13 desember 2005

jólalagið komið

Mín jól heitir það og það má finna það hér

þetta er bara voða svona lítið og sætt, svo líklega fáið þið bara venjuleg kort og svo megið þig hlusta á þetta héðan eins mikið og ykkur langar.

en ef einhvern langar sérstaklega í disk, þá er auðvitað hægt að koma því til leiðar ;)

njótið vel

:Dagbjört jóladís

p.s. ef þið náðuð því ekki þá er lagið hér

p.p.s þúsund þakkir Hr. Muzak fyrir að lána mér þennan frábæra mike

p.p.p.s. takk yndislegasti Andrésinn minn fyrir innblásturinn ;)

10 desember 2005

einhverskonar jólatexti

þá er ég komin með smá textamynd fyrir jólalagið
allar ábendingar vel þegnar
(nema hvað ég veit vel að brott og nótt og kjöt og naut ríma ekki, þetta kallast hálfrím):

Þó öll fönnin fjúki brott
falli regn á jólanótt
ofsaveður öskri ljótt
ef að þú ert hjá mér
held ég mín jól

Hvort sem ég fæ hangið kjöt
holdagrísi, kalkún, naut
eða bara mjólk og graut
ef að þú ert hjá mér
held ég mín jól

ég þarf ekki nýjan kjól
ég þarf hvorki snjó né sól
þú ert allt mitt ljós og skjól
og ef þú ert hjá mér
ég held mín jól

Ég þarf enga pakka' að fá
hvorki í bók né spil að spá
verðir þú mér ætíð hjá
er það besta gjöfin
öll mín ævijól

nú er bara málið að finna nógu gott nafn á lagið...
einhverjar hugmyndir?

:D

09 desember 2005

Viðutan stússisti

stundum getur kona verið svo utan við sig...

ég breytti byrjuninni á Tunglsgeislanum (synkópunni) en gleymdi svo að breyta sama stað í 2. og 3. erindi. því fór svo að Hanna Þóra söng upphaflegu synkópuna (2x5 fjórðupartar) alls staðar, og því er lagið nú aftur orðið eins og það var upphaflega.

jamm, Tunglsgeislinn hefur nú loksins verið frumfluttur, og vá hvað Hanna Þóra gerði það yndislega vel! Röddin hennar er eins og glitrandi tunglsgeisli, enda samdi ég lagið fyrir hana.
það eru svo frábær forréttindi að fá að semja fyrir ákveðna söngvara. engar tvær raddir eru eins og það er svo gaman að hugsa hvert lag útfrá viðkomandi rödd. þetta er svo einstakt og yndislegt hljóðfæri.
svo hefur röddin líka svo sterk áhrif á okkur mannfólkið

annars er það af desemberstússinu að frétta að lagvinnslan gengur bara svona þokkalega. það hefur verið mikið að gera í vinnunni undanfarið, svo skólinn hefur etv. ekki fengið alla þá athygli sem ég hefði viljað, en það er próf í næstu viku og ég ætla að nota tækifærið og reyna að tjasla saman einu jólalagi í Reason, sem nokkurs konar undirbúningi.
jamm, loksins komin með Reason, og því ekki seinna vænna að taka góðan slurk í að reyna að læra á það.
Hr. Muzak var svo sætur að lána mér almennilegan mike, og lagið samdi ég einhvern morguninn fyrir skömmu, í nett þjóðlegum fílíng
útsetningin á að vera voða einföld, með hæfilegu magni af Reason fikti, gaman gaman!
það eina sem vantar er textinn!

púff, ég geri svo miklar kröfur til íslenskra texta að ég get ómögulega staðið undir þeim sjálf :(
kannski ég leiti bara að einhverju gömlu og góðu...

eða kannski ég vaki fram á nótt í nótt við að textast
oftast er það best...

bleah

annars ekkert jólastress
ég þarf bara að kaupa 3 gjafir áður en ég fer út, og ég veit svona nokkurn veginn hvað þær eiga að vera :)
svo verður restin versluð í Köben eða Malmö, allt eftir því hvað við skötuhjúin komumst yfir

var ég búin að segja ykkur að ég fer til Köben 16. des
og í jólafrúkost 17. des
(jólafrúkostur er dönsk matarveisla sem stendur frá um 11 á morgnanna og fram yfir miðnætti)
og svo til Norge með næturlestinni 22. des
og ég er ekki búin að kaupa miðana heim
hvorki frá Norge til Köben
né frá Köben til Íslands

það bíður betri tíma og meiri upplýsinga
frá lestarfélagi og skóla :þ

jæja, nóg blaður í bili
vonandi hef ég tíma um helgina til að uppfæra Tunglsgeislann til baka
náðarsamlegast hlustið hvorki á hann né prentið þangað til

ykkar dísulísuskvísa

:Dagbjört

05 desember 2005

Draumajól

ímyndið ykkur risastórt timburhús á tveimur hæðum sem stendur í brattri hlíð í ævintýralandi.
allt er á kafi í snjó og útsýnið er stórfenglegt, yfir snæviþakin fjöll og ísilögð vötn.
það er Þorláksmessumorgunn og næstum allir eru komnir
2 afar
1 amma
2 pabbar
2 mömmur
5 börn á aldrinum 0 - 9 ára

útidyrnar opnast og inn gægist ungt og ástfangið par
frænkan og ævintýraprinsinn hennar
þeim er auðvitað báðum tekið fagnandi, og fá eitthvað gott í svanginn áður en þau drífa sig út í gríðarmiklar snjóhúsaframkvæmdir ;)
svo er auðvitað örlítið stússast í eldhúsinu, enda þarf að grafa lax, gera ís og ananasbúðing og sjóða hangikjötið - mmmmmmmmmmmmmmmmmmmmmmmmmmmmm :)

á aðfangadagsmorgun fara allir í sund og hamast og busla um og verða tandurtandurhreinir
svo er farið heim í graut :)
einhvern veginn reynum við svo að stytta börnunum stundirnar, en borðum samt frekar snemma svo þau verði ekki orðin alveg uppgefin greyin
eitthvað verður erfitt að koma fyrir pökkum handa 14 manns...
...en allir fá þá eitthvað fallegt
og að minnsta kosti eina bók ;)

á jóladag búa frænkan og amman til alvöru heitt súkkulaði (úr íslensku suðusúkkulaði) og allir gæða sér á heimabökuðu brauði og smákökum í brunch, ennþá í náttfötunum
svo er slakað á allan daginn, lesið, spilað á spil, farið út ef veðrið er gott, borðað hangikjöt og já, slakað á...
og allir eru saman
allir!
mamma, pabbi, storesös og allir hennar, storebror og öll hans, ég OG Andrés!

*ljóm*

ég vona bara að ég vakni ekki einn góðan veðurdag og komist að því að mig sé barasta að dreyma...

hlakkihlakkihlakkihlakk

22 nóvember 2005

bara svona smá draumórar

í dag spurði ég Andrés hvort við gætum haft eplatré í garðinum
svona eins og í ævintýrunum
hann stakk uppá því að við flyttum á lítinn sveitabæ í Jótlandi
mmmmmmm
með eplatrjám og perutrjám
og fullt af útivistarsvæði
samt allt svo flatt að kona fer allra sinna ferða hjólandi

sé þetta alveg fyrir mér
semja, spila á hljóðfærin
vinna stundum
leika við fullt af ljóshærðum sprækum börnum
úti og inni
týna epli og perur og ýmislegt fleira og borða beint af tránum

svo myndi kona þurfa (og vilja) taka á sig nokkrar bóndakonuskyldur
svo sem að búa til skyr
og baka flatbrauð
og venjulegt brauð
og kanelsnúða
og einstaka sinnum kleinur og kókosbollur með aðstoð krakkanna

já, maður tengir jú mikið af góðu bakkelsi við sveitina

jamm, og hver veit nema við fengjum okkur hund þegar elstu börnin væru orðin nógu stór...


annars er það af raunveruleikanum að frétta að lagið sem ég er að vinna í fyrir skólann þokast áfram smátt og smátt
ég hef svo mikið að gera að ég fæ næstum samviskubit þegar ég stelst til að tala við Andres (en ég stelst nú samt ;)
þessi vika verður ansi strembin, en það er allt í lagi, því ég fæ svo æðisleg verðlaun í vikulokin...

...loksins loksins loksins er það Köben um helgina!

:D

12 nóvember 2005

nóvember og píanó

nóvember kom og allt í einu var allt komið á fullt.
ég skil ekki alveg hvernig það gerðist, en einhverra hluta vegna grunar mig að þetta hafi alltaf verið svona. þ.e.a.s. að nóvember hafi alltaf verið svona.

nóvember er mánuður vina minna, því stór hluti af mínu uppáhaldsfólki á afmæli í nóvember. nóvember er líka mánuðurinn þar sem allir eru að reyna að klára allt fyrir desember. mánuðurinn þegar allir vilja hittast til að lýsa upp skammdegið. já nóvember er skemmtilegur mánuður, en það er ekki mikill tími til að blogga ;)

stundum á ég að vera á 2 eða 3 stöðum á sama tíma og flestar vikur enda á því að ég hafi einhverra hluta vegna ekki fengið fullan svefn. en þetta er auðvitað allt saman svo skemmtilegt að það eina sem ég get kvartað undan er að hafa ekki nægan tíma til að setjast fyrir framan píanóið mitt og fá andann yfir mig. Nóg er nú af lögum sem ég þarf að klára...

já píanó píanó píanó
loksins píanó!
í sumar var ég búin að ákveða að steypa mér í 2ggja ára skuldabréf uppá 800 kílókrónur til að eignast virkilega gott píanó.
svo varð ég ástfangin og ákvað að 2ggja ára skuldbindingar á Íslandi væru bara alls ekki sniðugar. en mig vantaði píanó.
svo það varð úr að mamma lánaði mér gamla píanóið mitt sem við höfum annars gert óskrifaðan (og ómæltan) samning um að verði alltaf hjá henni. það er sumsé núna komið tímabundið til mín, og ég reyni að láta það duga, þó áslátturinn sé það stífur að stílbrigði eins og tremolo og píanissímó eru forréttindi sem ég fæ ekki að njóta.
það er samt svo óendanlega betra en ekki neitt, og yndislegt að geta sest við það og glamrað og glamrað upp úr mér í ró og næði.

reyndar fer ég bráðum að halda að ró og næði séu einhvers konar goðsögn. trúið þið að þau séu til í raun og veru?

26 október 2005

norrænir karlmenn, femínismi og fleira



1. hluti: norrænir karlmenn og störf...
af gefnu tilefni langar mig að bæta örlitlu við gamalt blogg um íslenska karlmenn
mig langar að bæta því við að aðrir norrænir karlmenn eru að öllum líkindum alveg jafn yndislegir og þeir íslensku og á vissan hátt hafa þeir það betra skinnin, því í þeirra samfélagi er ekki ætlast til þess að þeir verði LLVV (læknar, lögfræðingar, verkfræðingar eða viðskiptafræðingar). þeir mega vinna á leikskólum og öldrunarheimilum og bara þar sem þeir vilja, og þeir gera það, hugsanlega líka vegna þess að þessi störf eru, að mér skilst, betur borguð og meira metin þar en hér (amk í DK).

einn í vinnunni minni var að benda á að börn gætu alist upp í dag án þess að eiga nein samskipti við fullorðna karlmenn. enginn pabbi á heimilinu. enginn karlkyns leikskólakennari. enginn karlkyns grunnskólakennari.
hljómar skelfilega í mínum huga!
haldiði ekki að íslenskir strákar myndu frekar vinna þessi störf ef þau væru betur borguð?

en hvað er til ráða?
í hvert skipti sem einhverjum dettur í hug að laga þetta og hækkar t.d. laun leikskólakennara, þá verður allt vitaust í næstu kjarasamningum því þá heimta allir samsvarandi launahækkun. þjóðfélagið er bara komið með það á fast að þetta sé láglaunastarf og aðrar stéttir taka ekki til greina að vera með lægri laun...

að þessu leyti get ég því verið sammála femínistanum sem heimtaði byltingu á mánudaginn. það þarf byltingu í því hvernig við mælum laun starfsstéttanna. nýjan mælikvarða. ekki bara fyrir konur, því karlmenn eiga jú líka að eiga þessi efnahagslegan kost á því að vinna við þau störf sem þeir vilja.

ekki að ég sé alveg kommi, en hér er ein skemmtileg pæling: ef öll störf væru jafn vel launuð, við hvað myndir þú vilja vinna?

