ég beið í 30 mínútur eftir ís
það voru 6 eða 7 manns á undan mér
allir með þeyting
þeytingsfólk
eins og flestir íslendingar
tekur 5 mínútur að afgreiða hvern þeyting
tók innan við mínútu að afgreiða mig...

væri SVO til í svona hraðkassa í ísbúðum
fyrir þá sem vilja kaupa ís í brauði eða boxi

annað:
þeytingur er ekkert annað en dulbúið sælgæti
álíka mikið og 1/3 lítri af ís OG eitt súkkulaðistykki, jafnvel meira
sumsé, þeir sem fá sér þeyting eru að fá sér bæði ís OG nammi
það er samt ekki þess vegna sem ég er ekki þeytingskona.
mér finnst ísinn bara bestur eins og hann er, án frosins og harðs súkkulaðis

verði ykkur að góðu ;)

mánudagsógleði

í dag bý ég ein í stórum helli
það er erfitt að rata inní hann, því engum hefur tekist að finna opið
nema mér
ég er búin að mála myndir á suma veggina
það er reyndar svo mikið af veggjum að ég gæti málað áfram til eilífðarnóns
ef ég verð lokuð inni svo lengi
en til hvers að mála þegar enginn getur séð það?

áðan fór ég út til að mála fyrir heiminn
en þá kom hýena og át úr mér magann

tilvitnun dagsins

Spillti gamli karlinn: "If you're finished, this is the men's room!"
Sydney Bristow: "Who let you in?"

úje!

Konur sem lemja vondu karlana í klessu

seinir kanar...
einhvern tímann í kringum 1990 fékk ungur maður, sonur sterkrar móður, einkar framúrstefnulega hugmynd.
hann vildi taka sætu stelpuna í hryllingsmyndunum úr fórnarlambsstöðunni, og gera hana að aðalhetjunni.
klikkun?
í upphafi 10. áratugarins: já!
Kvikmyndaver sem ákvað að framleiða myndina hans gat ekki skilið hugmyndina öðruvísi en brandara. Hann var á undan sinni amerísku samtíð. Gekk út áður en myndinni var lokið, en engu að síður kom hún í kvikmyndahús árið 1992. Frekar þunn...

Spice
nokkrum árum síðar tóku 5 breskar stelpur sig saman og stofnuðu hljómsveit. engin þeirra var afburða hæfileikarík, falleg né mjó, en saman voru þær algjört æði, bókstaflega. þær urðu einfaldlega einhver frægasta hljómsveit í heimi fyrr og síðar.
og slagorðið var:

Girl Power!

og þar með hófst byltingin. allt í einu fannst engum asnalegt að stelpur væru hetjur eða flottar eða merkilegar.
eitt stykki sjónvarpsstöð hringdi í unga ameríska manninn, sem var þá reyndar orðinn rúmlega þrítugur, og bauð honum að endurlífga hugmyndina um ofurhetjustelpuna.
í kjölfarið komu 7 þáttaraðir af sjónvarpsþáttum sem gjörbreyttu viðmiðum í sjónvarpi og kvikmyndum. Þættirnir sameinuðu óborganlegan húmor við hrylling, spennu og átakanlegt mannlegt drama sem flestir geta samsamað sig við. Og að sjálfsögðu:
Ljóshærða sæta stelpan er hetjAN, aðal mesta flottasta og bestasta hetjan, og hún lemur karlkyns, kvenkyns og hvorugkyns vondu karla í klessu sjálf, og bjargar heiminum aftur og aftur. stundum nýtur hún reyndar aðstoðar bestu vinkonu sinnar, sem er alveg súperklár stelpa.
sumsé snilldin:

Buffy the Vampire Slayer

og nú kippir sér enginn lengur upp við að sjá gellur taka kung fu spörk hægri og vinstri. Þær sem eru mest áberandi þessa dagana eru:

• The Bride, aka. Black Mumba (meistaramorðingi úr Kill Bill)


• Sydney Bristow úr Alias (ok ekki kannski raunsæjustu þættir í heimi, en vá hvað er gaman að horfa á hana taka þessa gömlu spilltu karla í bakaríið)


• Fa Mulan sem bjargaði Kínaveldi frá vondu Húnunum.