2. hluti: er ég femínisti?
Andrés þykist hafa komist að því að ég sé í eldrauðum sokkum. líklega vegna þess að ég á það til að tala um sumt af þónokkri ákefð. kannski er ég að töluverðu leyti einhvers konar nýfemínisti, en ég er þó ekki til í að skrá mig í femínistafélagið. eins og ég hef margoft sagt þá er ég bara alls ekki sammála öllu sem þau gera þar. er ekki mikið fyrir öfgar og vanhugsaðar upphrópanir í fjölmiðlum. ég trúi því samt statt og stöðugt að þó það séu alltaf nokkrar sem skemmi fyrir hópnum, þá hati fæstir femínistar karlmenn.
ég er allavega alls ekki þannig femínisti, en hver getur líka hatað karlmenn sem þekkir annan hvern mann á þessum lista ;)

það sem ber samt líklega mest í milli, er hvað ég er ósammála þeim femínistum/jafnaðarmönnum sem virðast hafa misskilið orðið jafn og halda að það þýði eins. í mínum huga eru þetta tvö gerólík orð. mér finnst allt í lagi að viðurkenna að fólk sé ólíkt. að kynin hafi einhverja náttúrulega ólíka eiginleika. (t.d. er bara alls ekki hægt að neita því að karlmenn séu yfirleitt líkamlega sterkari). fólk er líka ólíkt. en engu að síður trúi ég því að það eigi að meta þessa ólíku eiginleika að jöfnu. einn er góður í stærðfræði, annar í mannlegum samskiptum. er annar mikilvægari eða merkilegri en hinn?
við þurfum ekki að vera eins til að vera jöfn. þess háttar misskilningur varð til þess að skapa misheppnaða meðaljóna skólakerfið sem ég ólst upp við og varð til þess að börn sem voru á eftir eða á undan voru einfaldlega utanveltu í skóla. þið munið líklega öll eftir þessu.
það má samt meta ólíka verðleika okkar að jöfnu. já takk :)

og ef ég er eitthvað, þá er ég jafnvægissinni
ég vil jafnvægi á milli þess kvenlæga og þess karllæga
þess náttúrulega og þess tæknilega
þess mannlega og þess hagfræðilega
þess listræna og þess vísindalega
en nú er notkun mín á "þess" komin verulega úr jafnvægi...


jæja, nóg af blaðri.
kannski ég geti sett saman texta fyrir eitt stykki lag í kvöld - fyrir skólann

góða nótt fólk

:Dísulísuskvísan

25 október 2005

nýr Tunglsgeisli

ég breytti stóru synkópunni í Tunglsgeislanum, og telst það núna "upprunalega" útgáfan, þar sem lagið verður frumflutt þannig, vonandi þann 6. des :)
ég vil biðja þá sem hafa prentað út gamla útgáfu af laginu að fá sér nýja. Hér er a moll og hér er f moll, en öll tilbúnu lögin mín má finna hér á síðunni.

málið var að þessi synkópa var bara aldrei rétt. núna er fyrri nótan 3 hálfnótur og hin 2 hálfnótur. ef einhver var búinn að hafa mikið fyrir að reyna að læra þetta hinsegin, ja þá skilur viðkomandi líklega af hverju breytingin var gerð og fyrirgefur mér, enda ekki búið að flytja lagið ennþá :þ

vonandi kemst ég svo til að redda píanói í þessari viku eða um helgina, því ég er alveg að deyja úr píanóþörf fyrir lagið hennar Rannveigar ;)

*knús og kossar*

:Dagbjört

23 október 2005

kærustuskyldur

ég var eitthvað að minnast á raunveruleikastilli
raunveruleikastillir er það sem gerir konu kleift að aðlagast að breyttum aðstæðum
t.d. að flytja á milli landa

minn hefur yfirleitt staðið sig mjög vel
jafnvel stundum of vel, þannig að ég á það til að minna á skógarnornirnar í Ronju:
"sést ekki, er ekki"
þegar ég kemst í frí þá gleymi ég vinnunni
þegar ég skipti um land þá hætti ég að velta mér uppúr því sem er heima
osfrv.

undanfarið hefur mesta aðlögunin verið (fyrir utan nýja íbúð, nýja vinnu og nýjan skóla) að flakka á milli yndislegu Köben, þar sem ég á alvörukærasta, og Íslands, þar sem ég á netkærasta
stundum pínu ringlandi, og það þarf ekki snilling til að fatta hvort er betra ástand ;)

svo allt í einu átti ég alvörukærasta á Íslandi í heila 10 daga
vá!
fyrsta daginn kom hann og sótti mig í vinnuna og við keyptum saman í matinn fyrir sumarbústaðarferð helgarinnar
það hefur aldrei verið jafn gaman í Bónus :)
svo fórum við í sumarbústaðinn og hjúfruðum okkur hvort upp að öðru á meðan eitt stykki íslenskur stormur lét öllum illum látum fyrir utan
kíktum í sund, þegar storminum linnti
elduðum rómó, spiluðum scrabble og fundum upp nýyrði :þ
allt voða kósí og á sunnudeginum löbbuðum við uppá Miðfell áður en við brunuðum í bæinn til að mæta í mat til mömmu...

svo kom mánudagur og þriðjudagur með minni vinnu og mínum skóla og mínum hversdagsleika, en þá var allt í einu karlmaður í hversleikanum mínum, sem keyrði mig og sótti í skólann og spurði "hvað eigum við að hafa í matinn?"
þá fór raunveruleikastillirinn minn að hökta svolítið
ég að pæla í kvöldmat 2 daga í röð???
ekki að ég þyrfti að elda samt, því hann er svaka klár í eldhúsinu og finnst það líka meiriháttar gaman
ég fékk bara nett svona "vá þessi pakki!" tilfinningu
litla sjálfstæðislega ofdekraða ég

en stillirinn hökti svo aftur í gírinn og á miðvikudagskvöldið fórum við að hitta vini hans Andrésar á kaffihúsi. Ég plataði þá á Rósenberg þar sem Svabbi var að trúbast af svo mikilli snilld og innlifun og þvílíkri raddfærni að ég held að vinirnir haldi að það sé frekar lítið á milli eyrnanna á mér.
ég bara gat ekki haldið mig inní samræðunum, því ég þurfti svo mikið að hlusta á Svabba. vá hvað hann var góður! Andrési fannst það líka :)
vona samt að ég hafi ekki staðið mig of illa í þessum kærustuskyldum ;)

á föstudaginn var ég í fríi og við sváfum svo til allan daginn
fyrir utan eitt stykki sundferð, nema hvað!

á laugardaginn hins vegar, var kominn tími á að bæta upp fyrir alla vikuna, og dagurinn var súperskipulagður í að hitta fólk.
svo mín fór í kærustugírinn og sinnti sínum skyldum, sem reyndar voru alls ekki slæmar, enda fólkið hans Andrésar allt frekar létt og hresst :)

enduðum kvöldið hjá koninu mínu sem, eftir ísát og spjall, gaf góðfúslegt samþykki fyrir áframhaldandi sambandi mínu við myndarlega Danann (það var líka hún sem byrjaði á þessari Danadýrkun sem virðist vera að smitast í hálfa íslensku kvenþjóðina ;)

samantekt yfir þessa 9 daga:
við fórum 3svar í sund
1 sinni í stutta fjallgöngu
3svar til mömmu hans
2svar til mömmu minnar
borðuðum 6 sinnum lambakjöt
og 7 sinnum ís
elduðum saman 5 sinnum
hittum fullt af fólki
horfðum á 2 myndir
og kúrðum mest

og núna þarf blessaði raunveruleikastillirinn minn að byrja á því á morgun að venja mig við að koma heim í tóma íbúð glorhungraða, með engan sem hlakkar til að elda með mér

og einu kærustuskyldurnar sem ég þarf að sinna er að passa mig að muna hvernig allir líta út, ef ég skyldi nú rekast á einhvern í Bónus :þ

bloggfrí

jamm

stóð nú svosem ekki til að fara í svona bloggfrí án þess að láta vita
þegar ég blogga ekki í lengri tíma er það annað hvort vegna þess að ég hef svo svakalega mikið að gera, eða að allt gangi á afturfótunum og ég bara meiki ekki að vera eitthvað að kvarta :þ

í þetta skiptið var það kærastinn sem kom í heimsókn til mín í heila 10 daga
og dagana þar rétt á undan var ég á fullu að gera allt sem varð að klára áður en hann kom ;)
meira um heimsóknina seinna

ég er allavega á lífi og líður að mestu leiti voða vel, nema hvað raunveruleikaskiptirinn minn er undir alveg gríðarlegu álagi
eftir að hafa allt í einu þurft að aðlaga sig að því að eiga mann sem beið heima á hverjum degi eftir vinnu og skóla, þá þarf núna að aðlagast því að hann sé farinn :s

jæja, best að fóðra aðeins líkama og sál

meira seinna

:D

07 október 2005

Strengir

mig langar svo á fantasíumyndina Strengi á laugardagskvöldið klukkan 20

Strengir er óvenjuleg, dramatísk og spennandi fantasíumynd fyrir börn og fullorðna. Við fyrstu sýn virðist Strengir vera hefðbundin ævintýramynd, en er frábrugðin að því leyti að allar sögupersón-urnar eru strengjabrúður. Allir strengir eru sýnilegir og gegna mikilvægu hlutverki í sögunni, t.d. er strengjabrúða drepin með því að klippa á “höfuð” strenginn. Þetta er fyrsta myndin í fullri lengd sem er gerð um strengjabrúður, og var fjögur ár í vinnslu. Myndin er um konungssoninn Hal Tara sem leggur upp í ferðalag til að hefna dauða föður síns. Á leið sinni lærir hann margt um fólkið sitt og finnur ástina þar sem hann á síst von á henni. Sagan segir frá ótrúlegu ævintýri Hal Tara, hugrekkinu, hættunum sem bíða hans, ástinni, hatrinu, og örlögum hans. Strengir hefur verið tilnefnd til fjölda verðlauna og hlaut meðal annars verðlaun sem besta evrópska fantasíumyndin á Alþjóðlegu kvikmyndahátíðinni á Spáni, 2004


sumsé greinilega mynd sem ég verð að sjá

29 september 2005

tvíklukkuð

jæja, það er víst einhver voða bloggklukkleikur í gangi, og búið að klukka mig tvisvar, svo ég kemst líklega ekki hjá því að skrifa um mig 5 gjörsamlega gagnslausar staðreyndir:


  • ég tala við sjálfa mig

  • mér finnst best að taka klukkutíma í morgunverð

  • ég halla oft undir flatt

  • ég er með pinna í naflanum

  • ég get hreyft litlu tærnar frá hinum tánum



ég ætla hins vegar ekki að klukka neinn, þar sem flestallir vinir mínir (nema auðvitað þeir sem eru búnir að klukka mig) eru víst með heiftarlegt ofnæmi fyrir svona keðjum

:D

28 september 2005

Dagga?

þekkir einhver hana Döggu?

kannski svona einn eða tveir?

hmmm

Andrés var sko að spurja mig hvað vinir hans gætu mögulega fengið að kalla mig
amk. þeir sem geta ekki lært að segja fallega nafnið mitt

yfirleitt læt ég kalla mig eitthvað annað í útlöndum
soldið viðkvæm fyrir misþyrmingum á nafninu mínu
en þeir sem eru konu nánastir, þeir þurfa auðvitað að læra að segja nafnið konu
stundum hef ég líka notað þetta til að flýja sjálfa mig, en það er algjör óþarfi lengur
núna vil ég bara vera ég og ég heiti Dagbjört

önnur nöfn eru svona abstraction layer á mig, einhvernveginn, fyrir þá sem skilja nördamál, þau sýna bara einhverja hluta, en ekki það sem er undir niðri

Day
1996
hún var óttalausa ævintýrakonan sem ferðaðist á framandi staði og var opin fyrir öllu og öllum. líka soldið hörð í horn að taka. óþæg

Daybright
2001
bjó í Montreal. söng stíft. vann mikið. grét aldrei. dofin að innan

en sko Dagga
það var ég þegar ég var svona 13 - 15 ára
renglulegur ófríður stutthærður tölvuleikjanörd með leiklistaráráttu

kannski það sé bara kominn tími til að endurnýta hana?
setja hana í gegnum tímavél, flytja hana til Köben, slengja á hana slatta af holdi og hári, setja tónlist í stað leiklistar og tónvinnslu í stað tölvuleikja
gefa henni veglega innspýtingu af sjálfstrausti og aðeins betra innsæi
kannski eitt stykki kærasta líka ;)

jamm kannski kona geti bara notað gömlu góðu Dögguna
hún er orðin nógu fjarlæg í tíma til að konu finnist hún barasta pínu krútt

Dagga mín
hljómar bara soldið næs

og svo á hún það sameiginlegt með nafninu mínu sem mér þykir vænst um af öllu:
Amma var líka kölluð Dagga

26 september 2005

Hlátursköst

Hvenær fenguð þið síðast hláturskast?

ég man það ekki sjálf, það hlýtur að vera langt síðan, en engu að síður var ég meira og minna í hláturskasti alla helgina :D

já, ég var í Köben, frá föstudegi til sunnudags

er Andrés svona svakalega fyndin?
eða er ég svona léttrugluð?
skiptir ekki máli, því ég hló þangað til mig verkjaði í magann

mæli meððí ;)

(já og svo mæli ég líka með húfum. ég setti eina á mig í aumingjaégaðveraáíslandi kasti í morgun, og afleiðingin var sú að ég fann nákvæmlega ekkert fyrir kuldanum þó við færum (ozararnir) í göngutúr í hádeginu. lykillinn að því að lifa af á klakanum er sumsé ekki flóknari en þetta :þ )

Allt nýtt ! (stórfréttir)

jæja, þá er barasta allur pakkinn orðinn glænýr hjá mér:


  • ný íbúð

  • nýr kærasti

  • nýr skóli

  • ný vinna



já þá er síðasta púslið í nýja lífinu komið á sinn stað, og víst best að vera ekkert með þetta lengur undir rós ;)

þið vitið nú flest að ég flutti í nýja og glæsilega íbúð í sumar...
og flestir sem kunna að lesa á milli línanna vita að ég er búin að vera töluvert í Köben undanfarið hjá honum Andrési mínum :)

færri vita líklega að ég er byrjuð í Tónvinnsluskólanum á fullu, eða að ég sagði upp vinnunni minni fyrir um mánuði og byrjaði í dag að vinna aftur hjá Oz

en núna vitið þið það :)

nýtt líf!

og það er ekki hægt að segja annað en að ég sé lukkuleg :)

21 september 2005

Heimavinna

jæja, þá er skólinn LOKSINS byrjaður!
til að byrja með lærum við á tækin og græjurnar og forritin og svo að greina og pæla í lögum.
í gær var nokkurs konar formfræðitími þar sem við hlustuðum á tónkróka í dægurlögum og greindum þau niður í kafla

heimavinnan er svo að velja 5 lög og kaflagreina þau, og segja hvað hver kafli er margir taktar :)
hlýtur að vera einhver skemmtilegasta heimavinna sem mér hefur verið sett :D
núna er ég t.d. að undirbúa mig með að hlusta á tónlist á meðan ég vinn til að velja lögin.

held ég taki Jenny Wren (af Chaos&Creation in the Back Yard), og svo eitt með Bubba af í sex skrefa fjarlægð.
þá vantar auðvitað eitthvað rokkaðra...
er að spá í að reyna að finna eitthvað sem hentar með Porcupine Tree

var ég annars búin að segja ykkur að Porcupine Tree hefur einhverja furðulega Mozartíska eiginlíka.
held þeir séu göldróttir barasta...

...samt ekki eins göldróttir og Andrés ;)

og svo var spilaður Bob Dylan í tímanum í gær - the times they are changing
og ég á gamals aldri að uppgötva Bob Dylan
hversu fyndið er það?

14 september 2005

Takk fyrir mig!

Þakka ykkur kærlega fyrir, allir sem sendu mér afmæliskveðju á afmælisdaginn!
Ég fékk 11 afmælis-sms (þar af eitt fjórfalt) og 3 afmælishringingar
Það er alltaf jafn gaman að sjá hversu margir muna ennþá að ég sé til, þó ég sé ekki duglegust að láta heyra í mér :)
Eitt SMS-ið var frá númeri sem ég þekki ekki, en það byrjar á 664 - einhver sem vill kannast við það?

Og svo fékk ég líka fullt af fínum afmælisgjöfum :)


  • Konið mitt gaf mér flotta græna peysu og græna hárklemmu - algjör græningi :þ

  • Fräulein Morgenstein splæsti á mig nýja Queens of the Stone Age diskinum í fríhöfninni

  • Kærastinn gaf mér gamlan hermannabol af sér til að sofa í þegar ég þarf að vera án hans á landinu kalda - og svo var hann auðvitað búinn að plana súper rómó kvöld og kaupa jarðarber og eðalvín og alles ;)

  • Storesös gaf mér svaka kúl geisladisk með norsku þjóðlagarokksveitinni Gåte og fjólubláan krossfisk úr gleri sem fer sérstaklega vel í björtum stofum ;)

  • m&p ætla svo að splæsa á mig alvöru gönguskóm svo ég geti farið að stika um fjöll og fyrnindi með honum Andrési mínum :D



ekki slæm uppskera þetta, og þakka ykkur öllum kærlega fyrir!

13 september 2005

Komin heim

þetta er furðulegt
mestalla ævi hef ég verið ein
en samt yfirleitt aldrei einmana
oftast nokkuð sátt
oft þurft á því að halda

svo allt í einu í kvöld
á meðan ég keyrði í gegnum ógeðslega íslenska veðrið og myrkrið og tómið frá Keflavík til Reykjavíkur...
af hverju núna?

muh
mig vantar Andrés

09 september 2005

note to self

diskar til að kaupa úti eða á leiðinni heim:


  • Jeff Buckley - Sketches

  • Pixies - Death to the Pixies

  • Porcupine Tree - allar breiðskífur (amk in Absentia og Deadwing)

  • The Beatles - Abbey Road (kannski Sgt. Peppers líka)

  • QOTSA - Songs for the deaf + Lullabies to paralyze

  • Sigur Rós - Takk



kíkja líka á þessa búð
sem er hér

:D

ammælisgjöfin frá mér til mín

í ár

er ferð til Köben að hitta Andrés um helgina
loksins fáum við þá að kynnast vonandi eins vel og vandlega og hægt er eina helgi, svo ef við verðum ennþá saman á þriðjudaginn, þá hefur þetta allt saman gengið vel ;)
skrítið að vera búin að vera saman í næstum mánuð en samt bara í 3 daga...

svo, ég flýg seinnipartinn í "dag" (úff hvað ég þarf að fara að sofa), nánar tiltekið klukkan 15:30 og Fräulein Morgenstein ætlar að vera samferða mér :D

jæja, ég á víst enn eftir að pakka smá

*knús og kossar* og hafiði það gott um helgina

:Dagbjört dís - 28 ára í dag

04 september 2005

"karlmenn"

eða þannig sko...

fór á djammið með koninu mínu í gær, en þegar hún drekkur þá kalla ég hana reyndar dýrið mitt ;)

alveg hreint ótrúlega áhugavert að horfa á stráka og karlmenn frá þessum nýja sjónarhóli þeirrar sem þarf ekki að hafa áhyggjur af þeim fyrir fimmaura ;)

byrjuðum í Vökupartýi (dýrið er í stúdentaráði sko)
þar fór ég auðvitað strax að tala við strákana eins og ég geri í partýum þar sem eru strákar yfir höfuð, einfaldlega vegna þess að umræðuefni stelpna eiga það til að þynnast exponentialt eftir því sem fleiri þeirra koma saman, jafnvel þó þær séu háskólapíur. held reyndar að þær sem voru þarna hafi verið með skárra móti.
allavega, ég fór að búa til samræður við einhverja gaura, og allt í einu fattaði ég að ég gæti þurft að passa mig. karlhylli konu eykst jú líka exponentialt þegar kona er hamingjusamlega frátekinn :þ
tókst sem betur fer að varpa fram svo umdeilanlegri sýn á stofnfrumurannsóknir að viðstaddir héldu að ég væri hálf klikk ;)
ekkert eins og heimspekin ha!

svo þegar allur minn Stoli var búinn dró ein ágætis Vökupía dýrið mitt, mig og aðra ágætis Vökupíu með sér á Oliver
"aþþí að þar er skemmtileg tónlist að dansa við"
jújú, það er svosem ekki hægt að neita því að tónlistin er dansvæn og hress á Oliver, en hver sá staður sem er með VIP röð kemst nú samt sjálfkrafa á kjánastaðalistann hjá mér...
og kjánar er líka rétta orðið
ég hef sjaldan eða aldrei séð þvílíkt samansafn af veruleikafyrrtu fólki!
"karlmennirnir" þarna inni voru svo svakalega töff og æði og merkilegir í eigin augum að ég átti bágt með að fara ekki að hlæja!
jájá, það er ljótt að segja þetta, en allt þetta fólk virkilega trúði því að þeir væru betri en aðrir!
fólk segi ég, því það voru konur þarna inni sem horfðu aðdáunaraugum á þá!
hvað er í gangi??? það ganga jú sumir í gegnum svona tímabil einhvern tíman á snemmfullorðinsskeiðinu, en fullur skemmtistaður???
já, og svo eru þeir líka svo töff og kúl að þeim dettur ekki í hug að reyna við stelpur (þó strákar væru einhverra hluta vegna í töluverðum meirihluta þarna inni) - stelpur eiga að reyna við þá...
og jújú grúppíugreyin gera það sjálfsagt, allavega var nógu mikið um upphrópanir hjá þeim þegar fótboltalandsliðið mætti á svæðið (held að þeir séu barasta verstir í fáránleikanum)

við dýrið tókum þann pólinn í hæðina að horfa á liðið eins og okkur fyndust þeir algjörir hálfvitar (jájá, ljótt ég veit - en þeir hafa gott af því) og dönsuðum svo auðvitað hvor við aðra eins og við kunnum best ;)
einhvern veginn varð þetta til þess að það var alveg heilmikið reynt við okkur (í fyrsta skipti á Oliver) en við létum okkur auðvitað fátt um finnast...

mér tókst einhvernveginn að finna mér norðurlandabúa að spjalla við
rakst á tvo sænska hermenn sem stóðu eins og illa gerðir hlutir við dansgólfið og vissu ekkert hvernig þeir ættu að haga sér. ég benti þeim á að skella sér bara á Hressó, þar væru miklu skemmtilegri Íslendingar - og ég held þeir hafi barasta drifið sig :)
Svo fann ég Dana og við blöðruðum um Köben, nema hvað ;)

Allt í allt dönsuðum við vel og lengi, og fengum skutl heim um sexleytið í morgun útdansaðar og sælar :)
og þrátt fyrir skrípasýninguna vitum við að það eru til frábærir og æðislegir karlmenn í heiminum...

...var ég annars búin að segja ykkur hvað ég á meiriháttar kærasta?

03 september 2005

bestestestust

það urðu sem betur fer engir fleiri dagar í póst-köben þunglyndi!
af hverju ekki?
jú það eru víst enn nokkrar yndislegar manneskjur á Íslandi og ein þeirra kom mér til hjálpar
hver þá?
jú bara þessi sama og er búin að deila með mér gleði og sorgum síðustu 12 árin, hver önnur?
nebblilega konið mitt
hún er yndisleg og falleg og skemmtileg og fyndin og stuðbolti og brjálæðingur með meiru
svo er hún líka hlý og góð við mig þegar á þarf að halda
hún lýsti því yfir að ég hefði verið hræðilegur djammfélagi síðustu 5 árin (fyrir utan eyjar 2000, 2001, 2002 og 2003)
svo núna loksins þegar ég er í réttu landi og ekki í líkamlega krefjandi námi, þá fer ég því miður bara versnandi í þeim málunum :S
en samt heldur hún áfram að reyna að draga mig á djammið ;)

og svo til að laga það eina sem var eftir sem var ennþá ekki nógu gott í tilverunni þá sagði ég upp vinnunni minni :)
algjör óþarfi að vinna fyrir einhverja ameríska aurapúka þegar maður getur verið að gera eitthvað skemmtilegt við lífið! (amerísku aurapúkarnir keyptu nebblilega æðislega fyrirtækið sem ég vann hjá)
á samt eftir að sakna strákanna alveg ferlega, þó við ætlum að reyna að hittast öll við og við.

en allavega
konan mín er bestestestust

best að farað hittana...

28 ágúst 2005

antifemínstar

var að koma úr ágætis partýi
3 stelpur og 4 strákar

nema hvað
ég og sumar vorum ekki sammála
aþþí að henni finnast femínistar halló, ljótar og loðnar
og mér finnst það vanþakklæti og hræsni dauðans af hálfu vinnandi konu...

í sannleika sagt, kona sem er á móti femínisma er ekki í tengslum við raunveruleikann!
hvaða máli skiptir það þó þú sért ekki sammála öllu sem þær berjast fyrir í dag!
(ekki er ég sammála þeim öllum)
það breytir ekki því sem þær hafa gert!

værirðu sátt við að karl í sömu stöðu og þú hefði hærri laun?
værirðu sátt við að hætta að vinna um leið og þú eignaðist börn?
værirðu sátt við að elda 3 - 4 máltíðir á dag, þvo allan þvott, þrífa allt, hugsa um 5 - 6 börn og fá aldrei svo mikið sem takk?
værirðu sátt við að mega ekki ganga í skóla?
værirðu sátt við að fá ekki að kjósa?
værirðu sátt við að pabbi þinn réði því hverjum þú giftist?

er ég loðin ljót og leiðinleg þó ég átti mig á því að konur í dag þurfa enn að glíma við fordóma og vanvirðingu?
er ég loðin ljót og leiðinleg þó ég sætti mig ekki við það að forstjórinn káfi á mér bara af því að ég er svona eða hinsegin í laginu?
er ég loðin og ljót af því að ég ætlast til þess að vera metin út af heilanum mínum og persónuleika, en ekki líkama og fési?

skoðanir eru ekki tíska
skoðanir snúast um að hugsa sjálfstætt
tíska snýst um að þóknast öðrum

og við allar konur sem halda að femínismi sé lame og halló:

þú ert meira en þú heldur, og meira en eitthvað sem þú heldur að karlmenn vilji að þú sért
meira en það sem er kúl í dag eða á morgun

miklu miklu meira
og ég veit það!
en veistu það sjálf?

24 ágúst 2005

post-Köben-þunglyndi, dagur 1

ég ætti nú bara að skammast mín
dagurinn minn var nebblilega svona:

nei sko! gott veður! best að labba í vinnuna!
ááááááá norðankaldinn bííííítur mig
úff hvenær opnar Nóatún?
2 mín
brrrrrrrrrrrrrrrrrrrrrrrrrrrrrr
úje komin í vinnuna á undan flestum!
best að borða morgunmat ;)
spjalla við gaurana um leið og þeir tínast inn
komast að því hvað ég ætti að gera
best að farað gereitthvað!
Köööööööööööööööööööööööööööööben
ha nei! úbbs! best að kóða smá!
Köööööööööööööööööööööööööööööööööben
Köben Köben Köben Köben Köben Köben Köben
kóðikóð
Köööööööööööben!
best að kíkja á icelandexpress.is og kaupa miðann út aftur
æj nei, ekki fyrr en ég veit meira um skólann
Köööööööööööööööööööbeeeeeeeeeeen
úbbs! kóðaðu kona!
kóði kóði kóð
Köben Köben Köben Köben Köben
osfrv.

hjólaði svo heim, því hjólið mitt var einmitt niðrí vinnu
með norðanskrímslisvindinn í bakið, sem betur fer ;)

vá hvað Ísland er kalt og grátt og óspennandi
vá hvað Íslendingar eru dónalegir og sjálfselskir og snobbaðir elítistar og efnishyggju- egósentrískir eiginhagsmunaseggir
(sorrý elskurnar, svona líður mér bara í dag)
vá hvað ég er komin með útlandasýki á háu stigi!
eftir að hafa haldið að Montreal hefði læknað mig, þá komst ég sumsé að því að ég hafði einfaldlega farið í vitlausa átt!

og bara til að ítreka hvað er svona æðislegt við Köben?

fyrir utan hvað borgin sjálf var æðisleg þegar ég sá hana frá íbúasjónarhorninu (í stað túristasjónarhorninu áður), með öllum hjólunum og lestunum og afslappelsinu og girnilega matnum á viðráðanlegu verði (æðislegt að sjá hvað hún Erna mín lítur vel út núna þegar hún hefur efni á að borða og hjólar líka út um allt :)
já fyrir utan það, þá er þar núna samankomin stærsti fjöldi míns nánasta fólks í heiminum:


  • storebror

  • svigesös

  • yndislegu börnin þeirra þrjú

  • Ernan mín

  • og kærastinn minn


Köben Köben Köben Köben Köben Köben...

hmmmm
ekki fara að hafa samt of miklar áhyggjur
þetta ástand á vonandi bara eftir að vara þangað til skólinn byrjar og mín fer að hafa meira en nóg að gera :)
þó Andrés ævintýraprins verði reyndar ennþá í Köben
og ég hér...
Köööööööööööööööööööööööööööööööben!

úff
best að fara að reyna beina þessu stjórnlausa ímyndunarafli á meira skapandi brautir þangað til konið mitt kemur í heimsókn á eftir

19 ágúst 2005

Heljarstökk

Vííííííííííííííííííhíhíííííííííí!!!

Við Jónsi ofurkroppur (7 ára) erum búin að vera að æfa heljarstökk á trampolíninu í næstum ALLAN dag
(með nokkrum pásum til að spila Stratego, Asna og Rússa)
þetta er um 12,5 fermetra trampólín (r=2) - sumsé vel stórt
reyndar hefur mér enn ekki tekist að lenda standandi úr heljarstökkunum, en get skoppað af rassinum og uppá fætur aftur :D

heljarstökk er jú bara kollhnís í loftinu ;)

hann Jónsi minn er hins vegar svo sprækur (barnið er með þvottabretti!) að hann fer í hvert heljarstökkið á fætur öðru og lendir næstum alltaf standandi!
æðislegt leikfang, þetta trampólín
sérstaklega í svona yndislegu veðri

já og hérna er pínu
S Ó L S K I N !
handa ykkur sem eruð föst á frostafróninu

haldiði annars ekki að storesös hafi tekist að fá mig til að eyða um 10.000 krónum í föt í gær!
já einmitt, nirflinum mér sem er hætt að fara í Kringluna
hún er alveg svakaleg
skellti t.d. á mig húfu og sagði: "sjáðu hvað þú ert sæt!" svo mín bara varð að kaupa hana :þ
svona var þetta með næstum allt sem ég keypti! en ég er svosem ekkert að kvarta því ég fékk ágætlega mikið fyrir peningana:


  • 2 hlýraboli

  • 1 pæjubol

  • 2 renndar bómullarpeysur

  • 1 sæta húfu

  • 6 brækur

  • 1 pæju-ullarpeysu (dýrust;)



já, kom bara í ljós að Norge er alls ekki dýrari en Ísland!