• Charlies Angels (ok froða froða...)

nennti ekki að sjá Catwoman. búningurinn var blátt áfram niðurlægjandi!
það og sú staðreynd að aðalvondikarlinn var kona bendir til að höfundarnir hafi algjörlega misskilið hugtakið "Girl Power!" pppppffffffft

hugtakið
snýst að sjálfsögðu um að konur sigri karlmenn, en ekki aðrar konur. sannleikurinn er nefnilega sá að við þurfum allar að vera ofurhetjur til að komast áfram. mamma hafði því miður rétt fyrir sér. við erum enn að slást. þurfum enn að taka kung fu spörk hægri og vinstri.


sem betur fer er stríðið lengra komið hér heima og á Norðurlöndunum en annars staðar í heiminum. ástæðan? jú, við vorum einfaldlega nokkrum áratugum á undan. hér var það nefnilega kona nokkur sem fékk snilldarhugmynd. framúrstefnulega. frábæra. það sem meira var, hún setti hugmyndina í barnabók sem breytti heilli kynslóð. og kynslóðinni þar á eftir líka. hún bjó til mestu og flottustu og sterkustu ofurhetju allra tíma í líki rauðhærðrar stelpuskjátu í mislitum sokkum.

ojú, Lína Langsokkur er VÍST sterkasta ofurhetjan í öllum heiminum og hún myndi VÍST geta lamið Superman og alla hina DC og Marvel karlana í klessu, án þess að svitna!

og hananú!

opið bréf til hins eina sanna Davíðs

Elsku Davíð!

Ég veit að ég er engann veginn þess verðug að semja tónlist handa þér
en ég bara verð

þú átt orðin
ég skil

ég sem vildi óska að ég héti Dísa, á meðan blómin anga...
...en nú kemur bráðum vetrarnóttin og breiðir hlýju vængina sína yfir mig
og þig

engin íslensk kona sem hefur kynnst þér er ósnortin.
hvernig getur karlmaður skilið konu á þennan hátt?
lífið, ástina, sorgina. allt.
þú ert ómótstæðilegur!

svo þú skilur, að ég bara verð fá að dýfa lúkunum í brunninn þinn
djúpa

að minnsta kosti einu sinni

náðarsamlegast

Dagbjört dís Jónsdóttir

p.s. krummi gamli er svartur, og krummi er fuglinn minn

Og enn er verkfall

Skil ekki alveg þessi nútíma verkföll. Finnst þau ekki bera neinn árangur. Bara skaða. Skaða nám barnanna. Skaða ímynd kennara.
Skil ekki af hverju þarf að leggja menntakerfið á hliðina í 6 vikur + til áður en hægt er að ná samningum. Af hverju er ekki bara hægt að gera sömu samninga strax? Getum við ekki bara farið í pínu ímyndunarleik og þóst vera komin ca. 8 vikur fram í tímann, og gert okkur í hugarlund hver niðurstaðan yrði. Sest svo niður og skrifað undir. Og sjá! skóli á morgun!
Nei! nei! nei!
Það má ekki semja við kennara! Þá kemur nebblilega verðbólga. Ef kennarar fá launahækkun þá vilja allir launahækkun. ppppppffffffffffft!
Getum við þá ekki bara kallað þetta launaleiðréttingu? Það er eins og allir séu orðnir svo vanir að kennarar séu láglaunastétt, að þeir mega ekki fá það sem þeim ber í samræmi við sína menntun. Þetta er nú meira ruglið!
Getum við ekki bara búið til einfalda launaformúlu sem allir eru sáttir við?

Dæmi:
Lágmarkslaun ómenntaðra: 100.000 kr (þessi tala er notuð til einföldunar)
Fyrir hvert ár í Háskóla: 50% af lágmarkslaunum bætist við.
Fyrir hvert ár af reynslu: 20% af lágmarkslaunum bætist við.
Fyrir hvert æviár: Ekki króna bætist við því fólki er ekki mismunað eftir aldri

Þetta er bara dæmi um formúlu. Semja má um hvaða tölur eru hvar. En samkvæmt þessum tölum væru byrjunarlaun kennara 300.000 krónur. Helmingur þjóðarinnar er með yfir 300.000 (skv. síðustu skatttölum) - er ekki eðlilegt að kennarar séu í þeim hópi?
Reiknum áfram: Byrjunarlaun unglækna væru 400.000 kr, tölvunarfræðinga 250.000 kr, verkfræðinga 350.000 kr og svo framvegis.

Og svo ekkert múður. Bara sátt.