æjjjjjjjjjjjjjjjjjjjjj
þetta er búið að vera svo æðislegt frí!
(samt veit ég að það besta er eftir (ætla að stela einum degi í viðbót í Köben á mánudaginn))

en hvernig á maður svo að fara að því að snúa aftur í einhverja leiðinda innivinnu eftir þetta allt saman?
úff best að hugsa sem minnst um það
(og sem mest um mánudaginn ;)

mmmmmmmmmmmmmmmmmmmmmmmmmmmmmmmmmmmmmm
hvað það er annars gott að vera til!

best að farað taka nokkur heljarstökk í viðbót...

17 ágúst 2005

alvöru sumarfrí

eitt
stórt
G E I S P !

búnað vera í 7 tíma í skemmtigarði (Tívolí-i) með storesös og 3 hressum guttum
ThunderCoaster
SuperSplash
RollOver
osfrv.
alveg frábær garður og hægt að vera þar allan daginn án þess að gera neitt tvisvar

veðrið hérna í Norge hefur verið alveg eins og ég hefði pantað það
síðustu tvo daga vorum við á ströndinni að veiða krabba og slappa af
(eins og sjá má hér að neðan)

á morgun ætlar storesös að gera tilraun til að láta mig versla föt
í Noregi!
gangi henni vel ;)

meira seinna

nema bara

eitt
stórt
F A Ð M !
handa heiminum

:D

16 ágúst 2005

Sandkastali


Ævilangt hefði ég helst viljað sofa
við hlið þér í dálitlum svertingjakofa
Tondeleyó!

14 ágúst 2005

sykkeltur

aðeins meira um köben :)

veðrið er bara svo yndislegt og áðan skelltum við Erna okkur á hjólunum útí búð til að kaupa blettahreinsi
(keypti mér vasabuxur á Ströget á föstudaginn (til að vera í í næturlestinni til Osló) og tókst svo að sulla olíu yfir þær allar á djamminu um kvöldið þegar við Andrés fengum okkur Döner kebab to go, og mitt ákvað að leka...)

það er smá spotti í búðina, svo við vorum orðnar vel upp hitaðar og sungum köbenlagið hástöfum í kór á leiðinni til baka:
"I don't wanna be anything other than what I've been tryin' to be lately!"
(nákvæmlega það sem maður fær að vera í köben)

skelltum svo blettahreinsi á buxurnar og skelltum þeim í vélina með tveim mismunandi tegundum af þvottaefni...

..og fórum aftur út að hjóla
sungum spuna í þetta skiptið og æfðum okkur að sleppa höndum
(ok, ég æfði mig, Erna kann þetta orðið alveg ;)
Erna ætlar að kaupa sér rússíbana í þeirri von að þá flytji ég líka til köben...


jæja, nú ætlum við að fara að reyna að semja amk eitt lag

og kannski er kominn tími á að kíkja á þvottavélina...
vonandi getur Andrés ekki lengur verið abbó yfir því að ég eigi doppóttar buxur en ekki hann ;)

Kaupmannahöfn

þegar það kom í ljós fyrir brottför að það væri engin næturlest til Oslóar á laugardögum velti ég því fyrir mér hvað ég ætti að gera í 3 daga í Köben
og hvort við Erna fengjum ekki ógeð hvor á annarri...

en núna
langar mig alls ekkert að fara héðan
Kaupmannahöfn er búin að heilla mig uppúr skónum


  • hjólagöturnar og hjólin alls staðar

  • ávaxtasölumennirnir

  • buskararnir á strikinu

  • þessi yndislega afslappaði ryþmi

  • og almennt pláss fyrir lífið

  • S lestirnar

  • gömlu músteinshúsin

  • trégólfin

  • ævintýrastemningin í Tívolí (þó Parísarhjólið hafi verið pínu vonbrigði)

  • Andrés



ævintýrakonan inní mér er vöknuð á ný
eftir að hafa legið í dvala á Íslandi í 3 ár
og hana langar ekkert heim
hana langar á alla staði aðra

Ísland er eins og lítið búr
(með sundlaug)

í dýragarðinum mínum í Ísrael var fálki
hann var lokaður inní ca. 10 fermetra búri
við hliðina á kanínufjölskyldu með 15 unga
ég fékk að gefa honum að borða hrátt kjöt (og stundum sjálfdauðar hænur) annan hvern dag
þess á milli horfði hann sultaraugum á kanínuungana
í hvert skipti sem ég gekk fram hjá búrinu hans vældi hann
og ég fékk alltaf sting í hjartað

það bara má ekki setja fálka eða erni í búr
og ekki grágæsir heldur

11 ágúst 2005

farin til Köben og Norge

jæja, þá er kona að leggja í hann

bíð eftir að naglalakkið á táslunum mínum þorni, svo ætla ég að vaska aðeins upp og svo er ég barasta farin með Iceland Express til Köben

að tónlistast með Ernunni minni
svo með næturlest til Osló (elska lestir)
að sumarfríast með storesös og stóru strákunum hennar 2

verð í einhverju netsambandi við og við, svo kannski kona bloggi við og við

farið vel með landið mitt á meðan

*knús og kossar*

:Dagbjört ferðadís

08 ágúst 2005

ógeð

vaknaði á miðvikudaginn og gat varla kyngt
íllt í hálsinum
lá heima
horfði á meiri Smallville og las 8 nýjustu Ultimate Spiderman eftir Bendis (Bendis er bestur (og kannski Miller líka))
Peter hætti með MJ af því að hann var svo hræddur um að hún myndi deyja hans vegna
(já, einmitt, alveg eins og sumir...)

vaknaði á fimmtudagsmorguninn þegar mamma hringdi og ég gat varla talað
ennþá íllt í hálsinum
hékk heima
imbaðist á netinu
leiddist mest

föstudagur
ennþá veik
ógeðið samt farið að færast upp í nefið með tilheyrandi snýtingum :|
sem betur fer kom meðleigjandi minn heim úr sumarfríi með bók fulla af Su Doku þrautum svo ég hafði loksins eitthvað til að stytta mér stundir
mæli með Su Doku fyrir alla nörda sem leiðist :)

laugardagur
skutlaði storebror og Önnu 3 á flugvöllinn
svaf það sem eftir var dagsins
sumsé ennþá veik

sunnudagur
aðeins hressari
dívurnar komu í brunch og við óperunörduðumst langt fram eftir degi
alveg yndislegt hvað þær hafa gríðarlegan áhuga á óperum og eru duglegar að hlusta
við vorum sumsé að deila tónlist hver með annarri og hlusta á gamlar og nýjar stjörnur túlka uppáhalds aríurnar okkar - stundum með tilheyrandi "æj NEI! af hverju gerði hún ÞETTA!"
alveg dásamlegt
af hverju?
jú, þótt undarlegt megi virðast, þá eru bara alls ekki svo margir nemendur Söngskólans sem nenna að hlusta á óperur eða aðra klassíska tónlist
en dívurnar mínar hafa svo brennandi áhuga á því sem þær eru að gera að það er unun að fylgjast með þeim :)

svo þegar þær fóru, og ég var búin að kveðja Hulduna mína *grenj* (sem komst inní master í óperusöng í háskóla í Princeton í BNA! húrra fyrir henni!), þá var ég svo búin á því að ég þurfti að neita mér um að leggja mig með valdi - í þeim tilgangi að ég ætlaði að fara snemma að sofa til að geta mætt í vinnuna...
það eina sem dugði var að horfa á síðustu 3 þættina af Lost og GARG! svona bara má ekki!
leið svo illa eftir þennan hræðilega endi að ég gat bara alls sofnað heldur lá andvaka og hugsaði um börnin mín 5 sem hafa verið tekin og er verið að taka frá mér

í morgun
var SVO erfitt að vakna við klukkuna
áttaði mig smátt og smátt á því að ég er ENNÞÁ lasin :(
staulaðist útí apótek og keypti einhverja norska brjóstdropa
mamma vildi að ég keypti þá á fimmtudaginn en ég þrjóskaðist við
ekki mikið fyrir að úða í mig lyfjum ef ég kemst hjá því :S

og þvílíkt ógeð!
25% alkóhól og eftir eina skeið leið mér eins og ég væri ofurölvi
var nógu slöpp fyrir :S

í dag verða það fleiri Su Doku þrautir og kannski kona grafi eitthvað uppúr dvd safninu sem kona hefur ekki séð í mörg ár
svo á ég líka eftir að lesa öll Ultimate X-men frá upphafi - sem ég held að séu líka eftir snillinginn hann Bendis...

03 ágúst 2005

foreldrar

horfði á nokkra þætti af Smallville um daginn
kannski ekki raunsæjustu þættir í heimi, en flestir vita að ég er pínu ofurhetjufrík

allavega
eitt af því sem er stundum einum of í Smallville þáttunum eru hvað foreldrar hins unga ofurmennis eru brjálæðislega fullkomnir
pabbi hans er sérstaklega með ofurmannlegt siðferðisþrek, og þau eru alltaf til staðar og segja honum einmitt það sem hann þarf að heyra til að komast í gegnum alla mögulega og ómögulega hluti
og þau eru alltaf svo góð við allt fólk sem þau hitta...
sem á auðvitað að útskýra af hverju Superman er svona súper góður gaur, en stundum finnst manni þetta nú bara einum of - sem skiptir svo sem engu máli, því hver er að taka þessa þætti alvarlega?

nema hvað
svo mæta foreldrar mínir og setjast niður með mér og segja mér nákvæmlega það sem ég þarf að heyra og hjálpa mér að takast á við hlutina og sannfæra mig um að það sem ég er um það bil að ákveða að gera sé rétt og eru bara í alla staði meiriháttar
og ég man að svona hafa þau jú alltaf verið
alltaf til staðar til að segja nákvæmlega það sem maður þarf að heyra
pabbi er auk þess með ofurmannlegan heiðarleika og mamma með ofurmannlega mannlega næmni... já og svo góð við alla líka

eiga allir svona frábæra foreldra, eða eru það bara ég og Súperman?

01 ágúst 2005

innipúkar

sannleikurinn er sá að ég er ekkert sérstaklega mikill innipúki
ég ólst upp utandyra öll sumur, í sveit og svo í garð- og skógrækt
það stríðir gegn eðli mínu að vinna inni á sumrin
og um verslunarmannahelgar á ég heima úti
en til hvers að fara eitthvert ef kona kemst ekki á bestu hátíðina?
nah, þá getur kona bara eins verið heima og skellt sér á innipúkahátíðina
ekki satt?

við fengum reyndar ekki miða, en ákváðum að láta það ekki stöðva okkur
sátum heima hjá Ástu fram að miðnætti og sötruðum Malibu í ananassafa
röltum svo niður í Austurstræti, litum inná Hressó í um 5 mínútur, en þar var frekar sorgleg stemning
svo við ákváðum að kíkja fyrir utan Nasa, og sjá hvort einhver væri að reyna að losna við miða
ekkert svoleiðis
létum það heldur ekki stoppa okkur og röltum inn
klukkan orðin hálf eitt og Ásta spurði dyraverðina fallega hvort við mættum koma inn
jájá ætli það ekki bara ;)

þegar við mættum voru Ravionettes að byrja að spila
fengum okkur drykki á barnum og skoðuðum fólkið
alls konar fólk
17 - 57 ára eða hér um bil
einhverjir litlir strákar fóru að spyrja úr hvaða hverfi við vorum
hverfi? ha hvað?
svo skelltum við okkur á dansgólfi og reyndum aðeins að dansa, sem var vandræðalegt með töskurnar í höndunum
saknaði vasabuxnanna sem kona er alltaf í í Eyjum sem geyma allt sem maður þarf á að halda
töskuvesen
en samt, Ravionettes voru stuð og stemningin góð

svo kom pása og við röltum upp og spjölluðum við gamlan MH-ing þar til Trabant mætti á svið
ég veit ekki af hverju, en svona hef ég lítið hlustað á Trabant að ég hef ruglað þeim saman við einhverja aðra
einhverra hluta vegna minnti mig að þeir væru svona stuð-fönk eða polka eða rokk band eða eitthvað
allavega bjóst ég ekki við Depeche Mode á sýrutrippi
svo þegar þeir sögðust hafa verið að spila í Eyjum og allur salurinn púaði, þá vissi ég að ég væri ekki á réttum stað

þarna var sumsé fólkið sem lítur niður á aðra af því að þeir eru ekki nógu artífartí innisnobbaðir og dæmir tugi þúsunda þjóðarinnar á einu bretti
ég sem hélt að þarna yrðu ofnæmisgrísir og aðrir blánkistar eins og ég
til hvers í ósköpunum að vera á móti 15 þúsund manns sem vilja vera í náttúrunni og bræðralagsstemningunni í eyjum?
fatta alveg að þetta lið hefur aldrei upplifað þessa gleði, og aumingja þau, en mér finnst samt eitthvað svo tilganglaust að eyða orku í að vera á móti því
getur það verið biturð eða öfund?
ég hef aldrei heyrt neinn í Eyjum segja orð á móti innipúkanum
djammi hver sem hann vill

þar sem sýrueffectahljóðin hjá Trabant voru hátt yfir sársaukamörkum og mér þykir ákaflega vænt um súperheyrnina mína, þá ákvað ég að láta mig hverfa rétt fyrir 3
ekki misskilja mig, Trabant voru alveg frábærir, í rífandi stuði og aðdáendur þeirra greinilega hrifnir
tónlistin þeirra er bara ekki fyrir mig né mín eyru

ég veit ekki hvort ég fer á innipúkann aftur
er að minnsta kosti fegin að ég borgaði mig ekki inn

kannski maður finni uppá einhverju nýju næst...

29 júlí 2005

vantar miða á innipúkann!!!

ARGH!!!!

það er uppselt á innipúkann!!!!
og ég sem var farin að hlakka svo til
Hjálmar, Trabant og Blond Redhead

langar SVO á sunnudaginn !

hjálp !

grenjuskjóða

vá hvað tárakirtlarnir mínir eru ofvirkir þessa dagana!
ég er barasta alltaf skælandi!

má helst ekki knúsa litla yndislega 4ra ára tröllastrákinn minn án þess að tárast
(aþþí að ég veit að hann verður tekinn frá mér eftir örfáar vikur)
svæfði þau síðasta föstudag (fyrir norðan) og þegar hann var sofnaður bara byrjuðu tárin að streyma...

svo í gærkvöldi þegar ég var að taka mig til fyrir bíóferð með kvinnet (Madagaskar :þ ) og ætlaði að setja á stemningartónlist, þá rakst ég á diskinn með "Dagurinn líður" og skellti honum auðvitað í, enda langt síðan ég hef hlustað á hann.

en narcissistinn í mér virðist vera búin að gleyma því að þetta kom allt upphaflega út úr hausnum á honum, og það eina sem hann heyrði var Dóra að syngja og nú er Dóra farinn...
sem er auðvitað ÆÐISLEGT af því að hún komst inní þennan frábæra skóla, en narcissistinn inní mér áttaði sig á að hennar verður samt sárt saknað...
og hann fór að háskæla

Steinunnunnin farin
Ernan farin
Dóran farin
storebror og Anna 3 fara eftir viku
Huldan fer eftir 2
og 2 minni tröllabörnin hans storebror eftir 4 vikur

já og storesös er ekkert á leiðinni heim

það verður því orðið lítið eftir af mínunum nánustu vinum og vandamönnum á skerinu - og engin börn!

bráðum fæ ég samt vonandi píanó, og þá get ég bara sökkt mér í tónsmíðar á meðan ég finn mér nýtt fólk :)

en getið þið ímyndað ykkur að þurfa að vera til án fólks OG án tónlistar !!!!!!!

eitt

stórt

! ! ! G R E N J ! ! !

;)

28 júlí 2005

furðulegur dagur

gærdagurinn
byrjaði þegar ég kom heim úr vinnunni klukkan 01:00 og staulaðist uppí rúm
handviss um að ég myndi sofna svo til undireins, opnaði ég bókina (HP6 - já ég er að lesa hana aftur, því ég las hana svo ferlega hratt fyrst - og hún er frábær í 2. skiptið!) og ætlaði að lesa svo sem hálfa síðu á meðan rúmið mitt volgnaði
en þetta var einmitt svona uppúr bls 400 og ég vissi hvað væri alveg að fara að gerast...

allt í einu leit ég upp og velti fyrir mér hvort ég ætlaði ekki að fara að sofna?
klukkan orðin 02:30
úff
las "aðeins" lengra...
lagði frá mér bókina og slökkti ljósið

hrökk upp klukkan 08:30 við það að sinin í hægri löppinni ákvað að stytta sig um eina 5 cm í tilefni þess að ég hafði verið í háhæluðum nokkra daga á undan
argh! hvað það var sárt

það var ekki til nein mjólk né súrmjólk né jógúrt né bíómjólk né brauð né neitt sem gæti flokkast sem morgunmatur
er búin að vera að vinna svo mikið að ég hef ekkert komist í Bónus
vissi að ég þyrfti að drífa mig í vinnuna, svo ég ákvað að koma bara við í Nóatúni í leiðinni og kaupa súrmjólk (geymi alltaf kassa af fitness niðurfrá til öryggis)
nema hvað
í einskærri hneikslun og mótþróa yfir því að ég ætlaði virkilega að dirfast að keyra í vinnunna 3. sólskinsdaginn í röð, ákvað elskulegi bíllinn minn að neita að fara í gang
klik
klik
klik
heyrðist

ég held það hafi bjargað deginum, því eftir brösótta byrjun neyddist ég til að labba í vinnuna í þessu líka frábæra veðri
þar með fékk ég nógu góðan sólskinsskammt til að endast mér út daginn
og ekki vanþörf á

þegar ég var búin að vera í vinnunni í svona klukkutíma, þá var klukkan allt í einu orðin 13 (mætti hálf 10 sko)
þegar ég var búin að vera þar í 2 tíma, þá var klukkan orðin fimm
bugfixar test og vesen
allt í kapp við tímann
samdi við mömmu um að pabbi myndi sækja mig og hún myndi gefa mér að borða, þar sem ísskápurinn minn væri svona líka tómur.
hafði ekki fengið kvöldmat næstu 2 kvöld á undan, en það er bara ekki hægt að vinna endalaust án matar...

pabbi kom klukkan 18:30
hann var reyndar pínu seinn, svo ég ákvað að henda inn einni lítilli textabreytinu...
og þá hrundi mblog.is
pabbi flautaði
hvað er í gangi???
serverinn á hliðinni
pabbi flautaði
hljóp út
"bíddu aðeins, ég drap serverinn!"
tók breytinguna til bara
ennþá niðri!
fiktaði þetta
fiktaði hitt
veit ekki alveg hvað ég gerði, en greyið serverinn staulaðist uppá brauðfætur
fattaði hvað var að
hljóp út
settist inní bílinn
pabbi keyrði af stað og ég hringdi í support símann
"ertu til í að restarta servernum fyrir mig!"

eftir matinn sagðist storebror vera á leiðinni heim til mín þegar börnin væru sofnuð
þau voru hins vegar í óvenju stirðu skapi, og ég mátti sitja föst í Kópavogi til klukkan rúmlega 22
fylgdist á meðan með Þrúði sem var glaðvakandi og fékk verki í eggin
svo fékk ég að halda á henni og var eins og allgjör klaufi
2ggja vikna, algjör rúsina, en samt orðin góðar 18 merkur!

jæja, storebror skutlaði mér loksins heim og við kíktum oní húddið á bílnum mínum
pabbi hafði stungið uppá vatni á rafgeiminn
fylltum á
klik
klik
ekkert gerðist
ekkert snerist neins staðar
svissinn bara var í einhverri fýlu
svo storebror ýtti honum í gang eins og ekkert væri með þeim ráðleggingum að ég legði honum í Nóatúnsbrekkuna til að tryggja að ég kæmist aftur heim, því ég var jú á leiðinni aftur í vinnuna...

kom sumsé ekki aftur í vinnunna fyrr en 22:30 og átti allt of mikið eftir
staulaðist heim um 02:00, þ.e. upp Nóatúnsbrekkuna með súrmjólkina frá því um morguninn í poka
En viti menn
elsku litli bíllinn fór bara í gang af eigin rammleik, og ég fékk að bruna upp Lönguhlíðina með súrmjólk á milli fótanna

í þetta skiptið leit ég ekki í bókina ;)

22 júlí 2005

farin norður

jæja, þá er í þann mund að stinga af norður í land í faðm fjölskyldunnar
næstum því allt mitt uppáhaldsfólk (þám. allar Önnurnar mínar þrjár) verður saman komið að Hólum í Hjaltadal um helgina

:D

ég og gítarinn erum til, og ég á bara eftir að þurrka skítinn af hliðarspeglunum á bílnum áður en ég fer og sæki Önnu 2 og Stebba bróður hennar sem ætla að vera samferða mér norður. Anna fékk HBP í gærkvöldi, þannig að líklega sefur hún nú bara alla leiðina ;)

annars var dívuráðsfundur í gærkvöldi, til heiðurs Dóru dívu sem er á leiðinni í einhverja eftirsóttustu óperudeild í heimi og flytur af landi brott á þriðjudaginn!!!
húrra fyrir henni! grenj hvað ég á eftir að saknennar!

einhverjum sem finnst actionary skemmtilegt?
ímyndið ykkur þá dívu-actionary
allir athyglissjúkir og enginn feiminn!
úje
skemmst frá því að segja að ég var ekki búin að pakka þegar ég staulaðist á fætur í morgun

en allavega
sólskinið kallar!

vona að þið njótið helgarinnar öll sem eitt

*knús og kossar*

:Dagbjört sólskinsdís

19 júlí 2005

Þögn

þögnin kæfir mig

"Dagbjört, líður einhvern tímann sá dagur að þú syngir ekki?" spurði Dóra díva eftir að hafa deilt með mér hótelherbergi í 5 daga í nóvember.
"nei! ef ég syng ekki þá líður mér illa" var svarið

þegar ég var stelpa þá grét ég ef ég var hás og gat ekki sungið í nokkra daga


í gær (sunnudaginn 17. júlí)
var ég búin að þegja í 2 mánuði
eftir að hafa misst röddina rétt fyrir próf en samt pínt hana áfram fram yfir 8. stigs tónleikana
hása og ljóta

þögnin meiðir mig

ég er ekki lifandi á meðan ég þegi
og píanólaus í þokkabót
ekkert gaman að spila á gítar án þess að syngja

jamm, það má etv. sjá það á því hvað bloggin mín síðustu 2 mánuði eru dauf nema þau séu reið útaf einhverju eins og nornaveiðum og karlrembum.
fyrir utan í blábyrjun júní þegar ég var rétt búin að klára nokkur lög og var ennþá að anda þeim að mér...

að syngja ekki er að anda ekki
og ég hef ekki andað í 2 mánuði

fyrr en í gær :)
svaf lengur en ég hef gert í marga mánuði
vaknaði
borðaði í rólegheitunum
fór í sturtu

og söng
betur en ég hef gert síðan...
í janúar?

það vantar reyndar ennþá mikið uppá að allt sé í lagi, en þetta er loksins á réttri leið
loksins er ég farin að raula á meðan ég geng frá eftir matinn eða hengi út þvottinn
og í morgun á meðan ég hjólaði í vinnuna
loksins get ég slökkt á útvarpinu í bílnum
og sungið alla leiðina heim

og hver veit nema ég vakni bara syngjandi á morgun :D

17 júlí 2005

muh

ég er búin með bókina á innan við sólarhring (bara 607 bls!)
og það er ENGINN sem ég get talað við

þetta gerðist líka síðast

muhmuhmuhmuhmuhmuhmuhmuhmuh!

(ég gat eiginlega ekkert sofið í nótt! náði einhverjum 3 tímum og var alltaf að rumska og dreyma hvað kæmi næst...
svo ef ég hefði ekki ákveðið að skreppa til mömmu og snýkja kvöldmat, þá hefði ég verið búin með bókina klukkan svona 9 í kvöld
lestrartími: 17 klst (húrra! prímtala!!)
sumsé tæpir 3 tímar fyrir hverjar 100 bls)

og hvað á ég nú að gera á morgun og hinn? lýsti því yfir að ég kæmi bara kannski í vinnuna á mánudaginn, og langar nákvæmlega ekkert að vera þar, þar sem við verðum með gesti frá "The Evil Empire" (Londonskrifstofunni).

kannski ég lesi hana bara aftur !

nei, en ég held ég fari núna og kúri með hana og lesi aftur kaflann þar sem...

;)

15 júlí 2005

Þrúður



Nafn þetta er fengið úr goðafræðinni. Þrúður var dóttir Þórs þrumuguðs og merkir nafnið styrkur, - kraftur.


Fallbeyging

nf : Þrúður
þf : Þrúði
þgf: Þrúði
ef : Þrúðar

-----------

Haldiði að það sé flott!

Systkinin Náð, Gnýr og Styrkur :)

14 júlí 2005

Freyr, ég er ekki sátt við þig



you promised me blue skies
and days without rain
outlawing the wind
like once before
remember?

you promised suntans
from swimming outside
sunnyblonde hair
sun everywhere
and blue eyes blue eyes blue eyes all around

why did you take the summer away?
why did you take the summer away?
why did you take the summer away?

you promised me laughter
and playing outside
rollerblades, bikes
a warm beach
or almost

said it was my choice
to live in the sun
wear my bright skirts.
but it's not here
and my eyes are grey and gray and ...

why did you take the summer away?
why did you take the summer away?
why did you take the summer away?

10 júlí 2005

fallin

jæja
það hlaut að koma að því

það hefur heyrst ískyggilega lítið í mér undanfarið
ekki vegna þess að ég sé svo súper bissý að taka uppúr kössum
ónei
ekki vegna þess að ég hafi svo brjálað mikið að gera í vinnunni
ónei
meira að segja lá ég heima í 2 og hálfan dag í síðustu viku með massa kvef og hálsbólgu og er núna svotil alveg raddlaus
akkuru blogga ég þá ekkert?
ekkert að segja?
jújú
svosem nóg
með skoðanir á flestu eins og flestir vita

það er bara þannig
að ég er fallin
á minni hættulegustu fíkn
úje

ákvað fyrst að vera súper praktísk
ekkert gaman að taka uppúr kössum án þess að hafa eitthvað til að hlusta á
svo ég náði mér bara í HP5 hljóðbók niðrí vinnu og blastaði henni yfir alla 120 fermetrana sem storebror var svo góður að lána mér, á meðan ég tók upp bækurnar mínar og þurrkaði af þeim rykið í rólegheitunum
sem var ágætt
nema
svo fór ég að lesa uppí rúmi líka
á kvöldin
og svo
á morgnanna (mætti skömmustuleg klukkan 10:30 á föstudaginn þó ég hafi vaknað fyrir klukkan 8)
og núna
er ég tímabundið búin að missa áhugann á veruleikanum og dottin inní Hogwarts og nr 12 Grimmould Place
og farin að telja niður dagana fram að HP6

5 dagar og 2 klukkutímar


bók + ævintýri = stórhættuleg blanda!

best að skríða undir sæng að lesa...

07 júlí 2005

elsku bestu tjallarnir

mig langar bara til að dáðst að því hvað bretar virðast bregðast yfirvegað við árásunum.
etv. sýnir það hvað þeir eru jarðtengdir blessaðir
vissu að þeir máttu eiga von á þessu
að enginn er ódauðlegur
engin heimur óbreytanlegur

ég á ekki við að þetta fái ekki á þá
þeir virðast bara ekki vera með neina svona móðursýki
og vá hvað björgunaraðgerðirnar virkuðu vel skipulagðar

á meðan sífellt versnandi íslenskir fjölmiðlar kepptust við sína æsifréttamennsku sagði fólkið á staðnum rólega frá
"það er allt í lagi með mig!" sagði sótug ung kona með blóðtauma rennandi niður lappirnar, "það er fólk ennþá inni sem er miklu verr sett"
"við biðum í vagninum í 20 mínútur og hjálpuðumst að við að róa hvert annað" sagði maður úr einni lestinni
jamm, æðruleysi

þessir heilþvegnu sauðir hans Ósóma hafa ekki einu sinni komist nálægt því að hafa varanleg áhrif á breskt þjóðlíf og þjóðarsál

bretar eru yndislegir

allar góðar vættir veri með þeim

04 júlí 2005

smá getraun

jæja

langar einhvern að giska á hvað var það fyrsta sem ég tók uppúr kössunum?

a. allt í kaos
b. bækurnar
c. geisladiskarnir (cd)
d. dvd
e. eldhúsdót
f. föt

giskið nú. hvað er það sem ég get síst verið án?