Guði sé lof fyrir íslenska karlmenn

Án þeirra væri ég löngu dauð úr pirringi.
Ég er ekki að segja að ALLIR útlenskir karlmenn séu óþolandi fordómafull karlrembusvín, en af 8 erlendum gestum okkar í gærkvöldi voru 3 sem gátu fordóma sinna vegna ekki orða bundist, og þar af einn á alveg einstaklega ógeðfelldan hátt.
"Þú fallega kona! Ekki þú gáfuð! Af hverju þú vinna hjá hátæknifyrirtæki? Þú ritari? Þú dansa við mig!" (lesist með tilheyrandi káfi)
Gubb gubb gubb!!!

Kona er orðin svo góðu vön að búa á Íslandi, þar sem svona karlmenn eru svo til útdauðir (hef heyrt orðróm um einn, en hann er óstaðfestur). Kona heldur bara að þessi viðurstyggilega tegund manna hljóti að vera útdauð í öllum heiminum. Svo hittir kona útlendinga:
"Jújú, konur fara alveg í háskóla! En þær fara þá í fög eins og sálfræði o.s.frv."
(Ekki að ég hafi neitt á móti sálfræði. Við erum bara að tala um fordóma.)

Í dag langar mig að taka alla útlenska karlmenn, tjóðra þá við vegg, skvetta framan í þá ísköldu vatni og halda yfir þeim langa reiða ræðu.

Hingað til hafa rökin verið:
"Ef allar fallegar konur væru heimskar, þá væru allar íslenskar konur heimskar, en þær eru einmitt flestar bráðgáfaðar, sjálfstæðar og glæsilegar!"
og
"Ef allar ljóshærðar konur eru heimskar, hvernig geta þá Norðurlöndin verið fremst menntaðra og tæknivæddra þjóða og líka lengst komin í jafnréttisbaráttunni!"

þetta eru greinilega ekki nógu sterk rök, því þeir kinka bara kolli og bjóða manni að dansa. Ggghhhhhhhkkkkk

Næst ælta ég að reyna:
"Var/er mamma þín falleg?"
svarið hlýtur að vera jákvætt, því allar mömmur eru fallegar.
"Var/er mamma þín heimsk?"

Point proven!

Hamingjunni, guði, Jesú, ásum og öllum góðum vættum sé lof fyrir íslenska karlmenn.
Ef einhver slíkur les þetta:

*knús knús knús og kossar* fyrir að vera til

stólasvissið

Sá endann á viðtali við nýskipaðan forsætisráðherra í kastljósi. Þegar ég kveikti var hann að segjast myndu nú verða að leiða ríkisstjórnina með hagsmuni Framsóknarflokksins að leiðarljósi en líka... eitthvað um Sjálfstæðisflokkinn.
Voðalega hlýt ég að vera bláeygð. Ég hélt nefnilega að forsætisráðherra hefði alltaf hagsmuni þjóðarinnar að leiðarljósi. Kjánalega ég.
Hvaða, hvaða! Ég heyrði bara þessa einu tvær línur. Er viss um að ég missti af öllum frábæru hlutunum sem hann sagði um hvað hann ætlaði að gera okkur til góðs. Lækka skatta og fleira. jibbí!
Bind miklar vonir við Davíð í utanríkisráðuneytinu. Hann er röskur og skynsamur og hefur ekki gaman af að spreða í alls konar vitleysu. Er því vel treystandi til að skera all svakalega niður í utanríkisþjónustunni. jibbí!

Greinin VAR í mogganum

Á laugardaginn var, 11. september.

og hananú!

afmælislexían

Eitt sem ég hef lært í gegnum tíðina:

Það er ekki sanngjarnt að ætlast til þess að fólk muni eftir afmælinu þínu.
Ástæðan:
Það er ekki það, að fólk muni ekki hvaða dag þú átt afmæli. Það bara áttar sig ekki á því hvaða dagur er akkúrat í dag. Þess vegna er mjög ósanngjarnt að fara í einhverja fýlu.
Lausn:
Segðu fólki frá því að þú eigir afmæli, þ.e.a.s. ef þú vilt fá afmælisathygli. Eftirfarandi virkar alltaf vel:
- Setja "ég á afmæli" inní msn-nafnið þitt
- Klæða þig extra mikið uppá
- Segja fólki einfaldlega frá því, annað hvort beint eða með því að lauma því inn í samræður:
"Finnst þér ekki töff peysan sem ég fékk í afmælisgjöf í morgun?"