:D

01 júlí 2005

lífið í kössum

jæja, þá er kona flutt!

í risastóru stofunni í íbúðinni hans storebror, sem ég þarf að fara að reyna að kalla íbúðina mína, standa kassar, skápar, kommóður, sófar og aðrar mublur í algjörri óreiðu.
meyjunni líður ekkert sérstaklega vel með það, en við vorum í svo miklu tímahraki að bera allt inn áður en bílstjórinn þurfti að fara í næsta verk, að þessir frábæru strákar sem komu til að hjálpa mér (gengið hans storebror, storebror sjálfur og pabbinn) fengu að skella öllu í einn haug á svo til miðju stofugólfinu.
það var rétt svo að mér tækist að komast að öðrum sófanum í gær, setja í hann pullurnar og kasta mér útaf með fréttablaðið í svo sem hálftíma.

en svona er nú bara til að laga það
mamman ætlar að koma askvaðandi um helgina og hljápa mér að taka uppúr kössunum. hún er algjör gimsteinn. mætti til mín á þriðjudagskvöldið og var bara í tæpa tvo tíma að pakka öllu eldhúsinu og því sem var eftir af stofunni. á meðan var ég að vesenast með einn bókaskáp! komst að því að ég á miklu meira af bókum en ég hélt. ætla að telja bókakassana á morgun og láta ykkur vita ;)

stærsta vandamálið eru hins vegar mublurnar sem ég bara get ekki bifað. eins og t.d. sjónvarpið. því var bara skellt á ganginn því það komst ekki inní stofuna, og það er ekki fræðilegur að ég nái því inní stofuna, og hvaþþá uppúr kassanum. skáparnir hillurnar og kommóðan eru í svipaðri stöðu. standa á víð og dreif um stofuna og ég get ekkert gert í því. stundum er óþolandi að vera einhleyp kona með ofnæmi fyrir því að biðja sér hjálpar (bað sko engan að hjálpa mér að flytja, storebror var svo yndislegur að bókstaflega hóta mér ef ég leyfði honum ekki að koma með strákana). enda auðvitað á að biðja storebror og pabba að færa þetta allt á réttan stað. fyrst þarf ég bara að ákveða hvar sá staður sé...

flutti sumsé seinnipartinn á miðvikudaginn og var svo kófsveitt allan daginn í gær að ganga frá og þrífa Reynimelinn. fór með um 450 dósir og flöskur (takk allir þeir sem hafa komið í partý) í endurvinnsluna og ætla því núna að skella mér á útsölu í Zöru og sólunda gróðanum beint í sjálfa mig.

ég er ekki orðin nettengd, svo ekki hafa áhyggjur þó það heyrist lítið í mér

*knús og kossar*

27 júní 2005

tékklisti fyrir flutninga

- skrá mig fyrir símanúmerinu mínu
- flytja símanúmerið mitt
- vesenast útaf ADSL og emailinu sem ég notaði aldrei en borga 1200 kall fyrir á mánuði
- vesenast í orkuveitunni svo konið mitt hætti að fá reikninga
- borga rafmagnsreikninginn sem hvarf
- pakka stofunni
- pakka eldhúsinu
- pakka fötunum
- pakka músíkinni
- flytja lögheimili
- láta póstinn vita
- láta mastercard vita
- láta og Vodafone vita
- láta Hringiðuna vita
- láta símaskrána vita
- einhverja fleiri?
- panta flutningabíl?
- kaupa morgunmat áður en ég æli

talandi um símaskrána!
frændi minn spurði mig að því hvort ég myndi ekki hætta að vera nemi í símaskránni, núna þegar ég er búin með 8. stig og komin í söngskólapásu.
vandamálið er bara hvað ég eigi þá að vera?
dettur helst í hug:

Dagbjört ævintýrakona

hvað finnst ykkur?
haldiði að einhver myndi misskilja þetta illa? hvernig?
haldiði að síminn myndi leyfa mér þetta?
einhverjar betri hugmyndir?

24 júní 2005

hæ hó

er einhver á lífi?
hvað er með internetið?
eina síðan sem virkar er blogger...
já og google

msn niðri
tölvupósturinn niðri
mbl
skrítnast

22 júní 2005

pínu undirbúningssöknuður

the sun licks the city
early morning birds are singing lovesongs
out there
I try to join them
but how can I sing lovesongs when I'm empty
in here

the grass is fragrant
my rose is in bloom
the blue sky is smiling
it shed it's cloak of darkness
to a midsummer groom

and then it's daytime
I put on my green summer skirt and
I try
to shake off my torpor
but really want to crawl back 'neath my duvé
and...


blah
svo vantar hin erindin
ætli þau komi ekki í haust þegar ég hef tvöfalt fleiri manns til að sakna...

þá verða ca. 12 af mínu uppáhaldsfólki hinum megin við hafið *grenj*

en þá verður reyndar ekki lengur miðsumar :S

15 júní 2005

5 milljón systur mínar myrtar

ég hef löngum velt því fyrir mér hvað það sé sem er að í heiminum
einu sinni hélt ég að ég myndi aldrei finna svarið
það er auðvitað samspil margra þátta, en það er þó hugsanlegt að rótin að því flestu liggi í um 1700 ára gömlu samsæri og valdabrölti viðbjóðslegra manna allar götur síðan.

stór hluti af þessu samsæri, eftir því sem það vatt uppá sig eins og snjóbolti frá helvíti, var að minnka áhrif og völd og virðingu kvenna. Vegna þess að þeirra menning ógnaði valdi þessara viðbjóðslegu karla, sem smátt og smátt krepptu hnefann í ógnarstjórn yfir heiminum. við vitum öll að vald þeirra byggðist á ótta. Þeir stjórnuðu manninum með því að þykjast stjórna því sem hann óttaðist mest.

Á endanum ákváðu þeir að leggja í skipulagða útrýmingarherferð á menntuðum og sjálfstæðum konum. Vísindakonur, sem á þessum tíma stunduðu t.d. náttúruvísindi, lækningar, voru ljósmæður og margt fleira. Konur sem á einhvern "yfirnáttúrlegan" hátt skildu stærðfræði! Konur sem þorðu að segja skoðanir sínar. Konur sem af handahófi fóru í taugarnar á einhverjum körlum. Voru kannski ekki nógu fríðar. Eða fóru í taugarnar á einhverjum konum. Voru kannski OF fríðar.

Í sumum hlutum Evrópu fóru útrýmingarsveitir um bæjarfélögin og völdu úr konur til að brenna til dauða. Af hverju lét fólk þetta viðgangast? Ótti, að sjálfsögðu. Hvað annað getur valdið öðru eins ?

5 milljónir! Fyrir 300 árum, þegar mannkynið var að fjölda aðeins brot af því sem það er nú!
hvílík blóðtaka!

Og konurnar sem eftir voru, voru þær sem voru þægar og góðar, og viðbjóðslegu mönnunum þóknanlegar. Og svo kannski örfáar í viðbót sem tókst að fela sig. Þykjast. 300 ár af ofsóknum, hvað ætli það hafi gert fyrir sjálfsálit kvenna. Og genauppbyggingu! Ætli þeir hafi ekki bara komist langleiðina með að útrýma vísindagenunum af x-litningnum?

Ef þetta hefði komið hingað á skerið okkar, þá væru fæstar okkar til í dag. Ef þetta hefði komið hingað núna þá værum við systir mín og móðir að öllum líkindum með þeim fyrstu á bálköstinn. Forstjóri, læknir og tækninörd! Við bara hljótum að vera verk djöfulsins! Ef svo er, þá hljótum við að hafa átt formæður sem voru það líka...

En Ísland slapp. Hér var engin skipulögð útrýming. Bara nokkrir karlar sem notuðu þetta sem afsökun til að losa sig við einhverja aðra karla sem fóru í taugarnar á þeim, og einn klikkaður prestur á sveppum. Hamingjunni sé lof fyrir það. Hvernig væri Ísland án allra þessara sterku kvenna?

Mér þætti forvitnilegt að vita hvort löndin sem lentu verst úti í útrýmingarherferðinni standi sig verr í jafnréttismálum en önnur lönd. Mér hefur alltaf þótt áberandi þegar ég kem til útlanda hversu lítil virðing er borin fyrir konum þar, miðað við það sem ég er vön. Því miður er þessi skakka erlenda menning sífellt farin að hafa sífellt meiri áhrif á okkar samfélag. Hvert flytur maður þá?

Ég held að þessir viðbjóðslegu karlar hafi sett veröldina úr jafnvægi. Það er það sem er að henni. Okkur svimar öll. Spurning er bara hvort nokkurn tíman verði hægt að finna þetta jafnvægi aftur.

07 júní 2005

Upptaka handa ykkur - loksins!

jæja, þið hljótið að vera komin með algjört ógeð á öllu mínu röfli um Dagurinn líður

ég bara get ekki hætt að vera í sæluvímu yfir því!
þetta hef ég nefnilega aldrei upplifað áður

hef alltaf verið með hausinn fullan af alls konar vitleysu, bæði tónlist, sögum og plönum

plönin ganga auðvitað aldrei eftir
sögurnar eru bara rugl
og tónlistinni hef ég ekki getað náð almennilega út
fyrr en núna

og núna
í fyrsta skipti
er raunveruleikinn svo miklu æðislegri en ímyndunin gat gert sér í hugarlund!

því halló! hvaða tónverk er jafn flott í hausnum á manni eins og það er í alvöru flutningi alvöru tónlistarfólks!!!

*andvarpandvarpandvarpandvarp*

og hún Dóra yndið mitt gerði þetta svo vel!
og nú getið þið fengið að heyra!

hér (á mp3 formi)

með góðfúslegu leyfi Dórunnar minnar *knús og kossar* sætust!

p.s. ef þið misstuð af því hér að neðan, þá er ljóðið eftir Tómas Guðmundsson, úr ljóðabókinni Við sundin blá eða á blaðsíðu 80 í stóru Tómasarbókinni (sem þú átt t.d. storesös)

06 júní 2005

dora_burt.pts

verkefni kvöldsins er að mixa burtfararprófstónleikana hennar Dóru dívu

svo vonandi fáið þið að heyra "Dagurinn líður" á morgun :)

svo er víst best að fara að standa við öll þessi loforð um að láta fólk fá nótur ;)

meira seinna - pro tools bíður!

:D

Hversdagsleikinn?

tja...

ég byrjaði á að draga allt nördagengið uppí skorradal í fjórhjólasafarí, veggjaklifur, axarkast osfrv. Endaði að sjálfsögðu með bjór og grilli (og slatta af eplasnafsi) fram eftir nóttu :)

sweet
hefði aldrei trúað því hvað það er GEGGJAÐ gaman á fjórhjólum
(já elsku umhverfissinnar, þetta var allt eftir fyrirfram ákveðnum leiðum og ekki verið að spæna upp neitt af fósturjörðinni - haldiði að ég hafi ekki verið búin að dobbeltékka það???)
en sumsé, vindurinn í andlitið, fjöllin, firnindin, nýbornu lömbin, hestarnir...
barasta íslensk náttúra eins og hún leggur sig og ákaflega vel taminn og kröftugur fákur undir manni ;)

fór auðvitað í algjöra sveiflu yfir því að vera pínd til að vinna inni í allt sumar! ! !
*hneiksl*
það er svo andstætt eðli mínu að mér finnst það vera brot á mannréttindum mínum!

jamm

svo var Gerard Butler kvöld hjá dívuráðinu á laugardaginn, en fyrst fórum við út að borða á Tapas barnum. Viðfangsefnið var kroppasýningin og gamanmyndin Tomb Raider 2, og ekki hægt að segja annað en að það hafi verið mikið hlegið og svo líka pínu stunið ;) Svo var töluvert velt vöngum yfir því hvers vegna allir flottir karlmenn eru svona gamlir (GB er 36). Mér finnst það frekar augljóst. Hver vill stráka? Jú, kannski sumar stelpur. En konur? Þær vilja menn. Og dívur þess þá heldur ;)

En að öllu gamni slepptu, þá liggur við að kona hafi alveg jafn mikið að gera eftir allt saman. Nema bara núna er það við að hitta fólk. Sem er auðvitað frábært, því þannig á sumarið að vera.

Og fólk er líka best.