Eitt sem ég lærði núna á fimmtudaginn:

Rauður varalitur býr yfir einhvers konar töframætti!
Tók mér alveg extra langan tíma til að dekra við mig um morguninn. Gerði hárið fínt og málaði mig pínku (sem ég geri yfirleitt ekki svona dags daglega). Vegna þess að ég fékk rauða peysu frá storesös, þá setti ég á mig rauðan varalit í stíl. Og viti menn! Það fór sko ekki fram hjá neinum að ég átti afmæli! Meira að segja strákarnir í vinnunni sem taka aldrei eftir neinu svona (yndislegir tölvukallar sem gæti ekki verið meira sama um hvernig maður er til fara), tóku eftir rauða varalitnum!
"Hvað kemur til?"
"Ég á afmæli!"

Úúúúúje!
Fékk svo mikla afmælisathygli að allri athyglisþörfinni er svalað næsta árið.

eða svona nokkurn veginn...

Uppskeran þetta árið var:

- Æðislega töff rauð hettupeysa frá storesös og co.
- voða sætt blátt hálsmen frá storesös og co.
- diskurinn með Iskoret frá manninum hennar storesös og co.
- bókin "The Fabulous Girl's Guide to Life" frá ze beib Fritz
- ilmandi gott bodysprey frá minni heittelskuðu ektakvinnu sem meira að segja eldaði handa mér ljúffengan kvöldverð :)
- grúví plat plat blóm (já sumsé ekta blóm sem lítur út fyrir að vera plat) frá m&p
- voða sætur vasi undir platplatblómið frá m&p
- fullt fullt af knúsum, kossum og hamingjuóskum - munnlegum, sms-uðum og msn-uðum
- og fullt fullt af athygli :)

svo fæ ég skrifborðsstól á morgun frá m&p til að koma í veg fyrir að ég eyðileggi í mér bakið við allar tónsmíðarnar :)

EN

auk þessa er ég nýbúin að fá fullt af flottum innflutningsgjöfum:
- Tröllakúst (er til meira töff nafn á blóm?) frá SJH, sem lifir góðu lífi í stofunni
- Ilmandi bleikar rósir í potti frá tröllakóngi og co, sem bara hætta ekki að blómstra :)
- Gustav Klimt mynd - mmmmmmmm - sem núna hangir yfir rúminu mínu, frá mein Onkel og co. (þmt Önnu2 en meira um það síðar)

hmmm, það sem ég vildi sumsé segja með þessu bloggi er:

!!!TAKK FYRIR MIG!!!

Afmælisbarn dagsins

er ég
af því tilefni verður vígt nýtt júmbókrullujárn
ný peysa frá storesöster

svo verður sólskinsbrosið á extra mikilli orku

það verður ekkert partý þetta árið - líklegast ekki fyrr en eftir 3 ár...

knús og kossar til allra sem eru búnir að senda mér SMS eða MSN kveðjur

:D

á morgun

á morgun hlýtur greinin eftir mig að birtast í mogganum
af hverju?
jú, á morgun verð ég 27 ára gömul
búin að lifa 1/3 af þeirri ævi sem ég get búist við að náttúran hafi úthlutað mér
(þeim sem finnst þetta hljóma fáránlega vil ég benda á að 3x27 eru 81)
þar með er viðeigandi
að á þeim sama degi
taki ég formlega skrefið útí hinn fullorðna heim
orða og ábyrgðar

fullorðin
hamingjunni sé lof að ég er ég
og ég veit
að maður þarf ekki að vera leiðinlegur
þó maður sé fullorðinn

ekki að ég trúi því að maður verði nokkurn tímann fullorðinn.
það felst nefnilega í orðinu.
orðinn að fullu
að fullu orðinn
orðinn hvað?
það sem maður getur orðið
nei takk. ekki ég
ég ætla að halda áfram að verða meira og fleira
þangað til ég hætti að vera yfirleitt

og hananú!

eitthvað sem ég setti saman í vor, nánar tiltekið annan dag sumars

lokaðu augunum
veröld

þú skalt liggja og
dreyma
ljósið sólina sönginn dansinn hláturinn hoppið skoppið kítlið
hana

þú skalt aldrei vakna
veröld
sofðu sofðu sofðu
rótt

aldrei
því þar er
sólin stingandi grimm
vorið trillt af bræði
nóttin þessi tilfinning í yðrum þínum sem þú óttast mest
hún farin

muh

komin heim
manic monday
dauð dauð dauð í þriðja veldi
það fáránlega er
vann bara samtals 4 tíma í dag
í skólanum rúma 2 tíma
öll restin af deginum
fór í að redda einni
lítilli
ljótri
mynd
af smettinu á mér
í réttri stærð
fyrir moggan

muh!

sofa núna

Fram á ritvöllinn

Úff!!!