*knús og kossar*

31 maí 2005

frííííííííííííííííííík!

vátsj hvað það hefur verið erfitt að einbeita sér í vinnunni í dag!
það komast nebblilega engar hugsanir að í hausnum á mér
hann er svo stútfullur af tónlist

var að taka upp til að verða 3 í nótt
byrjaði um leið og ég kom heim, þ.e. eftir að ég hafði stungið frosinni pízzu í ofninn

ég er núna orðin einbúi, sambó er fluttur heim til Færeyja :(

það byrjaði líka svona glæsilega:

konið mitt hringdi í mig klukkan hálf tíu og ég ráfaði um íbúðina í hálfgerðri maníu á meðan ég lýsti ástandinu fyrir henni
tónlist tónlist og meiri tónlist
svo var ég komin inní eldhús og fann einhvern voða hita leggja frá eldavélinni :þ
þá var sumsé pízzan búin að vera í ofninum í 2 og hálfan tíma
ég hef nefnilega svo lélegt lyktarskyn
og hausinn á mér var týndur í tónlist

hún var svona líka skemmtilegur kolsvartur hálfmáni
þar fór kvöldmaturinn :(

jæja, svo hélt ég sumsé áfram til 3 í morgun þegar mér tókst með einhverjum undraverðum hætti að tæma höfuðið nóg til að sofna
vaknaði samt eins og skot klukkan rúmlega níu
þurfti að vesenast
og vesenast
bleah

þegar ég kom loksins í vinnuna rúmlega 13, þá tók það mig heila eilífð að ná mér nógu mikið niður til að geta gert eitthvað af viti
hvernig er hægt að koma skipulagðri kóðahugsun í haus sem býr til meiri hávaða en 7 útvarpsstöðvar á fullu?
það sem virkaði loksins var að skella Absolution (með Muse) í eyrun á fullu blasti
þá róaðist ég
hversu bizarre er það?

kannski Matt sé Mozart rokksins :þ

ha? hafiði ekki heyrt að Mozart eigi að hjálpa manni að einbeita sér? Hann er svo súper-strúktúraður að hann hjálpar heilanum að skipuleggja sig

úje


á morgun tekur hversdagsleikinn við!
hvernig ætli hann sé?
kvíði honum nú pínu :S

frííííííííííííííííííík

eða sko
ég er nú með eitthvað af ljóðum í bakhöndinn til að semja við í sumar
svo er ég líka að flytja
og kannski ég opni nokkra bækur!

víííííííííí

hversdagsleikinn
skal aldrei
inn fyrir mínar
dyr
koma

en mig vantar fólk :(

meðleigjandi óskast
í stóra íbúð í hlíðunum
má ekki vera sjónvarpsfíkill
píanó verður á staðnum
og tölva til eigin nota
má endilega vera eitthvað í tónlist
en ekki dópi

29 maí 2005

dagurinn líður

ég er hálf uppgefin
en um leið svo full af yndislegum skynjunum og tónum dagsins

sund úti í sólskininu
heilt k
mmmmmmmmmmmmmmmmmmmmmmmmmmmmmm
loksins!

en það var nú bara byrjunun

Dóra díva var hreint út sagt stórkostleg
á burtfararprófstónleikunum sínum í Langholtskirkju
hún hefur aldrei verið jafn glæsileg og falleg, og röddin!
hún er farin að hljóma virkilega pró
hún frumflutti "Dagurinn líður" svo undurfallega að ég táraðist og átti hálf bágt með mig þegar hún kallaði mig uppá svið eftir lagið til að hneigja mig
hún söng það SVO VEL !!!
*andvarpandvarpandvarpandvarp*

og svo var auðvitað allt sem hún söng á tónleikunum frábærlega gert
og mikið af flugeldum, sérstaklega í lokin
hún er bara æði

úff og svo
ef þetta var ekki nóg
þá fór ég á tónleika með Portúgölsku Fado söngkonunni Marizu
Fado fado fado
úfffffffffffffffffffff
hún söng með öllum líkamanum
dansaði um sviðið
innlifunin


allar þessar skynjanir fljóta stjórnlaust um inní mér, og einhverskonar undirmeðvitund reynir að koma skipulagi á þær
ég veit hvar þær enda
þær geymast vel í þeim hluta heilans sem við köllum í daglegu tali hjartað
svo brjótast þær út, ummyndaðar í einhvers konar tónlist
:)

svona dagar!

"En þaðan stíga sumarkvöldsins söngvar er sól til viðar hnígur" (úr Dagurinn líður)

25 maí 2005

nörd

jæja
kominn tími á að tjá sig aðeins um þetta orð

nörd, sjáið þið til, virðist nefnilega vera eitt af þessum viðkvæmu orðum
sumir líta á það sem bara svona orð sem þeir nota
en aðrir eru alveg hreint svakalega viðkvæmir fyrir því
sumir tengja sjálfsmynd sína við það
aðrir sjá það sem eitthvað voða neikvætt

jamms, stórhættulegt, því sumir virðast leggja eitthvað svo mismunandi merkingu í það

svo það er kannski gott að fara aðeins yfir sögu þess í íslenskri tungu, eins og ég hef upplifað hana:

einu sinni var nörd kannski eitthvað neikvætt orð
svo var það skilgreint sem "nær öldungis ruglaður drengur" og var þar með orðið fyndið :)
svo komu tölvurnar til sögunnar svo um munaði, og nördarnir sigruðu tölvuheiminn og urðu alveg hreint svakalega ríkir sumir. húrra fyrir því!

þegar ég var í HÍ (97 - 00) var orðið þó ennþá ákaflega viðkvæmt.
þannig var mál með vexti að hópur nörda vildi breyta nafni FT (félags tölvunarfræðinema) í Nörd !
þeir sem voru viðkvæmir fyrir því að vera kallaðir nördar börðust á móti þessu og í nokkur ár var tillagan felld.
það var ekki fyrr en stelpurnar höfðu tekið völdin í félaginu og þessir viðkvæmnisguttar, sem voru ekki búnir að fatta að nörd væri kúl orð, voru flestir útskrifaðir (eða bara flosnaðir uppúr skólanum), sem tókst að veita þessu ágæta félagi sitt réttmæta nafn :)

Síðan þá hefur orðið nörd fest sig í sessi, amk. á meðal tölvunarfræðinga, sem orð sem við einfaldlega notum hvert um annað.

ég kalla líka marga vini mína nörda, þó svo þeir séu ekki allir í tölvum.
t.d. þekki ég ansi marga tónlistarnörda m.m. sem eru alls ekki ósáttir við þá nafngift

í mínum huga er nefnilega hægt að vera nörd á margt annað en tölvur
nörd myndi þá skilgreinast sem einhver sem hefur meiri áhuga á einhverju ákveðnu en herra meðaljón jónsson og frú og eyðir etv. töluverðum tíma og peningum í það
sumsé - fólk með áhugamál, sem heldur jafnvel úti síðum um áhugamálin.
t.d. eru til ansi margi Harry Potter nördar í heiminum.

samkvæmt þessari skilgreiningu er ég víst:
tónlistarnörd
bókanörd
tölvunörd
(í þessari röð)

þekki líka fáa sem ekki eru nördar á eitthvað
sjónvarpsnördar
bíónördar
bílanördar
bloggnördar ;)
osfrv.

síðast þegar ég sagði orðið nörd á blogginu mínu þá fékk ég eitthvað af reiðum innleggjum sem komu mér verulega á óvart, þar sem allir í kringum mig skilja þetta orð sem gott orð. reyndar lenti ég einu sinni á deit þar sem gaurinn fékk hálfgert áfall þegar ég sagðist vera nörd...

þeir sem eru ennþá viðkvæmir fyrir þessu orði, þeir þekkja greinilega ekki merkingu þess meðal nörda í dag.
ég sagði einu sinni við vinnufélaga minn, þegar ég komst að því að hann hafði ekki lesið belgísku og frönsku teiknimyndasögurnar sem við ólumst nú flest upp við "þú ert þá ekki alvöru nörd!" hann varð alveg gríðarlega sár! Það var auðvitað alls ekki rétt hjá mér, en líklega er hann bara ekki mikill bókanörd :þ

nördar eru bara fólk, eins og ég og þú og langflestir sem ég þekki
ég er meira að segja farin að nota þetta sem gæluorð

"jæja sæta mín!"
"jæja nördið mitt!"

nördar lifi!

24 maí 2005

words of ... hmmm

welcome to a realm of imagination
please take off your shoes and socks before continuing further, as freeing your toes is the first step to freeing your mind

22 maí 2005

halló jörð!

jæja, þá er maður svona um það bil að lenda :)
allt í kringum prófið og tónleikana var mjög undarlegt og svo fór sólin að skína og þar með fór nætursvefninn :)
prófið gekk ekki eins vel og ég er vön, svo allt fór í algjört panikk fyrir tónleikana
áttuðum okkur á að formið (sérstaklega í hæðinni) var einfaldlega ekki komið til baka, því miður :(
ég varð því að leggja áherzlu á túlkun og útgeislun, en þar sem ég var með mikið á íslensku þá gekk mjög vel að ná tengslum við áhorfendur - sem kunnu líka vel að meta lögin mín :)

takk fyrir stuðninginn, allir sem komu, og líka þið sem komust ekki en hugsuðuð til mín :)

Iwona var búin að stríða mér heilmikið yfir að ætla að syngja lög eftir sjálfa mig, en tilgangurinn var auðvitað að kynna þau fyrir samnemendum sem fjölmenntu á tónleikana
það tókst heldur betur og mér fannst æði að fá að tala um lögin mín við áheyrendur og fá pantanir frá stelpunum

já, söngdívurnar vilja ólmar fá að syngja Rósir, á meðan spekúlantarnir voru hrifnari af Krumma og töluðu um kontrast (íslenska?) á milli krunksins í krumma (píanóið krunkar) og áberandi sönglínu. Þ.e. þessi tvö megin þemu í laginu, krunkið og söngur krummahjartans, þau komust til skila! það er fátt eins æðislegt eins og að leggja verkin sín fyrir aðra og finna að fólk skilur þau ! ! !

en það er ekki allt alveg búið
ég var, fyrr í dag, að klára lokaútgáfuna af "Dagurinn líður"
Dóra díva er búin að læra laglínuna, en ég var aðeins að dytta að undirspilinu, því 5. erindið var gert í of miklu stressi um daginn. það bara var ekki rétt - vantaði í það róna sem býr í textanum. svona égeralvegaðsofna stemningu. held hún sé komin núna með rólegum fallandi litlum þríundum, eins og í vögguvísunum :)

Annars fæ ég alveg svakalegan fiðring út úr því að nota dúrhljóma úr allt öðrum tóntegundum allt í einu í miðju moll-erindi. fyllir allt af von, einhvern veginn. mmmmmmmmmmmmmmm. dúr á lækkuðu 7unda (svosem ekki það skrítið) eða jafnvel á 3ja - veit ekki einu sinni hvort ég kunni að greina hann út frá klassískri hljómfræði...
6. sæti með stækkaðri 5und, stækkaðri 9und og án 3undar ? nja.. líklega yrði þetta flokkað sem (mjög) tímabundin tóntegundaskipti.

ég get varla lýst því hvað það er spennandi að láta þetta stærsta verk sem ég hef gert hingað til, í hendurnar á listakonu sem blæs í það lífi. ég fæ að mæta á æfingu hjá þeim í vikunni, til að gefa þeim ábendingar. svo á tónleikunum um næstu helgi þá fæ ég bara að sitja í rólegheitunum útí sal og njóta þess að hlusta á hvernig ljóðið hans Tómasar, lagið mitt og túlkunin þeirra myndar heild sem vonandi skilar sér til áheyrenda.
þetta barasta hlýtur að vera besta listform í heimi!

hmmm, reyndar getur verið að ég þurfi að vera að hamast við að taka upp þessa blessuðu tónleika - vona bara að vélin mín standi sig :S

jæja best að bruna til dívunnar og afhenda herlegheitin útprentuð og fín :)

*knús og kossar* þú yndislegi græni og blái (og bleiki ;) heimur

17 maí 2005

Nákvæm staðsetning Söngskólans

er:
Snorrabraut 54
sem er gamla Osta&Smjörsöluhúsið
þetta hvíta með strompnum
sem varð svo OZ
og svo seldi Skúli það Söngskólanum og tilkynnti mér að þannig yrði ég í raun aldrei laus við þá Ozara blessaða :)

tónleikarnir eru svo í lágu bakhúsi á bak við Söngskólann, sem Ozarar áttu það til að kalla Fjósið hér í gamla daga ;)

hér er ég annars þegar uppsungin á leiðinni í sturtu og hlakka til að sjá ykkur

*knús og kossar*

:Dagbjört söngdís

07 maí 2005

tíminn hleypur

klukkan er hálf þrjú og ég er ekki enn komin niðrí skóla að æfa mig!

dagurinn líður átti líka að klárast í dag, en það er samt alveg 90% tilbúið
bara svona 4-5 taktar af undirspili sem þarf að pússa

en allur dagurinn virðist ætla að fara í vesen og slór :S

nei takk,

ég er farin!

góða helgi allir!

Tónleikar 17. maí

Bara svona til að vera viss um að það fari ekki framhjá neinum þá vil ég enn og aftur minna á 8. stigs tónleikana mína, þriðjudagskvöldið 17. maí!

Efnisskráin er um það bil tilbúin, en inná henni eru m.a.


  • dramatísk ljóð eftir Johannes Brahms

  • alísklensk sönglög eftir Jórunni Viðar

  • rómantísk sönglög eftir Grieg

  • söngleikjalög

  • aríur

  • Krummi
  • Rósir

  • og fleira :)



Margrét Einars deilir með mér tónleikunum, en hún ætlar líka að syngja Brahms, svo og Sibelius, Kalla Run, Mozart, Webern ofl. Hólmfríður leikur undir hjá henni.

Með Margréti leikur Hólmfríður Sigurðardóttir á píanó.

Ekki má gleyma henni Iwonu minni sem leikur á píanó með mér, en hún er í miklu uppáhaldi á mínum bæ, enda bæði frábær píanisti, kennari og vinkona!

Tónleikarnir verða í sal Söngskólans í Reykjavík, Snorrabúð og hefjast klukkan 20.

Hlakka til að sjá sem flesta

06 maí 2005

ímyndunarfyllerí

nei ég er ekki að tala um að ímynda sér að kona sé full...

heldur að fá sér of stóran skammt af ímyndunarafli:

þekkti einu sinni stelpu sem týndi sjálfri sér stundum
hitti t.d. strák sem henni fannst flottur
bjó til á hann karakter í hausnum á sér
bjó til karakter á sig í sínum haus sem hún hélt hann myndi fíla
lék hana
og hélt svo innilega að hún væri ástfangin (og hann líka) að hún upplifði allt sem því fylgir
þá meina ég:
hæðirnar (fólk sneri sér við þegar hún gekk fram hjá, því hamingjan bara geislaði af henni - eins og af ástföngnu fólki)
og lægðirnar ...þegar allt fór í vaskinn (buuuhuuuu osfrv.)
litli ruglukollur!

spurningin er hins vegar:
ef kona ímyndar á sig karakter myndu sumir segja að hún væri ekki hún sjálf
en ef hún er ekki hún sjálf, hver er hún þá?
hver er kona sjálf annað en sambland af meðfæddum og lærðum viðbrögðum og hugmyndum?
finnur kona sig þá ekki upp sjálf?

afhverju er ég að pæla í þessu?

hef nebblilega sjálf pínu tendens til að aðlaga mig að aðstæðum
t.d. er ég pínu ringluð yfir því að guttarnir úr vinnunni ætla að mæta á 8. stigs tónleikana mína, sem þýðir að þeir fá að sjá mig í allt öðrum karakter en í vinnunni
þýðir það að ég sé ekki ég sjálf í vinnunni?
eða ekki ég sjálf í skólanum? jú, ef ég er einhvers staðar ég þá er það í tónlistinni. ég veit það, því hvergi líður mér jafn vel...
en en...
í morgun á leiðinni í vinnuna, þegar ég var að setja mig í gírinn, þá flaug inn í hausinn á mér að ég væri að fara að leika mömmu í vinnugírnum. vátsj! er ég virkilega farin að líkjast henni!
en hún er nú líka allt öðruvísi heima en í vinnunni...
eru þá ekki bara allir svona?

minnir að í félagsfræði 103 hafi ég lesið eitthvað um svona.
hlutverk, minnir mig að þetta væri kallað
og að börn yrðu ringluð þegar t.d. frænka þeirra kæmi í heimsókn á leikskólann
einhver sem tilheyrir ekki því umhverfi heldur öðru umhverfi sem þau þekktu líka

og hvað gerist ef ég fer allt í einu í vinnukarakterinn á tónleikunum?

bleah! þvílíkt rugl!
ég er farin að hugsa í hringi...

best að spyrja út í tómið:
eruð þið eins heima hjá ykkur og í skólanum/vinnunni/kórnum/boltanum osfrv ?