Ég var að senda inn grein í Moggann! Ég! Hér með orðin ábyrgðarfull og nokkurn vegin fullorðin kona með skoðanir sem sendir ráðamönnum tóninn. Hananú!

míííííííík!

:D

Samsæri

Hef komist á snoðir um víðtækt og gríðarlega vel skipulagt samsæri. Nei, ekki kirkjunnar eða ríkisstjórnarinnar eða Kananna eða Norsaranna. Það mega aðrir sjá um að afhjúpa slík. Þetta samsæri er hvorki meira né minna en samsæri heillar kynslóðar gegn annarri.

Þannig var mál með vexti að þegar 68 kynslóðin var að byggja sér hús þá höfðu þau ákaflega miklar áhyggjur af því að börnin þeirra myndu aldrei kynnast þeim þrældómi og púli sem fylgir því að koma sér þak yfir höfuðið. Hugsið ykkur ef blessuð börnin gætu bara keypt sér tilbúið hús, málað og flutt inn! Nei, slíkt myndi algjörlega útrýma hinum mikilvægu vinnugildum (work ethic). Til að sporna við þessum framtíðarhörmungum datt einhverjum af 68 kynslóðinni snjallræði í hug:

VEGGFÓÐUR! Því maður málar ekki bara yfir það...
...en þau gætu rifið það aftur af! Hmmm, þá þurfum við að finna upp:

VATNSHELT VEGGFÓÐUR!!! Þú getur ekki bleytt límið, svo þú nærð því ekki af!

Snilld! Hvert parið á fætur öðru tók sig til og límdi skelfilega munstrað, vantshelt veggfóður upp um alla veggi, svo aumingja börnin þeirra, sem enn grunaði ekkert um sína dökku framtíð, fengu engu að síður martraðir um skrímslin sem þau gátu séð útúr skræpóttu mynstrinu.

Svo urðu börnin eldri. Fóru að glápa á sjónvarp í jafnvel heilan klukkutíma á dag. Ábyrgðalausa þætti eins og Prúðuleikarana og Dallas. 68 kynslóðin fór að velta því fyrir sér hvort bragðið myndi nokkuð duga. Eftir miklar pælingar komust samsærismennirnir og konurnar að einu rökréttu niðurstöðunni:

ANNAÐ LAG af VATNSHELDU VEGGFÓÐRI, YFIR HITT!!!

Og þar með var það tryggt, að fólk af okkar kynslóð fengi skilið hversu stórt og mikið mál það er að koma sér þaki yfir höfuðið. Vei þeim, illu vættum fortíðarinnar sem fundu upp veggfóður!

Jamm. Sumsé, af síðustu 5 dögum í Norge fóru:
4 í að ná tvöföldu vatnsheldu veggfóðri af veggjunum í höllinni
1 í að mála (loksins í dag!)
á morgun fæ ég svo að bera nokkra kassa... áður en ég flýg heim.

geisp!

heyrnarlausar hendur

muh!
hendurnar mínar eru orðnar heyrnarlausar! þær heyra ekki í mér þegar ég segi þeim að gera eitthvað. setja mat í munninn, greiða hárið! Þær bara hreyfast ekki!
Eða kannski bara neita þær að hlusta á mig. Já kannski eru þær bara í fýlu við mig af því að ég neitaði að hlusta á þær í dag þegar þær voru að væla í mér. nenni ekki að hlusta á eitthvað handavæl.
"hættu, hættu, okkur er íllt!"
"ái, ái, ái! við erum svo þreyttar"
"nei ekki meira svona, þetta er vont"
hverjum er ekki sama hvað einhverjar hendur segja?
ég meina, voru þær ekki einmitt búnar til til að hlýða skipunum og vinna?
svo fara þær bara að væla við minnstu notkun eða hnjask!
þvílíkir aumingjar! Liggur við að maður taki þær bara af og hendi í ruslið. Ef maður gæti nú keypt sér nýjar...
en heilinn á mér er sko miklu stærri og sterkari en þær. hann sem stjórnar! þess vegna kemur ennþá tttttttteeeeeeexxxxxxxti