02 maí 2005

Yndislegi heimur!!!

þú rignir koddum og blæst hunanglegnum draumum...

nei, bara að grínast!

en þú ert nú samt yndislegur heimur
í dag

því ég er heil kona

og algjörlega skrímslislaus!!!


og Dóra díva tók Dagurinn líður í smá lestraræfingu í dag og blés í það svo miklu lífi að allar mínar áhyggjur af geispum tónleikagesta flugu beinustu leið út um gluggann
hún á eftir að gera þetta svo geggjað vel :)
bað um að það yrði tileinkað sér...
nema hvað!
það er enginn smá lúxus og innblástur að fá að semja fyrir svona hæfileikaríka söngkonu og skemmtilegan túlkanda
án hennar hefði þetta lag aldrei orðið til!
tileinkað henni? - Að sjálfsögu!

*ljóm*

og svo er sólin farin að skína

og það er vor

húrra! húrra! húrrrrrrrrrrrrrrrrrrrrrraaaaaaaaaaaaa!

ég er ástfangin af maí
en það hef ég reyndar alltaf verið ;)

Dagurinn líður

svo fagrar eru sorgir vorsins síðla er sól til viðar hnígur
(Tómas Guðmundsson)

mmmmmmmmmmmmmmmm
þetta bara verður að syngjast

lagið er alveg að verða tilbúið (undirspilið þ.e.)

bara aðeins eftir við 5. erindi
er samt komið mestallt í puttana, og þá er hálfur sigur unninn ;)

já einmitt 5. erindi!

ljóðið hans Tómasar er 5 róleg en falleg erindi

og lagið verður því 5... róleg ? erindi

vona bara að fólk sofni ekki ;)

29 apríl 2005

muh

mig vantar knús...

28 apríl 2005

úúúúúúúbbbbbbs!

æjæjæjæjæjæjæj!!!

ég er á síðustu metrunum!
eftir morgundaginn er venjulegur skóli búinn
bara prófið og tónleikarnir eftir (muna muna 17. maí!!!)

þarf bara að halda út sjálfsaga í 3 vikur í viðbót
vera sterk...

og hvað geri ég svo núna rétt áðan????

HVAÐ GERI ÉG????

þurfti aðeins að skreppa á amazon til að sinna nauðsynlegum verslunarmálum (sumt bara fæst ekki á Íslandi...)
en þurfti, í leiðinni, ENDILEGA að fara að skoða...

bækur

já sem væri svo sem allt í lagi,
nema hvað ég datt niður á bækur eftir Guy Gavriel Kay
sem eru historic fantasy bækur - byggðar á mikilli heimildavinnu
mjög ídettilegar
Kay þessi, hann skrifaði trílógíu (Fionavar Tapestry) sem ég las fyrir mörgum mörgum árum (10+)
uh, las er kannski ekki alveg rétta orðið
DRAKK Í MIG
er nær sannleikanum
þær voru (ásamt Elísu og mjög svo fallegum fjólubláum skóm) kveikjan að trílógíunni minni (Magic of Purple) !!!
so now you know!

nema hvað,
mín fór að lesa umsagnirnar á amazon, og þessar nýju bækur hans ku vera töluvert betri en þær sem ég svolgraði í mig 17 ára

svo mig, bóksveltri stúlkukind, fór að langa
allískyggilega
að detta inní annan heim
bara smá...
(það er svo langt að bíða til 16. júlí - verð að fá upphitun!)

svo leit ég upp
í hilluna yfir skrifborðinu mínu
og sá þessar tvær bækur
þar

ég á þær
þær eru hérna
keypti þær fyrir nokkrum árum á bókafylleríi í Montreal, en komst aldrei yfir að lesa helminginn af því sem ég keypti
gleymdust hálfpartinn
og bíða betri tíma

sem er ekki í dag
ekki á morgun

...anda inn
anda út

segja við sjálfa sig:

"þú æltar EKKI að byrja að lesa TVO ævintýra-doðranta rétt fyrir próf!!!
þú mátt BARA lesa teiknimyndasögur og alvarlegar bókmenntir fram yfir 17. maí
ferð snemma að sofa
vaknar snemma
ferð í sund og pilates
borðar ekki nammi (ís leyfilegur á sunnudag)
drekkur ekki áfenga drykki (þó þú sért í partýum næstu tvö kvöld)

engin ævintýri!

í hamingjunnar bænum! raunveruleikinn þinn er súper-spennandi, þú þarft ekki að fara á eitthvað tilvistarflakk!

sökktu þér frekar í Dagurinn líður og hættu þessari vitleysu!

og hananú!"

muh!

allur móralskur stuðningur vel þeginn....

góða nótt

p.s. er að syngja með kórnum á synfó tónleikum annað kvöld. Berlioz - Fordæming Fausts. Mæli meððí!

26 apríl 2005

draumafyrirtækið

í tilefni af umræðu um framkomu við starfsfólk, lagði ég fram eftirfarandi kenningu:

--kenning hefst--
Ef ég væri að stofna hugbúnaðarfyrirtæki þá myndi ég:

  • Eingöngu ráða konur

  • ráða þær eingöngu í 80% starf

  • borga þeim 100% laun

  • fá 120% afköst

--kenningu líkur--

Rökin eru þessi:

Konur eru mjög duglegar, sérstaklega þegar þeim finnst vera gert OF vel við sig. Ef maður borgar þeim meira en þeim finnst þær eiga skilið (100% laun fyrir 80% starf), þá leggja þær sig allar fram um að standa undir því. Þær kunna virkilega vel að meta 80% starf, því þær hafa svo margt annað að gera sem karlar einhvern veginn sleppa oftar við. Auk þess sem það er algjör vitleysa að láta fólk vinna yfirvinnu, því heilinn hættir að gera neitt af viti eftir langan vinnudag. Hann er jú bara vöðvi, og þarf hvíld.

80% vinna - súpergóður mórall - 120% framlag

(plús: þær konur sem eru góðir tölvunarfræðingar eru mjög góðar ;)

24 apríl 2005

heimsfræði

Fór í gær á alveg hreint frábæran fyrirlestur í Háskólabíói:
"Rúm, tími og þyngd í afstæðiskenningu Einsteins"
sem er hluti af fyrirlestraröð fyrir almenning í tilefni af ári eðlisfræðinnar, sem kallast "Undur Veraldar" (sjá edlisfraedi.is)

framsetningin var einmitt nægilega einföld til að almenningur gæti skilið þessa hluti, sem eru vægast sagt ákaflega spennandi.
meðal þess sem við lærðum var að

  • tíminn líður hraðar fjarri þyngdarsviði

  • og þar með hægar nálægt þyngdarsviði

  • og stendur í stað við sjóndeild svarthols

  • og út af þessu, svokallaða bláviki, þarf að leiðrétta GPRS staðsetningarkerfið um 11 km á sólahring...

  • ljósið beygist nálæt þyngdarsviði

  • og þess vegna getum við séð sömu stjörnuna á 3 stöðum á himninum

  • en bara ef hún er á bak við stóran vetrarbrautaklasa

  • ...eða kannski er það bara rúmið sem beygist

  • OG: hulduefni er að verða viðurkennd stærð í eðlisfræði

  • og það er orka í tóminu...


vátsj!!
þegar ég var í stjörnufræði í menntó, fyrir tæpum 10 árum eða svo, þá var það bara mikli hvellur, heimurinn varð til, heimurinn þenst út, hægar og hægar, heimurinn skreppur saman, heimurinn fellur saman og ekkert, nema kannski endurtekur þetta sig allt saman.
það var heimsmyndin
frekar óspennandi
svo 1998
þá komust þeir að því að heimurinn þenst út hraðar og hraðar
hann ætlar sko bara alls ekki að skreppa saman aftur
og allt í einu er óhemjumikið af spurningum ósvarað
fyrirlesarinn viðurkenndi að 70% af "alheiminum" (vont orð á þessum tímum), þ.e. okkar plani af heiminum, okkar skynjanlega heimi...
70% væri eðlisfræðilega óþekkt
þ.e. ekki þekkt efni
5% er það sem við sjáum
25% (minnir mig) er hulduefni
og 70% hafa menn bara ekki hugmynd um hvað er...

ef það er ekki spennandi... þá veit ég ekki hvað spennandi er
enda þyrpist nú fólk í stjarneðlisfræði
og vá hvað ég skil það vel!

:D

22 apríl 2005

Dagurinn sem heltekur

ætli þetta muni gerast í hvert einasta skipti sem ég sem nýtt lag?
ég meina,
það er svo lítið mál að finna laglínuna
hún bara kemur
eins og ekkert sé
svo framarlega sem ljóðið grípi mig þá myndast stemningin bara og lagið verður til
og þökk sé tónheyrnarþjálfuninni kemst það fljótt og nokkuð örugglega á blað...

en undirleikurinn: þvílíkur höfuðvekur!!!

og ég fyllist efasemdum
um að ég geti nokkuð
hafi nokkuð að gera í tónskáldið...

það er ekki vegna þess að undirleikurinn neiti að verða til
- hann fæðist yfirleitt fljótlega á eftir laglínunni, ef ekki um leið -
þ.e. ekki nóturnar
heldur tilfinninginn
tilfinningin sem ég veit að hann á að skapa
bragðið að honum
vandamálið er að hann býr í hjartanu á mér
og að koma honum úr hjartanu yfir í heilann: það þarf að gerast í gegnum hendurnar!

og þær greyin eru bara alls ekki nógu klárar á píanó :S

og ég get ekkert stjórnað því hvernig hann verður
eða reynt að glamra eitthvað annað sem er auðveldara
því það er alls ekki ég sem sem hann
hann bara verður til
einhvers staðar í undirmeðvitundinni
tekur af mér völdin

svo ég sit og sit og glamra og prufa
en ekkert hljómar eins og hjartað mitt veit að það á að hljóma
og ég engist
í vikur...

*andvarp*

en svo loksins
einhvern daginn
kannski þegar ég kemst í almennilegt píanó...
þá finn ég hann
og hann heltekur mig

í þetta skiptið er það "Dagurinn líður"
5 erindi eftir Tómas!
það flóknasta sem ég hef samið hingað til...

og ég fann hann í gær!

sumargjöfin mín!

***********ljóm*************

Buckley, Bellamy, Che og allir þessir listar

sambó gerði þvílíkt grín að mér þegar ég sagði honum frá Jeff Buckley draumnum um daginn
"þú ert eins og systir mín sem dreymdi um Jason Donovan í gamla daga!"
YEAH RIGHT! :þ
--sjálfsvörn byrjar--
sko
stelpur sem eru skotnar í poppstjörnum eru skotnar í þeim af því að þeir eru stjörnur
og frægir
og sætir
og sexý
og glenna sig í myndböndum
Jeff Buckley í draumnum leit ekki einu sinni remotely út eins og Jeff Buckley, enda var ég ekkert með skýra mynd af honum í hausnum (kíkti hins vegar á hulstrið af Grace þegar ég vaknaði)
vegna þess að þetta Jeff Buckley æði mitt
(og Matt Bellamy (í Muse) æðið mitt haustið 2003)
snýst nákvæmlega ekkert um persónu hans
né smetti
né magavöðva, upphandleggsvöðva né neitt því um líkt
það snýst algjörlega og eingöngu um tónlistina
tónsmíðarnar, sönginn, hljóðfæraleikinn, textana, röddina
tónlstarsköpunina
tónlistinn bara snertir mig á einhvern sérstakan hátt
svo ég finn til
og hananú
--sjálfsvörn endar--

jájá
hef stundum spáð í að gera svona lista - nei ekki draumaprinsalista...
lista yfir fólk sem hefur áhrif á mig
t.d. einn úr tónlistinni:

  • Tchaikovsky (fiðlukonsertinn!)

  • Dvorak (t.d. mesicku)

  • Mussorgsky (sönnun þess að fólk með "rangan" bakrunn getur samt gert svo margt)

  • (ha Austur-Evrópa hvað???)

  • Jón Leifs (það er svo ljúfsárt Ísland í verkunum hans)

  • Kalli Run (þvílík ástríða)

  • Jón Ásgeirs (þvílík fegurð)

  • Jórunn Viðars (glettinn nútíminn)

  • uh uh uh...

  • Jeff, Matt og þeir þarna...



eða yfir fólk sem ég tek mér til mannlegrar fyrirmyndar eins og amma og m&p og Vigga og kannski núna Che (ég meina sko fyrir utan aðferðirnar sem hann notaði - en egalitisti dauðans! - ouch)

er ég ekki svo mikil "lista"kona alltaf??

nema bara... til hvers?

er það ekki bara tilraun til að skilgreina og skipuleggja eitthvað sem á bara best heima í undirmeðvitundinni?

kannski ég ætti bara að hætta með þetta lista-æði mitt
amk. takmarka það við vinnutengd efni (allir midp2 símar osfrv)

stundum þegar maður skilur eitthvað of vel, þá hættir manni allt í einu að finnast það spennandi...

svo ég held þau megi bara hafa áhrif á mig án þess að ég viti nákvæmlega hvernig

því, um leið og það er orðið meðvitað, er það þá ekki líka bara orðið þvingað???

úff, á það þá ekki líka við um sönginn???

bleah!